663. ``அதிகாரம் உள்ளவரிடம் (பொறுப்பாளர், ஆட்சியாளர்கள்) அல்லது தவிர்க்க முடியாத விஷயத்திற்காகவும் தவிர யாசிப்பவனின் யாசகம், அவன் தன் முகத்தில் தானே ஏற்படுத்திக் கொள்ளும் வடுவாகும்'' என்று இறைத்தூதர்(ஸல்) கூறினார்கள் என சமுரா இப்னு ஜுன்துப்(ரலி) அறிவித்தார்.
நூல்: திர்மிதீ
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

665. ``நாங்கள் இருவரும் `ஜகாத்'திலிருந்து (உதவி) பெறுவதற்காக இறைத்தூதர்(ஸல்) அவர்களிடம் சென்றோம். அப்போது, இறைத்தூதர்(ஸல்) எங்களின் பக்கம் பார்வையைத் திருப்பினார்கள்; எங்களை வளமானவர்களாகக் கண்ட அவர்கள், ``நீங்கள் விரும்பினால், நான் உங்களுக்குத் தருகிறேன். ஆனால், இது செல்வந்தர் மற்றும் சம்பாதிக்கும் திறன் உள்ளவர்களுக்கு உரியதன்று'' என்று கூறினார்கள் என இரு நபர்களும் தம்மிடம் கூறினார்கள் என உபைதுல்லாஹ் இப்னு அதீ இப்னு அல் கியார்(ரலி) அறிவித்தார்.
நூல்கள்: அஹ்மத்
இமாம் அபூ தாவூத் மற்றும் இமாம் நஸயீ(ரஹ்) இதனை பலமான ஹதீஸ் எனக் குறிப்பிட்டுள்ளனர்.

667. ``முஹம்மதின் குடும்பத்தாருக்கு `ஜகாத்' தேவையற்றது. ஏனெனில், அது மக்களின் அழுக்கே தவிர வேறில்லை'' (மற்றோர் அறிவிப்பின்படி) ``முஹம்மதுக்கும், முஹம்மதின் குடும்பத்தாருக்கு `ஜகாத்' ஹலால் (அனுமதிக்கப்பட்டது) அல்ல'' என்றும் உள்ளது என அப்துல் முத்தலிப் இப்னு ரபீஆ இப்னு அல்ஹாரிஸ்(ரலி) அறிவித்தார்.
நூல்: முஸ்லிம்
குறிப்பு: இங்கு மக்களின் அழுக்கு எனக் கூறப்பட்டதன் நோக்கம், ஜகாத் மற்றும் தர்மப் பொருள் அசுத்தமானது என்பதல்ல; மாறாக இறைத்தூதர்(ஸல்) அவர்களின் குடும்பத்தாரில் யாரும் அதனை வாங்கக் கூடாது என்பற்காக ஆகும். அவ்வாறு வாங்குவதற்கு அன்று நபி(ஸல்) அனுமதித்திருந்தால், இன்று `ஜகாத்' மற்றும் தர்மப் பொருள்கள் ஏழைகளுக்குப் போய்ச் சேராமல் நபியவர்களின் வாரிசுகளுக்கு மட்டும் போய்ச் சேர்வதற்கான வாய்ப்பு உள்ளது. இதை நபி(ஸல்) தமக்கும் தம் வாரிசுகளுக்கும் தடுத்துக் கொண்டது இதன் காரணமாகவும் இருக்கலாம். அல்லாஹ் மிக அறிந்தவன்.

669. தர்மப் பொருட்களை வசூலிப்பதற்காக பனூ மக்ஸூம் கூட்டத்திலிருந்து ஒருவரை இறைத்தூதர்(ஸல்) நியமித்தார்கள் ``நீயும் என்னுடன் சேர்ந்து கொள்! அதனால் நீ (பலன்) பெறுவாய்!'' என அவர் அபூ ராஃபிவுவிடம் கூறினார்.
``இது குறித்து நபி(ஸல்) அவர்களிடம் நான் கேட்டுக் கொள்கிறேன்'' என அவர் கூறினார். இறைத்தூதர்(ஸல்) அவர்களிடம் வந்து (இது குறித்து) அவர் வினவினார்.
``அடிமையாய் இருந்து விடுதலை செய்யப்பட்டவர் விடுதலை செய்த கூட்டத்தைச் சேர்ந்தவராவார். நிச்சயமாக நமக்கு `ஜகாத்' ஹலால் (அனுமதிக்கப்பட்டது) அல்ல என்று இறைத்தூதர்(ஸல்) கூறினார்கள் என அபூ ராஃபிவு(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ இப்னு மாஜா மற்றும் இப்னு ஹிப்பான்

671. ``ஓரிரு நாள்கள் நோன்புடன் ரமளானை எதிர்கொள்ளாதீர்கள்! ஒருவர் (வழக்கமாக) வேறு நோன்பு நோற்பவராய் இருப்பின் அவர் நோற்கட்டும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

673. ``நீங்கள் அதை (பிறையை) பார்த்து நோன்பு நோற்றுக் கொள்ளுங்கள். இன்னும், அதை (பிறையை) பார்த்து நோன்பைத் துறந்து கொள்ளுங்கள். உங்கள் மீது மேகம் சூழ்ந்திருந்தால் அதற்குரிய (மாதத்திற்குரிய நாள்களைக்) கணக்கிட்டுக் கொள்ளுங்கள்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
``உங்களுக்கு மேகமூட்டதால் ஐயம் ஏற்படுமாயின் அதற்குரிய (அந்த மாதத்திற்குரிய நாள்களை) முப்பதாகக் கணக்கிட்டுக் கொள்ளுங்கள்'' என முஸ்லிமிலும், ``முப்பது நாள்களை முழுமையாக்கிக் கொள்ளுங்கள்'' என புகாரீயிலும் உள்ளது.

675. மக்கள் பிறையைப் பார்த்தார்கள். எனவே, நானும் உறுதியாக அதைப் பார்த்தேன் என இறைத்தூதர்(ஸல்) அவர்களுக்குச் செய்தி கொடுத்தேன். எனவே, இறைத்தூதர்(ஸல்) நோன்பு நோற்றார்கள். மக்களையும் நோன்பு நோற்குமாறு கட்டளையிட்டார்கள் என இப்னு உமர்(ரலி) அறிவித்தார்.
நூல்: அபூ தாவூத்
இமாம் ஹாகிம் மற்றும் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுளளனர்.

677. ``ஃபஜ்ர் தொழுகைக்கு முன்னர் நோன்பிற்கான நிய்யத் (எண்ணம்) கொள்ளாதவருக்கு நோன்பு இல்லை'' என்று இறைத்தூதர்(ஸல்) கூறினார்கள் என இறைநம்பிக்கையாளர்களின் அன்னை ஹஃப்ஸா(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இமாம் திர்மிதீ மற்றும் நஸயீ(ரஹ்) இதனை `மவ்கூஃப்' எனக் குறிப்பிட்டுள்ளனர். இமாம் இப்னு குஸைமா மற்றும் இமாம் இப்னு ஹிப்பான்(ரஹ்) இதனை `மர்ஃபூஃ' தரமுள்ள `ஸஹீஹ்' எனக் குறிப்பிட்டுள்ளனர்.
``இரவில் (நோன்பிற்கான) நிய்யத் செய்யாதவருக்கு நோன்பு இல்லை' எனும் வாசகம் தாரகுத்னீயில் உள்ளது.

679. ``நோன்பு துறப்பதை (சூரியன் மறைந்ததும்) விரைவுபடுத்தும் வரை மக்கள் நன்மையில் நிலைத்திருப்பார்கள்'' என்று இறைத்தூதர்(ஸல்) கூறினார்கள் என ஸஹ்ல் இப்னு சஅத்(ரலி) அறிவித்தார்.
நூல்கள்: புகாரீ, முஸ்லிம்

681. ``ஸஹர் உணவு உண்ணுங்கள்! ஏனெனில், அதில் பரக்கத் (அருள்வளம்) உள்ளது'' என்று இறைத்தூதர்(ஸல்) கூறினார்கள் என அனஸ் இப்னு மாலிக்(ரலி) அறிவித்தார்.
நூல்கள்: புகாரீ, முஸ்லிம்