622. முகீரா(ரலி) வாயிலாக 620 வது ஹதீஸ் போன்றே திர்மீதியில் உள்ளது. ஆனால் அதில், ``நீங்கள் (இறந்தவர்களை திட்டுவதால்) உயிருள்ளவர்களை நோவினை செய்வீர்கள்'' எனும் வாசகம் உள்ளது.

624. அனஸ்(ரலி) அவர்களுக்கு `ஜகாத்' கடமை குறித்து அபூ பக்ர்(ரலி) ஒரு செய்தி எழுதினார்கள். இது முஸ்லிம்கள் மீது இறைத்தூதர்(ஸல்) கடமையாக்கிய `ஜகாத்' தர்மம் ஆகும். இது தன் நபிக்கு அல்லாஹ் இட்ட கட்டளையாகும்.
``இருபத்தி நான்கு ஒட்டகங்களுக்குள் ஒவ்வோர் ஐந்து ஒட்டகங்களுக்கும் ஓர் ஆடு (`ஜகாத்' ஆகும்). ஒட்டகங்களின் எண்ணிக்கை 25 லிருந்து 35 வரை ஆகிவிட்டால், அவற்றில் ஓர் ஆண்டு பூர்த்தியான பெண் ஒட்டகத்தை `ஜகாத்' கொடுக்க வேண்டும். பெண் ஒட்டகம் இல்லையெனில், இரண்டு ஆண்டுகள் முழுமையான ஆண் ஒட்டகத்i `ஜகாத்'தாகக் கொடுக்க வேண்டும். அவற்றின் எண்ணிக்கை 36 லிருந்து 45 வரை ஆகிவிட்டால், இரண்டு ஆண்டுகள் முழுமையான பெண் ஒட்டகத்தை `ஜகாத்'தாகத் தரவேண்டும். அவற்றின் எண்ணிக்கை 46 லிருந்து 60 வரை ஆகிவிட்டால், மூன்று ஆண்டுகள் பூர்த்தியான பெண் பெண் ஒட்டகத்தை `ஜகாத்'தாகக் கொடுக்க வேண்டும். அவற்றின் எண்ணிக்கை 61 லிருந்து 75 வரை ஆகிவிட்டால், அவற்றிற்கு நான்கு ஆண்டுகள் முழுமையான பெண் ஒட்டகங்களை `ஜகாத்'தாகக் கொடுக்க வேண்டும். அவற்றின் எண்ணிக்கை 76 லிருந்து 90 வரை ஆகிவிட்டால், இரண்டு வயதுள்ள இரண்டு பெண் ஒட்டகங்களை `ஜகாத்'தாக் கொடுக்க வேண்டும். அவற்றின் எண்ணிக்கை 91 லிருந்து 120 வரை ஆகிவிட்டால், மூன்று ஆண்டுகள் பருவமடைந்த பெண் ஒட்டகங்கள் இரண்டு `ஜகாத்'தாகக் கொடுக்க வேண்டும். அவற்றின் எண்ணிக்கை 120க்கு மேல் ஆகிவிட்டால் ஒவ்வொரு நாற்பது ஓட்டகங்களுக்கும் இரண்டு ஆண்டுகள் பூர்த்தியான பெண் ஒட்டகம் ஒன்றும் அல்லது ஒவ்வோர் ஐம்பதுக்கும் மூன்று ஆண்டுகள் பூர்த்தியான பெண் ஒட்டகங்களை `ஜகாத்'தாகக் கொடுக்க வேண்டும். நான்கு ஒட்டகங்கள் உள்ள யாருக்கும் `ஜகாத்' இல்லை. ஆனால், அதன் உரிமையாளர் விருப்பப்பட்டு கொடுக்கலாம்.
காடுகளில் மேயும் ஆடுகள் 40 முதல் 120 வரை இருக்குமாயின், அவற்றிற்கு ஒர் ஆடு `ஜகாத்' ஆகும். அவை 120 லிருந்து 200 வரை ஆகிவிட்டால், அவற்றிற்கு இரண்டு ஆடுகள் `ஜகாத்' ஆகும். அவற்றின் எண்ணிக்கை 200 லிருந்து 300 வரையாகிவிட்டால், மூன்று ஆடுகள் `ஜகாத்' ஆகும். அவற்றின் எண்ணிக்கை 300க்கும் அதிகமாகிவிட்டால் ஒவ்வொரு நூறுக்கும் ஓர் ஆடு (என்ற விகிதத்தில்) `ஜகாத்' ஆகும். காடுகளில் மேயக் கூடிய ஆடுகள் நாற்பதுக்கு ஒன்று குறைவாய் இருந்தால், அவற்றிற்கு அதன் உரிமையாளர் விரும்பி கொடுத்தால் தவிர `ஜகாத்' இல்லை.
தனித்தனியாய் இருக்கும் பொருட்களை ஜகாத் கொடுப்பதற்கு அஞ்சி ஒன்றுசேர்க்க வேண்டாம். இன்னும், மொத்தமாக இருக்கும் பொருட்களை `ஜகாத்' கொடுப்பதற்கு அஞ்சி பிரித்துக் கொள்ளுதல் வேண்டாம். எந்தச் சொத்து கூட்டு முறையில் உள்ளதோ, அதனுடைய அளவுப்படி அதற்குரிய `ஜகாத்'தை கொடுக்க வேண்டும்.
`ஜகாத்' பொருட்கள் பல் விழுந்து வயது முதிர்ந்ததாகவோ, குறைபாடு உள்ளதாகவோ, ஆண் பிராணியாகவோ இருக்கக்கூடாது. வாங்குபவர் அதனை விரும்பிக் கேட்டால் தவிர.
வெள்ளியில், 190 திர்ஹமில் அதன் உரிமையாளர் விரும்பினால் தவிர `ஜகாத், கடமை இல்லை.
நான்கு ஆண்டுகள் பூர்த்தியான பெண் ஒட்டகம் `ஜகாத்' கொடுப்பதற்கு இல்லாதவரிடமிருந்து மூன்று ஆண்டுகள் பூர்த்தியான பெண் ஒட்டகங்களைக் பெற்றுக் கொண்டு, அதனுடன் இரண்டு ஆடுகள் அல்லது இருபது திர்ஹம் சேர்த்து வசூலிக்க வேண்டும்.
அதேபோன்று ஒருவருக்கு மூன்று ஆண்டுகள் பூர்த்தியான பெண் ஒட்டகம் `ஜகாத்' கடமையாய் இருக்கும் நிலையில், அது அவரிடம் இல்லையெனில், அவரிடம் நான்கு ஆண்டுகள் பூர்த்தியான பெண் ஒட்டகம் இருப்பின் `ஜகாத்' பெறுபவர் அதன் உரிமையாளரிடம் அதனைப் பெற்றுக் கொண்டு, இரண்டு ஆடுகள் அல்லது இருபது `திர்ஹம்' (ஜகாத் அளித்தவருக்கு) கொடுக்க வேண்டும் என்று அபூ பக்ர்(ரலி) `ஜகாத்' கடமை குறித்து தமக்கு செய்தி எழுதினார்கள் என அனஸ்(ரலி) அறிவித்தார்.

626. ``ஜகாத்' பெறுவதற்காகச் செல்லும்போது, ஜகாத் வசூலிப்பவர்கள், முஸ்லிம்கள் தங்களின் கால்நடைகளுடன் தங்கி இருக்கும் நீர்த்துறைகளுக்குச் சென்று ஜகாத் வசூலிக்க வேண்டும்'' என்று இறைத்தூதர்(ஸல்) கூறினார்கள் என அம்ர் இப்னு ஷுஐபு தம் தந்தையிடமிருந்தும் அவர் தம் தந்தை மற்றும் பாட்டனார் வாயிலாக அறிவித்தார்.
நூல்: அஹ்மத்
``அவர்களின் `ஜகாத்'தை அவர்களின் வீடுகளுக்குச் சென்று வசூலிக்க வேண்டும்'' என அபூ தாவூதில் உள்ளது.

628. ``காடுகளில் மேய்ந்து கொள்ளும் ஒட்டகங்களில் ஒவ்வொரு நாற்பதிற்கும் இரண்டு ஆண்டுகள் பூர்த்தியான ஒரு பெண் ஒட்டகம் `ஐகாத்' ஆகும். இதனைக் கணக்கிட்டு (`ஜகாத்' கொடுக்காதிருக்க) அவர்கள் அவற்றைப் பிரித்துக் கொள்ளக் கூடாது. `ஜகாத்'தை இறைவனிடம் நற்கூலியை எதிர் பார்த்து கொடுப்பவர் அதற்கான கூலியைப் பெற்றுக் கொள்வார். `ஜகாத்' கொடுக்காதவரிடமிருந்து நாம் அதைக் கண்டிப்பாக வாங்குவோம். அத்துடன் அவர் `ஜகாத்'தைத் தர மறுத்ததற்குத் தண்டனையாக அவருடைய சொத்தின் ஒரு பகுதியை எடுத்துக் கொள்வோம். இது, நம் இறைவனால் வலியுறுத்தப்பட்ட விஷயங்களில் ஒன்றாகும். அதிலிருந்து எதுவுமே முஹம்மதின் குடும்பத்தாருக்கு அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என பஹஜ் இப்னு ஹகீம் தம் தந்தை மற்றும் பாட்டனார் வாயிலாக அறிவித்தார்.
நூல்கள்: முஸ்னத் அஹ்மத், அபூ தாவூத் மற்றும் நஸயீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இமாம் ஷாஃபியீ(ரஹ்) முஅல்லக் எனும் தரத்தில் இதற்குச் சான்றாகக் குறிப்பிட்டுள்ளார்.

630. ``ஒருவர் ஒரு சொத்தைப் பெற்றப் பின்பு அதன் மீது ஓராண்டு கழியாமல் `ஜகாத்' இல்லை'' என இப்னு உமர்(ரலி) வாயிலாக திர்மிதீயில் உள்ளது.
இது `மவ்கூஃப்' என்பதே சரியானது.

632. ``அநாதையின் சொத்துக்கு பொறுப்பேற்றவர் அதனை வியாபாரம் (தொழில்) செய்து (பெருக்கி) கொள்ளட்டும். `ஜகாத்' அதனை விழுங்கும் அளவிற்கு விட்டுவிட வேண்டாம்'' என்று இறைத்தூதர்(ஸல்) கூறினார்கள் என அம்ர் இப்னு ஷுஐபு தம் தந்தை மற்றும் பாட்டனார் அப்துல்லாஹ் இப்னு அம்ர்(ரலி) வாயிலாக அறிவித்தார்.
நூல்கள்: திர்மிதீ, தாரகுத்னீ
இதன் அறிவிப்பாளர் தொடர் பலவீனமானது. இதற்குச் சான்றாக இமாம் ஷாஃபியீ(ரஹ்) அவர்களிடம் `முர்ஸல்' தரத்தில் உள்ளது.

634. தம் `ஜகாத்'தை அதன் நேரம் வருவதற்கு முன்பே செலுத்துதல் குறித்து அப்பாஸ்(ரலி) கேட்டார். எனவே, அவ்வாறு செய்வதற்கு அவருக்கு இறைத்தூதர்(ஸல்) அனுமதி வழங்கினார்கள் என்று அலி(ரலி) அறிவித்தார்.
நூல்கள்: திர்மிதீ, ஹாகிம்

636. முஸ்லிமின் மற்றோர் அறிவிப்பில் அபூ சயீத்(ரலி) வாயிலாக, ``ஐந்து `வஸக்' அளவிற்கும் குறைவாக உள்ள பேரீச்சம் பழம் மற்றும் தானியங்களுக்கு `ஜகாத்' இல்லை'' என உள்ளது.

638. ``தானியங்களில் வாற்கோதுமை, கோதுமை, திராட்சை, பேரீச்சை ஆகியவற்றைத் தவிர்த்து வேறு எந்த வேளாண்மைக்கும் `ஜகாத்' வாங்க வேண்டாம்'' என்று இறைத்தூதர்(ஸல்) கூறினார்கள் என அபூ மூஸா அல் அஷ்அரீ(ரலி) மற்றும் முஆத்(ரலி) அறிவித்துள்ளார்கள்.
நூல்கள்: தப்ரானீ, ஹாகிம்
குறிப்பு: கோதுமையில் மட்டும்தான் ஜகாத் கடமை அரிசியில் இல்லை என இதைக் கருதவேண்டாம். தானிய வகைகள் அனைத்திற்கும் அவை `ஜகாத்'தின் அளவை அடைந்துவிட்டால் `ஜகாத்' செலுத்தவேண்டும்.

640. ``நீங்கள் (வேளாண்மைப் பொருட்களில் `ஜகாத்') மதீப்பிடு செய்தால், (அவற்றில்) மூன்றில் ஒரு பகுதியை விட்டுவிட்டு (மற்றவற்றில் `ஜகாத்'தைப்) பெற்றுக் கொள்ளுங்கள். மூன்றில் ஒரு பங்கை விடாவிட்டாலும் நான்கில் ஒரு பங்கையாவது விட்டுவிடுங்கள்'' என்று இறைத்தூதர்(ஸல்) கட்டளையிட்டார்கள் என ஸஹ்ல் இப்னு அபீ ஹஸ்மா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் திர்மிதீ
இமாம் இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர்.