1588. 1. லா இலாஹ இல்லல்லாஹ் (அல்லாஹ்வைத் தவிர வேறு கடவுள் இல்லை). 2. சுப்ஹானல்லாஹ் (அல்லாஹ் தூயவன்). 3. அல்லாஹு அக்பர் (அல்லாஹ் மிகப்பெரியவன்). 4. அல் ஹம்து லில்லாஹ் (புகழனைத்தும் அல்லாஹ்விற்கே) 5. லா ஹவ்ல வலா குவ்வத்த இல்லா பில்லாஹ் (தீங்கிலிருந்து விலகிக் கொள்ளவும் நன்மைகள் செய்யவும் அல்லாஹ்வின் உதவியின்றி (வேறு) இல்லை) ஆகிய வாசகங்கள் என்றும் நிலையான நன்மை பயக்கும்'' என்று இறைத்தூதர்(ஸல்) கூறினார்கள் என அபூ ஸயீத் அல் குத்ரீ(ரலி) அறிவித்தார்.
நூல்: நஸயீ
இமாம் இப்னு ஹிப்பான் மற்றும் இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

1590. ``அப்துல்லாஹ் இப்னு கைஸே! சுவர்க்கத்தின் புதையல்களில் ஒன்றை நான் உனக்கு அறிவிக்கட்டுமா?'' அது `லா ஹவ்லவலா குவ்வத்த இல்லா பில்லாஹ் என்பதாகும்'' என்று இறைத்தூதர்(ஸல்) கூறினார்கள் என அபூ மூஸா அல் அஷ்அரீ(ரலி) அறிவித்தார்.
நூல்கள்: புகாரீ, முஸ்லிம்
``அல்லாஹ்வைத் தவிர வேறு புகலிடம் இல்லை'' என்பதும் நஸயீயில் உள்ளது.

1592. `வணக்கத்தின் கரு பிரார்த்தனையே ஆகும்' எனும் ஹதீஸ் அனஸ்(ரலி) வாயிலாக ``மர்ஃபூஃ'' எனும் தரத்தில் திர்மிதீயில் உள்ளது.

1594. ``பாங்கிற்கும் `இகாமத்'திற்குமிடையில் செய்யப்படும் துஆ (பிரார்த்தனை) ஏற்கப்படாமல் திருப்பி அனுப்பப்படுவதில்லை'' என்று இறைத்தூதர்(ஸல்) கூறினார்கள் என அனஸ்(ரலி) அறவிக்கிறார்.
நூல்: நஸயீ
இமாம் இப்னு ஹிப்பா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1596. ``இறைத்தூதர்(ஸல்) துஆவிற்காகத் தம் கைகளை உயர்த்தினால், அதனை முகத்தில் தடவிக் கொள்ளாத வரை அகற்ற மாட்டார்கள்'' என்று உமர்(ரலி) அறிவித்தார்.
நூல்: திர்மிதீ
இதற்குச் சான்றாக பல ஹதீஸ்கள் உள்ளன.

1598. ``அதிகமாக என் மீது ஸலவாத் கூறியவர்களே மறுமையில் என்னுடன் அதிக நெருக்கமுள்ளவர்களாய் இருப்பார்கள்'' என்று இறைத்தூதர்(ஸல்) கூறினார்கள் என இப்னு மஸ்வூத்(ரலி) அறிவித்தார்.
நூல்: திர்மிதீ
இமாம் இப்னு ஹிப்பா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1600. ``என் இரட்சகனே! என் மார்க்கம், என் உலகம், என் குடும்பம் மேலும் என் சொத்து ஆகியவற்றின் நலனை உன்னிடமே நான் வேண்டுகிறேன். என் இரட்சகனே! என் மானத்தைக் காத்தருள்! என் பயத்தைப் போக்கிவிடு! என் முன்னாலிருந்தும் என் வலப்பக்கத்திலிருந்தும் இடப்பக்கத்திலிருந்தும் என் மேலிருந்தும் என்னைக் காத்தருள்! மேலும், என் கீழிருந்து நான் அறியாத வண்ணம் பிடிக்கப்படாமல் இருக்க உன் உயர்வைக் கொண்டு பாதுகாப்புத் தேடுகிறேன்'' என்று இறைத்தூதர்(ஸல்) காலையிலும் மாலையிலும் ஓதாமல் இருக்கமாட்டார்கள என இப்னு உமர்(ரலி) அறிவித்தார்.
நூல்கள்: நஸயீ, இப்னுமாஜா

1602. ``என் இரட்சகனே! கடன் சுமை, எதிரிகளின் தாக்குதல் மற்றும் (என்னைப் பார்த்து) எதிரிகள் மகிழ்ச்சி அடைதல் ஆகியவற்றிலிருந்தும் உன்னிடம் பாதுகாப்புத் தேடுகிறேன்'' என இறைத்தூதர்(ஸல்) பிரார்த்திப்பவர்களாக இருந்தார்கள் என அப்துல்லாஹ் இப்னு உமர்(ரலி) அறிவித்தார்.
நூல்: நஸயீ
இமாம் ஹாகி(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

1604. ``என் இரட்சகனே! நாங்கள் உன்னைக் கொண்டே காலைப்பொழுதை அடைகிறோம். மேலும் உன்னைக் கொண்டே மாலைப் பொழுதை அடைகிறோம். மேலும் உன்னாலேயே உயிர்ப்பிக்கப்படுகிறோம். மேலும், உன்னாலேயே மரணமடைகிறோம். இன்னும் உன் பக்கமே திரும்புகிறோம்'' என்று இறைத்தூதர்(ஸல்) காலைப் பொழுதை அடையும்போது பிரார்த்தித்து வந்தார்கள். மேலும், மாலைப் பொழுதை அடையும் போதும் இவ்வாறே பிரார்த்தித்து வந்தார்கள். ஆனால், இறுதியில் உன்னிடமே மீளவேண்டியுள்ளது என அபூ ஹுரைரா(ரலி) அறிவித்தார்.
நூல்கள்: அபூ தாவூத், நஸயீ, திர்மிதீ மற்றும் இப்னு மாஜா

1606. ``என் இரட்சகனே! என் பாவங்களை எனக்கு மன்னிப்பாயாக! என் அறியாமை மற்றும் என் காரியங்களில் நான் செய்யும் வீண்விரயம் மற்றும் என்னிடமிருந்து எழுகிற நான் அறிந்த குற்றங்களை மன்னித்தருள்! என் இரட்சகனே! நான் வேண்டுமென்றே செய்த பிழைகளையும் விளையாட்டாகச் செய்த பிழைகளையும் தவறிச் செய்த குற்றத்தையும், அறிந்தே செய்த குற்றத்தையும் மன்னிப்பாயாக! என் இரட்சகனே! நான் முன்னர் செய்தவற்றையும் பின்னர் செய்தவற்றையும் மறைமுகமாகச் செய்தவற்றையும், பகிரங்கமாகச் செய்தவற்றையும், இன்னும் எதை எல்லாம் நீ என்னிடமிருந்து அறிந்த தவறுகள் அனைத்தையும் மன்னித்தருள்! நீயே உயர்த்துபவன். மேலும் நீயே தாழ்த்துபவன். ஒவ்வொன்றின் மீதும் நீ ஆற்றல் மிக்கவன்'' என்று இறைத்தூதர்(ஸல்) பிரார்த்தனை செய்வார்கள் என அபூ மூஸா அல் அஷ்அரி(ரலி) அறிவித்தார்.
நூல்கள்: புகாரீ, முஸ்லிம்