1509. ``நன்மை செய்பவருக்குக் கொடுக்கப்படும் பிரதிபலனைப் போன்றே, அவருக்கு நன்மைக்கான வழியைக் காட்டியவருக்கும் (பிரதிபலன்) கொடுக்கப்படும்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: முஸ்லிம்

1511. ``நிச்சயமாக ஹலால் (அனுமதிக்கப்பட்டது) தெளிவாக்கப்பட்டுள்ளது'' ஹராம் (விலக்கப்பட்டது) தெளிவாக்கப்பட்டுள்ளது. இவை இரண்டிற்கும் இடையில் ஐயமானவை பல உள்ளன. மக்களில் பெரும்பாலோர் இது குறித்து அறியா மாட்டார். ஐயத்திற்கிடமானதை விட்டுவிலகியவர் தன் மார்க்கத்தையும், தன் மானத்தையும் காத்துக் கொண்டார். ஐயத்திற்கிடமானதில் வீழ்ந்தவர் ஹராமில் வீழ்ந்துவிடுகிறார். எப்படி என்றால் மேய்ப்பாளன் (தன்னுடைய ஆடுகளை) வேலி வேயப்பட்ட வயல்களை சுற்றி மேய்க்கிறான். அப்போது, (அந்த ஆடுகள் வேலியைத் தாண்டி வயலில்) இறங்கிவிடக் கூடும். அறிந்து கொள்ளுங்கள்! ஒவ்வோர் அரசனுக்கும் ஒரு வேலி உள்ளது. அறிந்து கொள்ளுங்கள்! அல்லாஹ்வினால் வேலி வேயப்பட்ட வயல்கள் அவனால் தடை செய்யப்பட்ட ஹராமான காரியங்களாகும். அறிந்து கொள்ளுங்கள்! உடலில் ஒரு சதைத்துண்டு உள்ளது. உடல் முழுவதும் சரியாய் இருக்கும். அது கெட்டுவிட்டால் உடல் முழுவதும் கெட்டுவிடும். அறிந்து கொள்ளுங்கள்! அது இதயமாகும்'' என்று இறைத்தூதர்(ஸல்) கூற நான் செவியுற்றுள்ளேன் என நுஃமான் இப்னு பஷீர்(ரலி) அறிவித்தார்.
நுஃமான் இதனைக் கூறியபோது தம் இரண்டு விரல்களையும் தம் இரண்டு காதுகளின்பால் சுட்டிக் காண்பித்து உணர்த்தினார்.
நூல்கள்: புகாரீ, முஸ்லிம்

1513. இறைத்தூதர்(ஸல்) என் தோளைப் பிடித்தார்கள். அப்போது, ``நீ உலகில் ஓர் அந்நியன் அல்லது வழிப்போக்கன் போன்றோ இருந்து கொள்'' என்று கூறினார்கள் என இப்னு உமர் அறிவித்தார்.
மேலும் இப்னு உமர், ``நீ மாலையையடைந்hல், காலைப்பொழுதை எதிர் பார்க்காதே! காலையை அடைந்து விட்டால் மாலையை எதிர் பார்க்காதே! ஆரோக்கியமாய் இருக்கும் போதே நோய்க் காலத்திற்காக எதையாவது தேடிக் கொள்! இன்னும் நீ உயிர் வாழ்ந்து கொண்டிருக்கும் போதே (உன் மரணத்திற்குப் பிந்தைய வாழ்க்கைக்காக) எதையாவது தேடிக்கொள்!'' எனக் கூறுபவராய் இருந்தார்.
நூல்: புகாரீ

1515. இறைத்தூதர்(ஸல்) அவர்களுக்குப் பின்னால் நான் இருந்தேன்.
``தம்பி! நீ அல்லாஹ்வின் கட்டளைகளை மனத்தில் வை! அல்லாஹ் உன்னைப் பாதுகாப்பான். மேலும் நீ உன் கவனத்தை அல்லாஹ்வின் பக்கம் செலுத்து. நீ அவனை உன் முன் காண்பாய் (அறிவாய்). (உன் தேவை எதையேனும்) கேட்டால், அல்லாஹ்விடம் மட்டுமே கேள்! மேலும் நீ உதவி தேடினால் அல்லாஹ்விடமே மட்டுமே உதவி தேடு!'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்: திர்மிதீ
இமாம் திர்மிதீ(ரஹ்) இதனை ஹஸனுன் ஸஹீஹுன் (ஆதாரப்பூர்வமானது) எனக் குறிப்பிட்டுள்ளார்.

1517. ``மக்களிடமிருந்து தன் தேவைகளை எதிர்பார்க்காதவனாக அந்தரங்க வாழ்க்கையில் சிறந்தவனாக வாழும் அடியானை அல்லாஹ் நேசிக்கிறான்'' என்று இறைத்தூதர்(ஸல்) கூறினார்கள் என ஸஅத் இப்னு அபீ வக்காஸ்(ரலி) அறிவித்தார்.
நூல்: முஸ்லிம்

1519. ``ஆதமின் மகன் தன் வயிற்றைவிட அதிகமாக ஒரு தீய பாத்திரத்தை நிரப்புவதில்லை'' என்று இறைத்தூதர்(ஸல்) கூறினார்கள் என மிக்தாம் இப்னு மஃதீ யகரிப்(ரலி) அறிவித்தார்.
நூல்: திர்மிதீ
இமாம் திர்மிதீ(ரஹ்) இதனை ஹஸன் எனக் குறிப்பிட்டுள்ளார்.

1521. ``அமைதியாய் இருப்பது அறிவுடைய செயலாகும். மேலும், இதனை மிகக் குறைந்த மக்களே விரும்புவர்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்: பைஹகீ
இமாம் பைஹகீ இதனை தம்முடைய ஷுஅபுல் ஈமான் எனும் நூலில் பலவீனமான அறிவிப்புத் தொடரில் பதிவிட்டுள்ளார். இது லுக்மான்(அலை) அவர்களின் கூற்று என்பதே சரியாகும்.

1523. அனஸ்(ரலி) வாயிலாக இப்னு மாஜாவில் 1522 வது ஹதீஸ் போன்றே பதிவாகியுள்ளது.

1525. ``அநீதி மறுமை நாளில் (அதைச் செய்பவருக்கு, அது அடுக்கடுக்கான) பல இருள்களாக வந்து நிற்கும்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்

1527. ``உங்களைக் குறித்து நான் மிகவும் அஞ்சுவதெல்லாம், நீங்கள் சிறிய இணைவைப்பில் ஈடுபட்டு விடுவீர்கள் என்பதுதான். பிறருக்குக் காட்டிக் கொள்வதறக்காக வணக்கத்திலும், நற்செயல்களிலும் ஈடுபடுவதே சிறிய இணைவைப்பாகும்'' என்று இறைத்தூதர்(ஸல்) கூறினார்கள் என மஹ்மூத் இப்னு லபீத்(ரலி) அறிவித்தார்.
இது அஹ்மதில் `ஹஸன்' எனும் தரத்தில் பதிவிடப்பட்டுள்ளது.