797. ஹஜ்ஜில் இறுதியாக கஅபத்துல்லாஹ்வை தவாஃப் செய்து வரவேண்டும் என கட்டளையிடப்பட்டுள்ளது. ஆனால், மாதவிடாய்ப் பெண்களுக்குச் சலுகை அளிக்கப்பட்டுள்ளது என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

799. இறைத்தூதர்(ஸல்) (உம்ராவிற்குச் சென்றபோது) தடுக்கப்பட்டார்கள். அப்போது அவர்கள் தம் தலையை மழித்துக் கொண்டார்கள். மேலும், தம் மனைவியருடன் கூடினார்கள். மேலும், தம் குர்பானீயை அறுத்தார்கள். பின்னர், மறு ஆண்டு உம்ராச் செய்தார்கள் என இப்னு அப்பாஸ்(ரலி) அறிவித்தார்.
நூல்: புகாரீ

801. ``(இஹ்ராம் கட்டிய நிலையில்) யாருடைய காலேனும் ஒடிக்கப்பட்டால் அல்லது நொண்டியாகிவிட்டால் அவர் இஹ்ராமை விட்டு வெளியாகிவிட்டார். மறு ஆண்டு ஹஜ் செய்வது அவர் மீது கடமையாகும்'' என்று இறைத்தூதர்(ஸல்) கூறினார்கள். ஹஜ்ஜாஜ் இப்னு அம்ரிடமிருந்து இக்ரிமா(ரலி) அறிவித்தார். மேலும் இது குறித்து அபூ ஹுரைரா(ரலி) மற்றும் இப்னு அப்பாஸ்(ரலி) அவர்களிடம் தான் கேட்டதற்கு ஹஜ்ஜாஜ் உண்மையே கூறினார் என்று கூறியதாகவும் அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் திர்மிதீ(ரஹ்) இதனை `ஹஸன்' எனக் குறிப்பிட்டுள்ளார்.

803. ``மதுபானம், தானாய் இறந்தவை, பன்றி மற்றும் சிலைகள் ஆகியவற்றை விற்பனை செய்வதை இறைவன் தடுத்துவிட்டான்'' என்று இறைத்தூதர்(ஸல்) மக்கா வெற்றி கொள்ளப்பட்ட ஆண்டில் மக்காவில் இருந்தபோது கூறினார்கள்.
``இறைத்தூதர் அவர்களே! தானாய் இறந்தவற்றின் கொழுப்புக் குறித்துக் கூறுங்கள். ஏனெனில், அதைக் கொண்டு படகுகளை வழவழப்பாக்கவும், தோல்களைப் பதப்படுத்தவும் செய்கிறார்கள். இன்னும் மக்கள் அதன் மூலம் விளக்கும் எரிக்கின்றனர்'' என கேட்கப்பட்டது.
``கூடாது. அதுவும் ஹராம் (விலக்கப்பட்டது) ஆகும்'' என இறைத்தூதர்(ஸல்) கூறிவிட்டு, ``யூதர்களை அல்லாஹ் நாசமாக்கட்டும்! அல்லாஹ் அவர்களுக்கு (தானாய் இறந்த) அதன் கொழுப்புகளைத் தடை செய்தபோது, அவர்கள் அதனை உருக்கி விற்றார்கள், அதன் கிரயத்தை உண்டார்கள் என்றும் கூறினார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்கள்: புகாரீ, முஸ்லிம்

805. நாய் விற்ற கிரயத்தையும், விபச்சாரியின் சம்பாத்தியத்தையும், குறிகாரனின் தட்சிணையையும் இறைத்தூதர்(ஸல்) தடை செய்தார்கள் என அபூ மஸ்வூத் அல் அன்ஸாரி(ரலி) அறிவித்தார்.
நூல்கள்: புகாரீ, முஸ்லிம்

807. எங்களில் ஒருவர் தன் அடிமையிடம், ``என் மரணத்திற்குப் பின்பு விடுதலை பெற்றுக் கொள்'' எனக் கூறியிருந்தார். (ஆனால், அவர் கடன்பட்டிருந்தார். எனவே) இறைத்தூதர்(ஸல்) அந்த அடிமையை அழைத்து வரச் செய்து அவனை விற்பனை செய்தார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: புகாரீ, முஸ்லிம்

809. ``நெய்யில் எலி விழுந்துவிட்டால், அது உறைந்ததாக இருந்தால் அதையும் அதைச் சுற்றி உள்ளதையும் (எடுத்து) எறிந்துவிடுங்கள். (மீதத்தைப் பயன்படுத்திக் கொள்ளுங்கள்) அது உறையாததாக இருப்பின் அதனை நெருங்காதீர்கள்`` என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: அஹ்மத், அபூ தாவூத்
இமாம் புகாரீ மற்றும் இமாம் அபூ ஹாதிம்(ரஹ்) இதனை வஹ்ம் எனக் சட்டம் கூறியுள்ளார்கள்.

811. பரீரா என்னிடம் வந்து, ``நான் என் எஜமானனிடம் ஒன்பது ஊக்கியாவின் பேரில் விடுதலைப் பத்திரம் எழுதிக் கொடுத்துதுள்ளேன். ஆண்டு ஒன்றுக்கு ஒரு ஊக்கியோ வீதம் நான் செலுத்த வேண்டும். எனவே, எனக்கு உதவுங்கள்'' எனக் கூறினார்.
``உன் எஜமானன் விரும்பினால், ஒன்பது ஊக்கியாவையும் ஒட்டு மொத்தமாக நான் செலுத்துகிறேன். ஆனால், உன் `வலா' (ஏனைய உரிமைகள்) எனக்குரியதாய் இருக்க வேண்டும். (அப்படியானால்) ``நான் (விடுதலை) செய்கிறேன்'' என நான் கூறினேன்.
பரீரா தன் எஜமானர்களிடம் சென்று இதனைக் கூறினார். ஆனால், அவர்கள் அதனை ஏற்க மறுத்தார்கள். அவர்களிடமிருந்து (பரீரா) என்னிடம் (மீண்டும்) வந்தார். அப்போது, என்னுடன் நபி(ஸல்) அவர்களும் அமர்ந்திருந்தார்கள்.
``இதனை நான் அவர்களிடம் கூறியதற்கு அவர்கள் ஏற்றுக் கொள்ளவில்லை. `வலா' அவர்களுக்கே உரியது என்று கூறுகின்றனர்'' என அவர் (பரீரா) கூறினார்.
அப்போது, இறைத்தூதர்(ஸல்) அதைச் செவியுற்றார்கள். ஆயிஷா(ரலி) அவர்களும் நபி(ஸல்) அவர்களிடம் செய்தியைக் கூறினார்கள்.
``அவரைப் பெற்றுக் கொண்டு, `வலா' உனக்கே உரியது என நிபந்தனையிடு. ஏனெனில், அடிமையை விடுதலை செய்தவருக்கே `வலா' உரியதாகும்'' என இறைத்தூதர்(ஸல்) கூறினார்கள்.
ஆயிஷா(ரலி) அவ்வாறே செய்தார்கள். பின்னர், இறைத்தூதர்(ஸல்) மக்களுக்கு உரை நிகழ்த்த எழுந்தார்கள். அல்லாஹ்வைப் புகழ்ந்துவிட்டு, ``மக்களுக்கு என்னவாகிவிட்டதோ? அவர்கள் அல்லாஹ்வின் சட்டத்தில் இல்லாதவற்றை எல்லாம் நிபந்தனைகளாக முன் வைக்கின்றனர். அல்லாஹ்வின் சட்டத்தில் இல்லாத நிபந்தனைகள் செல்லாதவையே. அவை நூறு நிபந்தனைகளாய் இருப்பினும் சரியே! அல்லாஹ்வின் தீர்ப்பே ஏற்கத் தகுந்ததாகும். இன்னும், அல்லாஹ்வின் நிபந்தனையே உறுதி மிக்கதாகும். இன்னும் `வலா' (அடிமைகளை) விடுதலை செய்பவருக்கே உரியது'' என்று கூறினார்கள்.
நூல்கள்: புகாரீ, முஸ்லிம்
இங்கு புகாரீயின் வாசகம் இடம் பெற்றுள்ளது.
``அவரை வாங்கிக் கொள்! விடுதலை செய்துவிடு! இன்னும், `வலா' உனக்கே உரியது என அவர்களிடம் நிபந்தனையிடு!'' என்று (இறைத்தூதர்(ஸல்) கூறினார்கள் என) முஸ்லிமில் உள்ளது.

813. இறைத்தூதர்(ஸல்) உயிருடன் இருந்தத காலத்தில் எங்கள் அடிமைப் பெண்களை அவர்கள் குழந்தை பெற்றெடுத்திருக்கும் நிலையில் நாங்கள் விற்பனை செய்துள்ளோம். அதனை அவர்கள் குற்றமாகக் கருதவில்லை என ஜாபிர்(ரலி) அறிவித்தார்.
நூல்கள்: நஸயீ, இப்னு மாஜா, தாரகுத்னீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

815. (கால் நடைகளைச் சினைக்குவிடும்போது) ஆண்வர்க்கத்திற்குக் கிரயம் பெறுவதை இறைத்தூதர்(ஸல்) தடைசெய்துள்ளார்கள் என இப்னு உமர்(ரலி) அறிவித்தார்.
நூல்: புகாரீ