326. அஹ்மத் மற்றும் தாரகுத்னீயில் இவ்வாறே மற்றோர் அறிவிப்பு உள்ளது. அதில், இது நடந்தது குப்ஹுத் தொழுகையில் என்றும், இறைத்தூதர்(ஸல்) மரணிக்கும் வரை குனூத் ஓதினார்கள் என்றும் உள்ளது.

328. சஅத் இப்னு தாரிக் தம் தந்தையிடம் ``என் தந்தையே! தாங்கள், இறைத்தூதர்(ஸல்) அபூ பக்ர்(ரலி), உமர்(ரலி) உஸ்மான்(ரலி), அலீ(ரலி) ஆகியோரின் பின்னால் (நின்று) தொழுதுள்ளீர்கள். அவர்கள் ஃபஜ்ர் தொழுகையில் குனூத் ஓதினார்களா?'' என்று கேட்டதற்கு, ``என் மகனே! இது (மார்க்கத்தில்) புதிதாக உண்டாக்கப்பட்ட செயல்'' எனப் பதில் கூறினார் என சஅத் இப்னு தாரிக்(ரலி) அறிவித்தார்.
நூல்கள்: அஹ்மத், திர்மிதீ, நஸயீ மற்றும் இப்னு மாஜா.

330. இறைத்தூதர்(ஸல்) எங்களுக்கு ஒரு துஆவைக் கற்றுக் கொடுத்தார்கள். நாங்கள் அதனை ஃபஜ்ர் தொழுகையில் குனூத்தாக ஓதிக் கொண்டிருந்தோம் என இப்னு அப்பாஸ்(ரலி) அறிவித்தார்.
நூல்: பைஹகீ
இதன் அறிவிப்பாளர் தொடரில் பலவீனம் உள்ளது.

332. இறைத்தூதர்(ஸல்) ஸஜ்தாச் செய்யும்போது (தரையில்) கைகளை வைப்பதற்கு முன்னதாக தம் இரண்டு முட்டுக் கால்களையும் வைத்ததை நான் பார்த்தேன் என வாயில் இப்னு ஹுஜ்ர்(ரலி) அறிவித்தார்.
நூல்கள்: அபூ தாவூத், நஸயீ, திர்மிதீ மற்றும் இப்னு மாஜா
இப்னு உமர்(ரலி) அவர்களின் ஒரு ஹதீஸ், இங்கு இடம் பெற்றுள்ள முதல் ஹதீஸிற்கு சான்றாக உள்ளது. இதனை இப்னு குஸைமா(ரஹ்) ஆதாரப்பூர்வமானது எனக் குறிப்பிட்டுள்ளார்.
இமாம் புகாரீ(ரஹ்) இதனை தம் பாடத் தலைப்பில் முஅல்லக், `மவ்கூஃப்' எனும் தரத்திலும் பதிவிடப்பட்டுள்ளது.

334. இறைத்தூதர்(ஸல்) எங்களை நோக்கி, ``உங்களில் ஒருவர் தொழும்போது, ``(அத்தஹிய்யாத்து....) எல்லாவிதமான காணிக்கைகளும், தொழுகைகளும், ஏனைய நல்லறங்களும் அல்லாஹ்விற்கே உரித்தானவை. நபியே! உம் மீது சாந்தியும் இறைவனின் கருணையும், அபிவிருத்தியும் உண்டாகட்டும்! இன்னும் எங்கள் மீதும் இறைவனின் ஏனைய நல்லடியார்கள் மீதும் சாந்தி உண்டாகட்டும்! `நிச்சயமாக அல்லாஹ்வைத் தவிர வேறு இறைவன் இல்லை' அவன் தனித்தவன். அவனுக்கு இணையுமில்லை, துணையுமில்லை' என நான் சாட்சி அளிக்கிறேன். இன்னும் முஹம்மத்(ஸல்), அவனுடைய நல்லடியர் மற்றும் தூதர் என்றும்' என நான் சாட்சி அளிக்கிறேன் என ஓதி, பின்னர், அவர் துஆக்களில் தான் விரும்பியதைத் தேர்ந்தெடுத்துப் பிரார்த்திக்கட்டும்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு மஸ்வூத்(ரலி) அறிவித்தார்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.
தொழுகையில் அத்திஹிய்யாத்து ஓதுவது சட்டமாய் ஆக்கப்படுவதற்கு முன்னர் நாங்கள் தொழுகையில் அத்தஹிய்யாத்து ஓதும் இடத்தில் அல்லாஹ்வின் மீது சாந்தி உண்டாகட்டும், ஜிப்ரீல் மீகாயீல் மீது சாந்தி உண்டாகட்டும் என ஓதிக் கொண்டிருந்தோம் அப்போது, இறைத்தூதர்(ஸல்) இவ்வாறு சொல்லாதீர்கள்! மாறாக, அத்தஹிய்யாத்தை இவ்வாறு (இந்த ஹதீஸில் வருவதுபோல) கூறுங்கள் என்று கூறினார் என நஸயீயின் மற்றோர் அறிவிப்பில் உள்ளது.
அப்துல்லாஹ் இப்னு மஸ் வூத்(ரலி) அவர்களுக்கு இறைத்தூதர்(ஸல்) தஷஹ்ஹுதைக் கற்றுக் கொடுத்தார்கள். இன்னும், அதை மக்களுக்குக் கற்றுத் தருமாறு கட்டளையிட்டார்கள் என அஹ்மதில் உள்ளது.

336. அல்லாஹ்வைப் புகழாமலும், இறைத்தூதர்(ஸல்) மீது ஸலவாத் கூறாமலும் ஒருவர் தம் தொழுகையில் துஆ செய்ததை இறைத்தூதர்(ஸல்) செவியுற்று, ``இவர் அவசரப்பட்டு விட்டார்'' எனக் கூறினார்கள். பின்னர் அவரை அழைத்து, ``உங்களில் ஒருவர் தொழுதால் அவர் (அத்தஹிய்யாத்து) தம் இரட்சகனைப் புகழ்ந்தும், போற்றியும் ஆரம்பிக்கட்டும். பின்னர், இறைத்தூதர்(ஸல்) மீது ஸலவாத் கூறட்டும். அதற்குப் பின்னர், அவர் தாம் விரும்பியவற்றை வேண்டட்டும்'' என்று அவர்கள் கூறினார்கள் என ஃபளாலா இப்னு உபைத்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் திர்மிதீ
இமாம் திர்மிதீ, இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர்.

338. உங்களில் ஒருவர் இறுதித் தஷ்ஹ்ஹுதில் அமர்ந்தால் நான்கு விஷயங்களிலிருந்து அல்லாஹ்விடம் பாதுகாப்புத் தேடிக் கொள்ளட்டும். ``எங்கள் இரட்சகனே! நரக வேதனையிலிருந்தும், மண்ணறையின் வேதனையிலிருந்தும், வாழ்வு மற்றும் மரணம் ஆகியவற்றின் சோதனையிலிருந்தும், தஜ்ஜாலின் குழப்பத்திலிருந்தும் உன்னிடம் பாதுகாவல் தேடுகிறேன் எனக் கூறட்டும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
முஸ்லிமின் மற்றோர் அறிவிப்பில், `உங்களில் ஒருவர் இறுதித் தஷஹ்ஹுதை முடித்துக் கொண்டால்' (இவ்வாறு ஓதட்டும்) என்ற வாசகம் உள்ளது.

340. நான் நபி(ஸல்) அவர்களுடன் தொழுதிருக்கிறேன். அப்போது, அவர்கள் தம் வலப்பக்கம் `அஸ்ஸலாமு அலைக்கும் வரஹ்மத்துல்லாஹி வபரகாத்துஹு' என்றும், தம் இடப் பக்கம் `அஸ்ஸலாமு அலைக்கும் வரஹ்மத்துல்லாஹி வபரகாத்துஹு என்றும் ஸலாம் கொடுப்பார்கள் என வாயில் இப்னு ஹுஜ்ர்(ரலி) அறிவித்தார்.
நூல்: அபூ தாவூத்
இதன் அறிவிப்புத் தொடர் ஆதாரப்பூர்வமானது என இமாம் அபூ தாவூத்(ரஹ்) குறிப்பிட்டுள்ளார்..

342. இறைத்தூதர்(ஸல்) ஒவ்வொரு ஃபர்ளு தொழுகைக்குப் பின்பு, பின்வரும் சொற்களால் பாதுகாவல் தேடுவார்கள் ``இரட்சகனே! உலோபித்தனத்திலிருந்தும், கோழைத்தனத்திலிருந்தும் உன்னிடம் பாதுகாவல் தேடுகிறேன். தள்ளாத வயது வரை வாழ்வதிலிருந்தும் உன்னிடம் பாதுகாவல் தேடுகிறேன். இவ்வுலகத்தின் குழப்பங்களிலிருந்தும் உன்னிடம் பாதுகாவல் தேடுகிறேன். இன்னும் மண்ணறையின் வேதனையிலிருந்தும் உன்னிடம் பாதுகாவல் தேடுகிறேன்'' (என்று கூறுவார்கள்) என ஸஅத் இப்னு அபீ வக்காஸ்(ரலி) அறிவித்தார்.
நூல்: புகாரீ

344. ``கடமையான ஒவ்வொரு தொழுகைக்குப் பின்பும் 33 முறை ஸுப்ஹானல்லாஹ், மேலும் 33 முறை அல்ஹம்துலில்லாஹ், மேலும் 33 முறை அல்லாஹு அக்பர். இவை மொத்தம் 99 ஆகிறது. இவற்றைக் கூறிக் கொண்டு நூறாக முழுiமுப்படுத்துவதற்காக, லா இலாஹ இல்லல்லாஹு, வஹ்தஹு, லா ஷரீக்க லஹு, லஹுல் முல்க்கு, வலஹுல் ஹம்து, வஹுவ அலா குல்லி ஷய்யின் கதீர்'' எனக் கூறுபவரின் பாவங்கள் கடல் நுரை அளவு இருப்பினும், அவை மன்னிக்கப்படுகின்றன'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: முஸ்லிம்
குறிப்பு: அல்லாஹ்வைத் தவிர வேறு இறைவன் இல்லை. அவன் தனித்தவன். அவனுக்கு இணை துணை இல்லை. அரசாட்சி அனைத்தும் அவனுக்கே உரியன. புகழனைத்தும் அவனுக்கே உரியன. அவன் ஒவ்வொரு பொருள் மீதும ஆற்றல் மிக்கவன்.
மற்றோர் அறிவிப்பில் ``அல்லாஹு அக்பர்' என்பது 34 முறை'' என உள்ளது.