876. இறைத்தூதர்(ஸல்) மதீனா வந்தபோது அங்குள்ளவர்கள் பழங்களுக்காக ஓர் ஆண்டு, ஈராண்டு முன் பணம் (ஸலஃப்) பெற்றுக் கொண்டிருந்தனர். அப்போது, ``பழங்களுக்காக முன்பணம் பெறுபவர் குறிப்பிட்ட அளவையில், குறிப்பிட்ட நிலுவையில் குறிப்பிட்ட தவணைக்கு பெற்றுக்கொள்ளட்டும்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்
புகாரீயில், ``யாரேனும் ஒரு பொருளுக்கு முன் தொகை செலுத்தினால் என உள்ளது.

878. ``மக்களின் பொருளை அவர்களிடம் திரும்பச் செலுத்தும் எண்ணத்துடன் வாங்குபவருக்காக அல்லாஹ் அதைச் செலுத்துகிறான். அதனை அழிக்கும் எண்ணத்துடன் வாங்குபவருக்கு, அல்லாஹ் அதனை அழித்துவிடுகிறான்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: புகாரீ
குறிப்பு: திரும்பச் செலுத்தும் எண்ணத்துடன் வாங்குபவருக்கு, அதனைத் திரும்பச் செலுத்துவதற்கான வசதி வாய்ப்பை அல்லாஹ் ஏற்படுத்துகிறான். திரும்பத் தராமல் ஏமாற்ற வேண்டும் என்ற எண்ணத்துடன் வாங்குபவருக்கு அப்பொருளால் கிடைக்க வேண்டிய பலனைக் கிடைக்கவிடால் செய்கிறான். அதனால் அதைத் திரும்பத் தரும் வாய்ப்பை அவர் இழக்கிறார். கொடுத்தவருக்கு அல்லாஹ் வேறு வழிகளில் அவற்றை ஈடுகட்டுவான்.

880. ``அடமானம் வைக்கப்பட்ட கால்நடையில் அதன் செலவிற்குத் தக்கவாறு சவாரி செய்யலாம். இன்னும், பால் தரும் கால்நடையிலிருந்து, அதன் செலவிற்குத் தக்கவாறு பால் (கறந்து) அருந்தலாம். இந்தச் செலவு, சவாரி செய்பவர் மற்றும் பால் அருந்துபவரையே சாரும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்: புகாரீ

882. இறைத்தூதர்(ஸல்) ஒருவரிடம் இளவயது ஒட்டகம் ஒன்றைக் கடனாகப் பெற்றார்கள். அதற்குப் பின்பு அவர்களிடம் `ஜகாத்' ஒட்டகங்கள் வந்தன. (உடனே) அந்த நபருக்கு இளவயது ஒட்டகம் ஒன்றைக் கொடுக்குமாறு என்னிடம் கட்டளையிட்டார்கள். ``அதனைவிட நல்ல ஒட்டகமே உள்ளது'' என நான் கூறினேன்.
``அதையே அவருக்குக் கொடுத்துவிடு! ஏனெனில், அழகிய முறையில் கடனை அடைப்பவர்களே மக்களில் சிறந்தவர்களாகவர்'' என்று இறைத்தூதர்(ஸல்) கூறினார்கள் என அபூ ராஃபிஃ(ரலி) அறிவித்தார்.
நூல்: முஸ்லிம்

884. பைஹகீயில் `ளயீஃப்' எனும் தரத்தில் மேற்கண்ட ஹதீஸிற்குச் சான்றாக ஃபளாலா இப்னு உபைத் வாயிலாக ஒர் அறிவிப்பு உள்ளது.

886. ``திவால் ஆனவரிடம் ஒருவர் தன்னுடைய சொத்தை அப்படியே கண்டால் (அதை எடுத்துக் கொள்ள) அவரே மற்ற அனைவரையும் விட உரிமை பெற்றவராவார்'' என்று இறைத்தூதர்(ஸல்) கூற நான் செவியுற்றேன் என அபூ ஹுரைரா(ரலி) கூற அபூ பக்ர் இப்னு அப்திர் ரஹ்மான் அறிவித்தார்.
நூல்கள்: புகாரீ, முஸ்லிம்

888. எங்களில் ஒருவர் திவாலாகிவிட்டதால் அவர் விஷயமாக நாங்கள் அபூ ஹுரைரா(ரலி) அவர்களிடம் (சட்டம் கேட்க) சென்றோம். இறைத்தூதர்(ஸல்) தீர்ப்பளிப்பளித்தவாறே உங்கள் விஷயத்தில் நான் தீர்ப்பளிப்பேன்'' என அபூ ஹுரைரா(ரலி) கூறினார்கள்.
``ஒருவரின் பொருளுக்கு விலை கொடுக்காமல் அதனை (கடனாக) வாங்கியவர், திவாலானாலோ அல்லது இறந்துவிட்டாலோ, அப்பொருளை எடுத்துக் கொள்ளும் உரிமை விற்றவருக்கே உண்டு'' என்றும் கூறினார்கள் என அம்ர் இப்னு கலதா வாயிலாக அபூ தாவூத் மற்றும் இப்னு மாஜாவில் உள்ளது.
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
மரணம் குறித்த செய்தி மட்டும் `ளயீஃப்' என இமாம் அபூ தாவூத்(ரஹ்) குறிப்பிட்டுள்ளார்.

890. இறைத்தூதர்(ஸல்) அவர்களின் காலத்தில் ஒருவர் வாங்கிய உணவுப் பொருள் (சேதமடைந்து) அவருக்கு நஷ்டம் ஏற்பட்டது. எனவே, அவருக்குக் கடன் அதிகமாகி அவர் திவாலாகிவிட்டார். எனவே, ``அவருக்குத் தர்மம் செய்யுங்கள்'' என்று இறைத்தூதர்(ஸல்) கூறினார்கள். மக்களும் அவருக்கு தர்மம் செய்தார்கள். இருப்பினும், அத்தொகை அவரின் கடனை அடைப்பதற்குப் போதுமானதாய் இல்லை. அதனால், ``கிடைப்பதைப் பெற்றுக் கொள்ளுங்கள். இதனைத் தவிர வேறு எதுவும் உங்களுக்கு இல்லை'' என்று கடன்காரர்களிடம் இறைத்தூதர்(ஸல்) கூறினார்கள் என அபூ ஸயீத் அல்குத்ரீ(ரலி) அறிவித்தார்.
நூல்: முஸ்லிம்

892. உஹுத் போரின்போது நான் இறைத்தூதர்(ஸல்) முன் நிறுத்தப்பட்டேன். அப்போது, எனக்குப் பதினான்கு வயதாக இருந்தது. (எனவே போரில் கலந்து கொள்ள) எனக்கு அனுமதி அளிக்கப்படவில்லை. பின்னர், நான் அகழ் போரின்போது அவர்கள் முன்பு நிறுத்தப்பட்டேன். அப்போது எனக்குப் பதினைந்து வயது. (எனவே போரில் கலந்து கொள்ள) எனக்கு இறைத்தூதர்(ஸல்) அனுமதி அளித்தார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
``நான் பருவமடையும் வரை எனக்கு அனுமதி அளிக்கப்படவில்லை'' என பைஹகீயின் மற்றோர் அறிவிப்பில் உள்ளது.
இமாம் இப்னு குஸைமா(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

894. ``கணவனின் அனுமதி இல்லாமல் ஒரு பெண் அன்பளிப்பு எதுவும் செய்யக் கூடாது'' என்று இறைத்தூதர்(ஸல்) கூறினார்கள் என அம்ர் இப்னு ஷுஐபு தம் தந்தை மற்றும் பாட்டனாரிடமிருந்து அறிவித்தார்.
மற்றோர் அறிவிப்பில், ``கணவன் அவளின் பொறுப்பை ஏற்றிருக்கும்போது பெண்ணின் சொத்தில் அவளின் (தன்னிச்சையான) எந்த நடவடிக்கையும் ஏற்றுக் கொள்ளப்படாது'' என உள்ளது.
இதனை அபூ தாவூத் இப்னுமாஜா, திர்மிதீ, அஹ்மத்(ரஹ்) அனைவரும் பதிவு செய்துள்ளனர். மேலும், இமாம் ஹாகிம(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.