1562. உண்மையில் நிலைத்திருங்கள். ஏனெனில், உண்மை நன்மையில் கொண்டு செல்கிறது. நன்மை, சுவர்க்கத்திற்குக் கொண்டு செல்கிறது. மனிதன் எப்போதும் உண்மையையே பேசிக்கொண்டு உண்மையைத் தேடிக் கொண்டே இருந்தால், அல்லாஹ் அவனை உண்மையாளர்களில் ஒருவனாக எழுதுகிறான்.
பொய் பேசுதல் குறித்து உங்களை நான் எச்சரிக்கிறேன். ஏனெனில், பொய் தீயவழியில் கொண்டு செல்கிறது. மேலும், தீயவழி நரகத்திற்குக் கொண்டு செல்கிறது. மனிதன் எப்போதும் பொய்யே பேசிக்கொண்டு பொய்யின் தேட்டத்திலேயே இருந்தால், அவனைப் பொய்யர்களில் ஒருவனாக எழுதுகிறான்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்கள்: புகாரீ, முஸ்லிம்

1564. ``பாதைகளில் அமர்வது குறித்து உங்களை நான் எச்சரிக்கிறேன்'' என இறைத்தூதர்(ஸல்) கூறினார்கள்.
``இறைத்தூதர் அவர்களே! நாங்கள் பேசிக் கொள்வதற்கு எங்களுக்கு சபைகள் தேவைப்படுகின்றனவே'' என மக்கள் கூறினார்கள்.
``நீங்கள் பேசித்தான் ஆக வேண்டும் என்றால், பாதைக்கு அதன் உரிமையைக் கொடுத்துவிடுங்கள்'' என இறைத்தூதர்(ஸல்) கூறினார்கள்.
``அதன் உரிமைகள் யாவை?'' என வினவினர்
``(அந்நியப் பெண்களைக் கூர்ந்து பார்ககாமல்) பார்வையைத் தாழ்த்திக் கொள்வதும், பிறருக்குத் துன்பம் விளைவிக்காமல் இருப்பதும், ஸலாமுக்கு பதிலுரைப்பதும், நன்மை புரியும்படிக் கட்டளையிட்டு, தீமையிலிருந்து தடுப்பதும்தாம் அவை'' என பதிலளித்தார்கள்.
நூல்: புகாரீ, முஸ்லிம்

1566. ``நல்லொழுக்கத்தை விட மறுமையின் தராசில் வேறு எதுவும் கனமானதாய் இருக்காது'' என்று இறைத்தூதர்(ஸல்) கூறினார்கள் என அபூ தர்தா(ரலி) அறிவித்தார்.
நூல்கள்: அபூ தாவூத், திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1568. ``நீ வெட்கம் கொள்ளவில்லை எனில் நீ விரும்பியதைச் செய்து கொள்! என்பது முந்தைய இறைத்தூதுத்துவ மொழிகளில் ஒன்றாகும்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: புகாரீ

1570. ``ஒருவர் மற்றவர் மீது அக்கிரமம் புரியாமல், ஒருவர் மற்றவர் மீது பெருமை கொள்ளாமல் பணிந்தவர்களாய் இருங்கள் என்று எனக்கு வஹீ (இறைச் செய்தி) அறிவிக்கப்பட்டுள்ளது'' என்று இறைத்தூதர்(ஸல்) கூறினார்கள் என இயாள் இப்னு ஹிமார்(ரலி) அறிவித்தார்.
நூல்: முஸ்லிம்

1572. அஸ்மா பின்த் யஸீத் வாயிலாக 1571 வது ஹதீஸ் போன்றே அஹ்மதில் பதிவிடப்பட்டுள்ளது.

1574. ``மக்களே! ஸலாமை (உங்களுக்குள் ஒருவருக்கொருவர் கூறி) பரப்புங்கள்! உறவினரோடு சேர்ந்து வாழுங்கள்! உணவளியுங்கள்! மேலும், இரவில் மக்கள் தூங்கும்போது நீங்கள் (எழுந்து) தொழுங்கள். அப்போதுதான் நீங்கள் சுவர்க்கத்தில் அமைதியுடன் நுழையலாம்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு ஸலாம்(ரலி) அறிவித்தார்.
ஆதாரப்பூர்வமான அறிவிப்புத் தொடரில் இமாம் திர்மிதீ(ரஹ்) இதனைப் பதிவிட்டுள்ளார்.

1576. ``அதிகமாக சுவர்க்கத்தில் (மக்களை) புகுத்துபவைவ இறையச்சமும் நற்குணமும்தாம்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: திர்மிதீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1578. ``இறைநம்பிக்கையாளன் இறைநம்பிக்கை கொண்டுள்ள தன் சகோதரனுக்குக் கண்ணாடி ஆவான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: அபூ தாவூத்
இது `ஹஸன்' எனும் தரத்தில் பதிவிடப்பட்டுள்ளது.

1580. ``என் இரட்சகனே! என்னை அழகாகப் படைத்தது போன்று என் குணநலன்களையும் அழகுபடுத்துவாயாக!'' என்று இறைத்தூதர்(ஸல்) பிராத்தித்து வந்தார்கள் என இப்னு மஸ்வூத்(ரலி) அறிவித்தார்.
நூல்: அஹ்மத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.