546. இறைத்தூதர்(ஸல்) மழைக்காக துஆச் செய்தபோது வானத்தை நோக்கித் தம் புறங்கைகளை உயர்த்தினார்கள் என அனஸ்(ரலி) அறிவித்தார்.
நூல்: முஸ்லிம்

548. நாங்கள் தங்கம் மற்றும் வெள்ளிப் பாத்திரங்களில் உண்ணக் கூடாது என்றும், பருகக் கூடாது என்றும், பட்டாடைகள் அணியக் கூடாது என்றும், அதன் மீது நாங்கள் உட்கார வேண்டாம் என்றும் இறைத்தூதர்(ஸல்) எங்களுக்குத் தடை விதித்தார்கள் என ஹுதைபா(ரலி) அறிவித்தார்.
நூல்: புகாரீ

550. ஒரு பயணத்தில் அப்துர் ரஹ்மான் இப்னு அவ்ஃப் மற்றும் ஸுபைர்(ரலி) ஆகிய இருவருக்கும் ஒரு வகை அரிப்புநோய் இருந்த காரணத்தால் பட்டுச்சட்டை அணிவதற்கு இறைத்தூதர்(ஸல்) சலுகையளித்தார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

552. ``தங்கமும், பட்டும் என் சமுதாயத்தின் பெண்களுக்கு அனுமதிக்கப்பட்டுள்ளன. ஆண்களுக்கு விலக்கப்பட்டுள்ளன'' என்று இறைத்தூதர்(ஸல்) கூறினார்கள் என அபூ மூஸா(ரலி) அறிவித்தார்.
நூல்கள்: அஹ்மத், நஸயீ மற்றும் திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

554. (எகிப்து மற்றும் சிரியா ஆகிய நாடுகளில் தயாரிக்கப்பட்ட ஒருவகை) பட்டு மற்றும் காவி நிற ஆடையை (அணிவதை) இறைத்தூதர்(ஸல்) தடை செய்தார்கள் என அலீ(ரலி) அறிவித்தார்.
நூல்: முஸ்லிம்

556. (சட்டையிலுள்ள) பை மற்றும் காலரில் பட்டுத் துணியால் இரண்டு ஒட்டுப் போடப்பட்டிருந்த, நபி(ஸல்) அவர்களின் ஜிப்பா ஒன்றை அஸ்மா பின்த்து அபீ பக்ர்(ரலி) எடுத்தார்.
நூல்: அபூ தாவூத்
இதன் மூலம் முஸ்லிமில் உள்ளது.
அது ஆயிஷா(ரலி) அவர்களிடமிருந்தது. அவர் இறந்தபின் நாங்கள் அதைப் பெற்றுக் கொண்டோம். அதனை இறைத்தூதர்(ஸல்) அணிவார்கள். அதனை நாங்கள் நோய் நிவாரணம் தேடுவதற்காகத் தண்ணீரில் அலசுவோம் என்றும் அஸ்மா பின்த்து அபீ பக்ர்(ரலி) வாயிலாகவே முஸ்லிமில் உள்ளது.
``அவர்கள் அதனை வெள்ளிக் கிழமையன்றும், தூதுக் குழுவினர் யாரேனும் வரும் போதும் அணிந்து கொள்வார்கள்'' என இமாம் புகாரீ(ரஹ்) தம்முடைய அல் அதபுல் முஃப்ரத் நூலில் பதிவிட்டுள்ளார்.

558. ``தனக்கேற்படும் தீங்கின் காரணமாக உங்களில் யாரும் மரணத்தை விரும்ப வேண்டாம். அப்படியே ஒருவர் நிர்பந்தத்திற்கு உள்ளானால் ``இறைவா! நான் உயிர் வாழ்வது எதுவiரை எனக்கு நல்லதாய் இருக்குமோ அதுவரை எனக்கு வாழ்க்கையை அளிப்பாயாக! மேலும், எப்போது மரணமே எனக்கு நல்லதாய் இருக்குமோ அப்போது என்னை உலகிலிருந்து எடுத்துக் கொள்வாயாக! எனக் கூறட்டும் (பிரார்த்திக்கட்டும்)'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்

560. ``இறக்கும் தருவாயில் இருப்பவனுக்கு `லா இலாஹ இல்லல்லாஹ்' அல்லாஹ்வைத் தவிர வேறு இறைவன் இல்லை'' என்ற உறுதியை ஊட்டுங்கள்'' என்று இறைத்தூதர்(ஸல்) கூறினார்கள் என அபூ ஸயீத் மற்றும் அபூ ஹுரைரா(ரலி) அறிவித்தார்.
நூல்கள்: முஸ்லிம், அபூ தாவூத், நஸயீ, திர்மிதீ மற்றும் இப்னு மாஜா.

562. அபூ ஸலமா(ரலி) அவர்களின் மரண தருவாயில் இறைத்தூதர்(ஸல்) அங்கு வந்தார்கள். அவரின் கண் திறந்தவாறு இருந்தன. அவரின் கண்ணை இறைத்தூதர்(ஸல்) மூடிவிட்டார்கள். பின்னர், ``உயிர் கைப்பற்றப்பட்டால் பார்வை அதைப் பின்தொடர்கிறது'' என்று இறைத்தூதர்(ஸல்) கூறினார்கள்.
அப்போது அவரின் குடும்பத்தாரில் சிலர் அழத்தொடங்கினர். அதற்கு, ``உங்கள் உயிர்களுக்கு நல்லதைத் தவிர வேறு எதையும் கேட்காதீர்கள். ஏனெனில், (இப்போது) மலக்குகள் நீங்கள் சொல்வதற்கெல்லாம் ஆமீன் கூறுகிறார்கள்'' என்று இறைத்தூதர்(ஸல்) கூறினார்கள்.
பின்னர், ``யா அல்லாஹ்! அபூ ஸல்மாவை மன்னிப்பாயாக! நேர்வழி பெற்றவர்களில் அவரின் நிலையை உயர்த்தி அருள்வாயாக! அவரின் கப்ரை (மண்ணறையை) அவருக்கு விசாலமாக்கி அருள்வாயாக! மேலும், அதில் வெளிச்சத்தை உண்டாக்கி அருள்வாயாக! அவரின் அடிச்சுவட்டில் (அவரைப் பின்பற்றிப்) பணியாற்றுபவரை நியமிப்பாயாக'' என்று இறைத்தூதர்(ஸல்) கூறினார்கள் என உம்மு ஸலமா(ரலி) அறிவித்தார்.
நூல்: முஸ்லிம்

564. இறைத்தூதர்(ஸல்) இறந்தப் பின்னர் அவர்களை அபூ பக்ர்(ரலி) முத்தமிட்டார்கள் என ஆயிஷா(ரலி) அறிவித்தார்.
நூல்: புகாரீ