1537. அல்லாஹ்விடமிருந்து அறிவிப்பவற்றில் (ஹதீஸ் குதுஸியில்) இறைத்தூதர்(ஸல்) கூறினார்கள். ``என் அடியார்களே! அநீதியை எனக்கு நானே விலக்கிக் கொண்டேன். இன்னும், உங்களுக்கிடையேயும் அதனை விலக்கிவிட்டேன். எனவே, நீங்கள் உங்களுக்கு இடையேயும் ஒருவருக்கொருவர் அநீதி இழைக்காதீர்கள்'' என்று அல்லாஹ் கூறுகிறான் என அபூ தர்(ரலி) அறிவித்தார்.
நூல்: முஸ்லிம்

1539. ``ஒருவருக்கொருவர் பொறாமை கொள்ளாதீர்கள்! நீங்கள் பொருளை வாங்கும் எண்ணமில்லாமல் பிறரை வாங்கச் செய்வதற்காக விலையை உயர்த்திவிடாதீர்கள்! ஒருவருக்கொருவர் பகைமை கொள்ளாதீர்கள்! ஒருவருக்கொருவர் முகம் திருப்பிக் கொள்ளாதீர்கள்! இன்னும், ஒருவரின் வியாபாரத்தில் மற்றவர் (இடையே புகுந்து) வியாபாரம் செய்யாதீர்கள்! நீங்கள் அல்லாஹ்வின் அடியார்களாகவும் (உங்களுக்குள்) சகோதரர்களாகவும் இருங்கள்! ஒரு முஸ்லிம் மற்றொரு முஸ்லிமிற்கு சகோதரனாய் இருக்கிறான்; அவன், அவனுக்கு அநீதி இழைக்க மாட்டான். அவன் அவனை ஏமாற்ற மாட்டான் அவன் அவனை இழிவுபடுத்தவும் மாட்டான்'' இறையச்சம் இங்கே இருக்கிறது என (கூறி) தம் நெஞ்சை மும்முறை சுட்டிக் காண்பித்து, ``மனிதன் தன் சகோதரனை இழிவாகக் கருதுவதே பெரும் தீங்கிற்குப் போதுமானதாகும்.
முஸ்லிமின் இரத்தமும், அவனுடைய சொத்தும், மேலும் அவனுடைய தன்மானமும் மற்றொரு முஸ்லிம் மீது ஹராம் (விலக்கப்பட்டது) ஆகும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1541. ``உன் முஸ்லிம் சகோதரனுடன் சண்டையிடாதே! அவனைக் கேலி செய்யாதே! அவனிடம் உன்னால் நிறைவேற்ற முடியாத வாக்குறுதியை அளிக்காதே!'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
பலவீனமான அறிவிப்புத் தொடருடன் இது திர்மிதீயில் பதிவிடப்பட்டுள்ளது.

1543. ``இருவர் ஒருவருக்கொருவர் ஏசிக் கொண்டால் அதன் பாவம் (ஏச) ஆரம்பித்தவரைச் சாரும். இது எதுவரை எனில், அநீதி இழைக்கப்பட்டவர் வரம்பு மீறாதவரை'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1545. ``தீய கெட்ட வார்த்தைகள் பேசுபவர்கள் மீது அல்லாஹ் கோபம் கொள்கிறான்'' என்று இறைத்தூதர்(ஸல்) கூறினார்கள் என அபூ தர்தா(ரலி) அறிவித்தார்.
இதனை ஆதாரப்பூர்வமான அறிவிப்புத் தொடரில் இமாம் திர்மிதீ(ரஹ்) பதிவிட்டுள்ளார்.

1547. ``இறந்தவர்களை ஏசாதீர்கள். ஏனெனில், அவர்கள் தங்களின் செய்கையின் பால் சென்று விட்டார்கள்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்: புகாரீ

1549. ``தன் கோபத்தைத் தடுத்துக் கொள்பவரிடமிருந்து அல்லாஹ் தன் தண்டனையைத் தடுத்துக் கொள்கிறான்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்: தப்ரானீ

1551. ``ஏமாற்றுக்காரன், கஞ்சன், தன் பொறுப்பின் உள்ளவர்களுக்குத் தீங்கிழைப்பவன் ஆகிய யாரும் சுவர்க்கம் புக மாட்டார்'' என்று இறைத்தூதர்(ஸல்) கூறினார்கள் என அபூ பக்கர்(ரலி) அறிவித்தார்.
நூல்: திர்மிதீ
இதன் அறிவிப்பாளர் தொடர் பலவீனமானது.

1553. ``மக்களின் குறைகளை விட்டுவிட்டுத் தம் குறைகளைக் காண்பவருக்கு `தூபா' எனும் நிழல் தரும் மரம் (சுவர்க்கத்தில்) உள்ளது'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்: பஸ்ஸார்
இது `ஹஸன்' எனும் தரத்தில் பதிவிடப்பட்டுள்ளது.

1555. ``அவசரப்படுவது ஷைத்தானின் (செயல்களில்) ஒன்றாகும்'' என்று இறைத்தூதர்(ஸல்) கூறினார்கள் என ஸஹ்ல் இப்னு ஸஅத்(ரலி) அறிவித்தார்.
நூல்: திர்மிதீ
இது `ஹஸன்' எனும் தரத்தில் பதிவிடப்பட்டுள்ளது.