1569. பலமான இறைநம்பிக்கையாளன் பலமற்ற இறைநம்பிக்கையாளனைவிட அல்லாஹ்விடம் சிறந்தவனும் விருப்பத்திற்குரியவனும் ஆவான். (இறைநம்பிக்கையுள்ள) ஒவ்வொருவரிலும் நன்மை உண்டு. இன்னும், உனக்கு பயனளிப்பதை நீ ஆசைப்படு. இன்னும், அல்லாஹ்விடமே உதவி தேடு! உனக்கு ஏதாவது நேர்ந்துவிடின், நான் இன்னின்னவாறு? செய்திருந்தால், இப்படி ஆகியிருக்குமே! எனக் கூறாதே!'' அல்லாஹ் எதை நாடினானோ, எது விதியோ அது நடந்துவிட்டது எனக் கூறிக்கொள்! ஏனெனில், (லவ் - இவ்வாறு நடந்திருந்தால்)அந்த வார்த்தை ஷைத்தானின் சூழ்ச்சிக்கு வழி திறக்கும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1571. ``தன் சகோதரனின் மானத்தை அவன் அறியாத நிலையிலும் காப்பவரின் முகத்தை, அல்லாஹ் மறுமையில் நெருப்பிலிருந்து காக்கிறான்'' என்று இறைத்தூதர்(ஸல்) கூறினார்கள் என அபூ தர்தா(ரலி) அறிவித்தார்.
நூல்: திர்மிதீ
இது `ஹஸன்' எனும் தரத்தில் பதிவிடப்பட்டுள்ளது.

1573. ``தர்மம் செய்தல் செல்வத்தில் எதையும் குறைத்துவிடாது. அடியான் மன்னிப்புக் கோருவதால் அல்லாஹ் அவனுடைய மதிப்பை (மேலும்) அதிகப்படுத்தவே செய்கிறான். அல்லாஹ்வுக்காகத் தன்னைத் தாழ்த்திக் கொண்ட எந்த மனிதனையும் அல்லாஹ் உயர்த்தாமல் இருக்க மாட்டான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1575. ``நலம் நாடுவதே மார்க்கமாகும்'' என்று இறைத்தூதர்(ஸல்) மும்முறை கூறினார்கள். அப்போது,
``இறைத்தூதர் அவர்களே! யாருக்கு நலம் நாடுவது?'' என நாங்கள் வினவினோம்.
``அல்லாஹ்வுக்கும் அவனுடைய வேதத்திற்கும் அவனுடைய தூதருக்கும் முஸ்லிம்களின் தலைவர்களுக்கும் மற்றும் முஸ்லிம் பொது மக்களுக்கும் நலம் நாடுவதாகும்'' என்று இறைத்தூதர்(ஸல்) பதிலளித்தார்கள் என தமீமுத்தாரி(ரலி) அறிவித்தார்.
நூல்: முஸ்லிம்

1577. ``நீங்கள் உங்கள் சொத்துக்களால் மக்களைக் கவர முடியாது. மாறாக, உங்களின் மலர்ந்த முகம் மற்றும் நற்குணத்தால்தான் (அவர்களைக்) கவர முடியும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: அபூ யஃலா
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1579. ``மக்களுடன் உறவாடி அவர்களிடமிருந்து வரக்கூடிய துன்பங்களைச் சகித்துக் கொள்ளும் இறைநம்பிக்கையாளன், மக்களுடன் உறவாடாத, அவர்களிடமிருந்து வரக்கூடிய துன்பங்களைச் சகிக்காத இறைநம்பிக்கையாளனைவிட, மேலானவன்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
இது இப்னு மாஜாவில் `ஹஸன்' எனும் தரத்திலும் மற்றும் திர்மிதீயில் ஸஹாபியின் பெயர் இல்லாமலும் உள்ளது.

1581. ``என் அடியான் என்னை நினைவு கூர்ந்து கொண்டும், என் தியானத்தால் தன் உதடுகளை அசைத்துக் கொண்டு இருக்கும் வரையில் நான் அவனுடன் இருக்கிறேன் என அல்லாஹ் கூறுகிறான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: இப்னு மாஜா
இமாம் இப்னுஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். புகாரீயில் இது முஅல்லக் ஆக உள்ளது.

1583. ``அல்லாஹ்வை நினைவு கூர்ந்தபடி மக்கள் ஒரு சபையில் அமரும்போது வானவர்கள் அவர்களைச் சூழ்ந்து கொள்கிறார்கள். இறைவனின் கருணை அவர்களை அரவணைத்துக் கொள்கிறது. அல்லாஹ் அவர்களைப் பற்றி (புகழ்ந்து தன் அவையில்) தன்னிடம் இருப்பவர்களிடம் நினைவு கூர்கிறான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்

1585. ``(லாயிலாஹா இல்லல்லாஹுவஹ்...) அல்லாஹ்வைத் தவிர வேறு கடவுள் இல்லை. அவன் தனித்தவன். அவனுக்கு இணை துணை இல்லை. அதிகாரங்கள் எல்லாம் அவனுக்கே உரியன புகழனைத்தும் அவனுக்கே உரியன. அவன் ஒவ்வொரு பொருளின் மீதும் ஆற்றல் மிக்கவன்'' என பத்துமுறை ஓதுபவர் இஸ்மாயீல்(அலை) அவர்களின் சந்ததியினரிலிருந்து நான்கு அடிமைகளை விடுவித்தவரைப் போன்றவர் ஆவார்'' என்று இறைத்தூதர்(ஸல்) கூறினார்கள் என அபூ ஹய்யூப் அன்ஸாரி(ரலி) அறிவித்தார்.
நூல்கள்: புகாரீ, முஸ்லிம்

1587. நிச்சயமாக, நான் உனக்காக நான்கு வார்த்தைகளைக் கூறியுள்ளேன். இன்று வரையில் நீ பேசியுள்ள வார்த்தைகளையும் இதனையும் எடைபோட்டால் அவை அனைத்தையும் விட இது கடுமையானதாய் இருக்கும். அது (ஹுப்ஹானல்லாஹி) அல்லாஹ் தூயவன். இன்னும், அவன் அவனுடைய படைப்பினங்கள் அளவு புகழ்பெற்றவன். இன்னும், அவனுடைய அரியணையின் கனமும் அவனுடைய வார்த்தைகளின் மையிக்கு சமமானது'' என்று இறைத்தூதர்(ஸல்) என்னிடம் கூறினார்கள் என ஜுவைரியா பின்த் அல்ஹாரிஸ்(ரலி) அறிவித்தார்.
நூல்: முஸ்லிம்