683. தொடர் நோன்பு நோற்க வேண்டாம் என இறைத்தூதர்(ஸல்) தடைசெய்தார்கள். அப்போது, முஸ்லிம்களில் ஒருவர், ``இறைத்தூதர் அவர்களே! தாங்கள் தொடர் நோன்பு நோற்கிறீர்களே?'' என வினவினார்.
``உங்களில் யார் என்னைப் போன்றுள்ளார்? என் இறைவன் எனக்கு உணவளிக்கிறான். நீர் புகட்டுகிறான்'' எனக் கூறினார்கள்.
தொடர் நோன்பைக் கைவிட அவர்கள் மறுத்தபோது, இறைத்தூதர்(ஸல்) அவர்களுடன் சேர்ந்து ஒரு நாள் தொடர் நோன்பு நோற்றார்கள். மறுநாளும் நோற்றார்கள். பின்னர், பிறையைக் கண்டார்கள். அப்போது, ``பிறை தெரியத் தாமதமாகி இருந்தால் நான் இன்னும் அதிகமாக உங்களை நோன்பு நோற்கச் செய்திருப்பேன்'' என்று அவர்கள் தொடர் நோன்பை கைவிட மறுத்ததைக் கண்டித்ததைப் போல் கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

685. இறைத்தூதர்(ஸல்) நோன்பு நோற்ற நிலையில் (தம் மனைவியை) முத்தமிடுவார்கள். மேலும், நோன்பு நோற்ற நிலையில் கட்டியணைப்பார்கள். ஆனால், அவர்கள் தம் இச்சையைக் கட்டுப்படுத்திக் கொள்ளும் ஆற்றல் மிக்கவராய் இருந்தார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது. மற்றோர் அறிவிப்பில், இது ரமளானில் என உள்ளது.

687. பகீஃ எனும் இடத்தில், ரமளான் மாதத்தில் இரத்தம் குத்தி எடுத்துக் கொண்டிருந்த ஒருவரிடம் வந்த இறைத்தூதர்(ஸல்), ``இரத்தம் குத்தி எடுப்பவரும், எடுக்கப்படுபவரும் நோன்பை முறித்துக் கொண்டார்'' என்று கூறினார்கள் என ஷத்தாத் இப்னு அவ்ஸ்(ரலி) அறிவித்தார்.
நூல்கள்: அஹ்மத், அபூ , தாவூத், நஸயீ மற்றும் இப்னு மாஜா
இமாம் அஹ்மத், இமாம் இப்னு குஸைமா மற்றும் இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர்.

689. இறைத்தூதர்(ஸல்) ரமளான் மாதத்தில் நோன்பு நோற்ற நிலையில் சுர்மா போட்டுக் கொண்டார்கள் என ஆயிஷா(ரலி) அறிவித்தார்.
இமாம் இப்னு மாஜா(ரஹ்) இதனை, அறிவிப்பாளர் தொடர் `ளயீஃப்' எனக் குறிப்பிட்டுள்ளார்.
இது தொடர்பான எந்த ஹதீஸும் ஆதாரப்பூர்வமானது அல்ல என இமாம் திர்மிதீ(ரஹ்) குறிப்பிட்டுள்ளார்.

691. ``ரமளான் மாதத்தில் மறதியாக நோன்பை முறித்தவர் மீது களாவும் (திரும்ப நோன்பு நோற்பது) இல்லை; பரிகாரமும் இல்லை'' என ஹாகிமில் உள்ளது. இது `ஸஹீஹ்' எனும் தரத்திலும் உள்ளது.

693. மக்கா வெற்றி கொண்ட ஆண்டில் ரமளான் மாதத்தில் மக்காவை நோக்கி இறைத்தூதர்(ஸல்) புறப்பட்டார்கள். அப்போது `குரா உல் கமீம்' எனும் இடத்தை அடையும் வரை நோன்பு நோற்றார்கள். மக்களும் நோன்பு நோற்றார்கள். பின்னர், இறைத்தூதர்(ஸல்) ஒரு செம்பில் தண்ணீர் கொண்டு வரச்செய்து அதனை உயர்த்தினார்கள். மக்கள் அனைவரும் அதனைப் பார்த்தனர். இறைத்தூதர்(ஸல்) அதனைக் குடித்தார்கள். அதற்குப் பின்னரும் சிலர் நோன்பு நோற்றவர்களாகவே உள்ளனர் என்ற செய்தி அவர்களிடம் சொல்லப்பட்டது. அதற்கு ``அவர்கள் பாவிகள்! அவர்கள் பாவிகள்!'' என இறைத்தூதர்(ஸல்) கூறினார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: முஸ்லிம்

695. ``இறைத்தூதர் அவர்களே! நான் பயணத்திலும் நோன்பு நோற்கும் ஆற்றல் பெற்றவனாய் இருக்கிறேன். அதனால் என் மீது குற்றமாகுமா?'' என நான் வினவினான்.
``இது அல்லாஹ்விடமிருந்து வந்துள்ள சலுகையாகும். அதனை எடுத்துக் கொண்டவர் சிறப்படைந்தார். இன்னும், நோன்பு நோற்க விரும்பியவர் மீது குற்றமில்லை'' என்று இறைத்தூதர்(ஸல்) கூறினார்கள் என ஹம்ஸா இப்னு அம்ர் அல் அஸ்லமீ(ரலி) அறிவித்தார்.
நூல்: முஸ்லிம்
ஹம்ஸா இப்னு அம்ர்(ரலி) இவ்வாறு) வினவினார் என்றும் ஆயிஷா(ரலி) இவ்வாறு பதிலளித்தார் என்றும் புகாரீ மற்றும் முஸ்லிமில் உள்ளது.

697. இறைத்தூதர்(ஸல்) அவர்களிடம் ஒருவர் வந்து, ``இறைத்தூதர் அவர்களே! நான் அழிந்துவிட்டேன்'' எனக் கூறினார்.
``எது உன்னை அழித்தது?'' என இறைத்தூதர்(ஸல்) வினவினார்கள்.
``ரமளானில் (நோன்பு நோற்ற நிலையில்) என் மனைவியுடன் பாலுறவு கொண்டுவிட்டேன்'' என அவர் கூறினார்.
``உன்னால் ஒர் அடிமையை விடுதலை செய்ய இயலுமா?'' என இறைத்தூதர்(ஸல்) வினவினார்கள்.
``இயலாது'' என அவர் கூறினார்.
``அப்படியானால், உன்னால் அறுபது ஏழைகளுக்கு உணவளிக்க இயலுமா?'' என இறைத்தூதர்(ஸல்) வினவினார்கள்.
``இயலாதே'' என அவர் கூறினார்.
பின்னர், (அங்கேயே) அவர் அமர்ந்து கொண்டார். அப்போது, இறைத்தூதர்(ஸல்) அவர்களிடம் ஒரு தட்டு கொடுக்கப்பட்டது. அதில் பேரீச்சம் பழங்கள் இருந்தன. (அதை அவரிடம் வழங்கி) ``இதனை தர்மம் செய்வீராக!'' என இறைத்தூதர்(ஸல்) கூறினார்கள்.
``எங்களைவிட ஏழைகளுக்கா? இந்த மதீனாவிற்குள் எங்களைவிட ஏழைகள் யாரும் இல்லையே?'' எனக் கூறினார்.
அதனைச் செவியுற்ற இறைத்தூதர்(ஸல்) தம் கடைவாய்ப் பற்கள் தெரியுமளவிற்குச் சிரித்தார்கள். பின்னர், ``நீர் சென்று உம் குடும்பத்தாருக்கு இதனை வழங்குவீராக!'' என்று கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், புகாரீ, முஸ்லிம், அபூ தாவூத், நஸயீ, திர்மிதி மற்றும் இப்னு மாஜா.
இங்கு முஸ்லிமின் வாசம் இடம் பெற்றுள்ளது.

699. ``தன் மீது நோன்பு கடமையான நிலையில் இறந்தவரின் நோன்பை அவரின் பொறுப்பாளர் நோற்கட்டும்'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்கள்.
நூல்கள்: புகாரீ, முஸ்லிம்

701. ``ரமளான் மாதத்தின் நோன்பை நோற்றவர், ``பின்னர், அதைத் தொடர்ந்து ஷவ்வால் மாதத்தின் ஆறு நோன்பை நோற்றால், அந்த ஆண்டு முழுவதும் அவர் நோன்பு நோற்றவர் போல் ஆவார்'' என்று இறைத்தூதர்(ஸல்) கூறினார்கள் என அபூ அய்யூப் அல் அன்ஸாரி(ரலி) அறிவித்தார்.
நூல்: முஸ்லிம்