783. இப்னு உமர்(ரலி), முதல் ஜம்ராவில் ஏழு கற்களை எறிவார்கள். ஒவ்வொரு கல் எறிந்த பின்பும் `அல்லாஹு அக்பர்' எனக் கூறுவார்கள். பின்னர், முன்னால் வந்து கிப்லாவை முன்னோக்கி நீண்ட நேரம் சமதளத்தில நின்று; தம் கைகளை உயர்த்தி துஆச் செய்வார்கள். பின்னர், நடுவிலிருக்கும் இரண்டாவது ஜம்ராவின் மீது கல் எறிவார்கள். பின்னர், இடப்பக்கமாகச் சென்று கிப்லாவை முன்னோக்கி, தம் கைகளை உயர்த்தி, நீண்ட நேரம் சமதளத்தில நின்று துஆச் செய்தார்கள். பின்னர், ஜம்ரத்துல் அக்பா'வின் மீது கணவாயில் நின்று கல் எறிந்துவிட்டு அங்கு நிற்காமல் சென்றுவிடுவார்கள். (இவ்வாறு செய்த இப்னு உமர்(ரலி), ``இறைத்தூதர்(ஸல்) இவ்வாறு செய்ததை நான் பார்த்துள்ளேன் என அறிவித்தார்.
நூல்: புகாரீ

785. இறைத்தூதர்(ஸல்) ஹஜ்ஜத்துல் வதாஃவில் நின்றிருந்தார்கள். (அப்போது) அவர்களிடம் மக்கள் கேள்வி கேட்க ஆரம்பித்தார்கள். ``எனக்குத் தெரியவில்லை, நான் குர்பானீ கொடுக்கும் முன் மொட்டையடித்துக் கொண்டேன்'' என ஒருவர் கூறினார்.
``குர்பானீ கொடுங்கள் ஒன்றும் குறைவாகாது'' என இறைத்தூதர்(ஸல்) கூறினார்கள்.
பின்னர், மற்றொருவர் வந்து ``எனக்குத் தெரியவில்லை. நான் கல் எறியும் முன்பே குர்பானீ கொடுத்துவிட்டேன்'' எனக் கூறினார்.
``இப்போது எறிந்து கொள் குற்றமில்லை!'' என இறைத்தூதர்(ஸல்) கூறினார்கள்.
முன்னும், பின்னும் செய்யப்பட்ட பல விஷயங்கள் குறித்து இறைத்தூதர்(ஸல்) அவர்களிடம் அன்று கேட்கப்பட்டன. ``குற்றமில்லை'' என்றே அவர்கள் கூறினார்கள் என அப்துல்லாஹ் இப்னு அம்ர் இப்னு ஆஸ்(ரலி) அறிவித்தார்.
நூல்: புகாரீ

787. ``நீங்கள் கல் எறிந்துவிட்டு, மொட்டையடித்துக் கொண்டால், பெண்ணை (உறவு கொள்வதைத்) தவிர்த்து நறுமணம் உட்பட அனைத்தும் ஹலால் ஆகிவிடுகிறது'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: அஹ்மத், அபூ தாவூத்
இதன் அறிவிப்பாளர் தொடர் `ளயீஃப்' எனும் பலவீனமானது.

789. மினாவில் தங்கும் இரவுகளில் (அங்கு தங்காமல்) மக்களுக்கு ஜம்ஜம் தண்ணீர் புகட்டுவதற்காக மக்காவில் தங்குவதற்கு, இறைத்தூதர்(ஸல்) அவர்களிடம் அப்பாஸ் இப்னு அப்தில் முத்தலிப்(ரலி) அனுமதி கேட்டார். எனவே, இறைத்தூதர்(ஸல்) அனுமதித்தார்கள் என உமர்(ரலி) அறிவித்தார்.
நூல்கள்: புகாரீ, முஸ்லிம்

791. குர்பானீ நாளன்று எங்களுக்கு இறைத்தூதர்(ஸல்) உரை நிகழ்த்தினார்கள் என அபூ பக்ரா (ரலி) அறிவித்தார். (ஹதீஸ் சுருக்கம்)
நூல்கள்: புகாரீ, முஸ்லிம்

793. ``இறைஇல்லம் கஅபாவை நீ ஒரு முறை வலம் வருவதும், ஸஃபா மர்வாவுக்கு இடையே ஓடுவதும், உன் ஹஜ் மற்றும் உம்ராவிற்குப் போதுமானது'' என்று இறைத்தூதர்(ஸல்) என்னிடம் கூறினார்கள் என ஆயிஷா(ரலி) அறிவித்தார்.
நூல்: முஸ்லிம்

795. இறைத்தூதர்(ஸல்) முஹஸ்ஸப் எனும் இடத்தில் லுஹர், அஸர், மக்ரிப் மற்றும் இஷா தொழுதார்கள். இன்னும் சிறிதும் நேரம் அங்கு தூங்கினார்கள். பின்னர், தம் வாகனத்தில் ஏறி கஅபத்துல்லாஹ் சென்று தவாஃப் செய்தார்கள் என அனஸ்(ரலி) அறிவித்தார்.
நூல்: புகாரீ

797. ஹஜ்ஜில் இறுதியாக கஅபத்துல்லாஹ்வை தவாஃப் செய்து வரவேண்டும் என கட்டளையிடப்பட்டுள்ளது. ஆனால், மாதவிடாய்ப் பெண்களுக்குச் சலுகை அளிக்கப்பட்டுள்ளது என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

799. இறைத்தூதர்(ஸல்) (உம்ராவிற்குச் சென்றபோது) தடுக்கப்பட்டார்கள். அப்போது அவர்கள் தம் தலையை மழித்துக் கொண்டார்கள். மேலும், தம் மனைவியருடன் கூடினார்கள். மேலும், தம் குர்பானீயை அறுத்தார்கள். பின்னர், மறு ஆண்டு உம்ராச் செய்தார்கள் என இப்னு அப்பாஸ்(ரலி) அறிவித்தார்.
நூல்: புகாரீ

801. ``(இஹ்ராம் கட்டிய நிலையில்) யாருடைய காலேனும் ஒடிக்கப்பட்டால் அல்லது நொண்டியாகிவிட்டால் அவர் இஹ்ராமை விட்டு வெளியாகிவிட்டார். மறு ஆண்டு ஹஜ் செய்வது அவர் மீது கடமையாகும்'' என்று இறைத்தூதர்(ஸல்) கூறினார்கள். ஹஜ்ஜாஜ் இப்னு அம்ரிடமிருந்து இக்ரிமா(ரலி) அறிவித்தார். மேலும் இது குறித்து அபூ ஹுரைரா(ரலி) மற்றும் இப்னு அப்பாஸ்(ரலி) அவர்களிடம் தான் கேட்டதற்கு ஹஜ்ஜாஜ் உண்மையே கூறினார் என்று கூறியதாகவும் அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுள்ளார்.