889. ``வசதி இருந்தும் (கடனைத் திரும்பத் தராமல்) தள்ளிப்போடுபவரின் மானம் போகும்படி அவரைக் கண்டிப்பதும் அவரைத் தண்டிப்பதும் அனுமதிக்கப்பட்டுள்ளது'' என்று இறைத்தூதர்(ஸல்) கூறினார்கள் என அம்ர் இப்னு ஷர்யத் தன் தந்தையிடமிருந்து அறிவித்தார்.
நூல்கள்: அபூ தாவூத், நஸயீ
இமாம் புகாரீ(ரஹ்) இதனை முஅல்லக் எனக் குறிப்பிட்டுள்ளார். இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

891. இறைத்தூதர்(ஸல்) முஆத்(ரலி) அவர்களின் சொத்தை (விற்கவோ பயன்படுத்தவோ விடாமல்) நிறுத்தி, அவரின் கடனை அடைப்பதற்காக, அதனை விற்று, (அவரின் கடனை அடைத்து) விட்டார்கள் என கஅப் இப்னு மாலிக்(ரலி) அறிவித்தார்.
நூல்: தாரகுத்னீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இமாம் அபூ தாவூத்(ரஹ்) இதனை ``முர்ஸல்'' என்றும், ``முர்ஸல்'' என்பதே சரியானது என்றும் குறிப்பிட்டுள்ளார்.

893. பனூகுறைழா போரின்போது (யூதர்களான) நாங்கள் நபி(ஸல்) அவர்களின் முன்பு நிறுத்தப்பட்டோம். (எங்களில்) அடிவயிற்று முடி முளைத்தவர்கள் கொல்லப்பட்டனர். முடி முளைக்காதவர்கள் உயிர் பிழைத்துக் கொள்ள விட்டுவிடப்பட்டனர். நான் (அடிவயிற்றில்) முளைக்காதவனாய் இருந்தேன். எனவே, என்னை உயிரோடு விட்டுவிட்டார்கள் என்று அதிய்யா அல் குரழீ(ரலி) அறிவித்தார்கள்.
நூல்: அபூ தாவூத், திர்மிதீ, நஸயீ மற்றும் இப்னு மாஜா
இமாம் இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள். இது இமாம் புகாரீ மற்றும் முஸ்லிம்(ரஹ்) அவர்களின் நிபந்தனைகளுக்கு உட்பட்டதாகும் என இமாம் ஹாகிம்(ரஹ்) கூறியுள்ளார்.

895. மூன்று நபர்களைத் தவிர்த்து மற்றவர்கள் பிறரிடம் (தம் தேவைகளைக்) கேட்பது அனுமதிக்கப்பட்டதல்ல. 1. (கடனுக்குப்) பொறுப்பேற்று, (அதைக் கொடுக்க முடியாமல் தவிக்கும்) ஒருவர் அதனை அடையும் வரை (பிறரிடம்) கேட்பது அனுமதிக்கப்பட்டதாகும். பிறகு கேட்பதை அவர் நிறுத்திக் கொள்வார். 2. ஒருவருக்கு அழிவு ஏதும் ஏற்பட்டு, அதனால் அவர் நாசமடைந்திருந்தால் அவரின் செல்வம் தன் வாழ்க்கையைச் சீரமைத்துக் கொள்ளும் அளவுக்குக் கேட்பது அனுமதிக்கப்பட்டுள்ளது. 3. ஒருவருக்குப் பஞ்சம் (பெரும் நஷ்டம்) ஏற்பட்டு, ``உண்மையில் அவருக்குப் பஞ்சம் ஏற்பட்டுள்ளது'' என அவரின் சமூகத்தாரில் மூன்று போர் சாட்சி அளித்தால் அவரின் பஞ்சம் தீரும் வரை தர்மம் கேட்பது அவருக்கு அனுமதிக்கப்பட்டுள்ளது'' என்று இறைத்தூதர்(ஸல்) கூறினார்கள் என கபீஸா இப்னு முகாரிக்(ரலி) அறிவித்தார்.
நூல்: முஸ்லிம்

897. மேற்கண்ட ஹதீஸே அபூ ஹுரைரா(ரலி) வாயிலாக `ஸஹீஹ்' எனும் தரத்தில் இப்னு ஹிப்பானில் பதிவிடப்பட்டுள்ளது.

899. ``தன் சகோதரரின் மனமார்ந்த ஒப்புதல் இல்லாமல் அவரின் தடியைக் கூட எடுப்பதற்கு எந்த மனிதனுக்கு அனுமதி இல்லை'' என்று இறைத்தூதர்(ஸல்) கூறினார்கள் என அபூ ஹுமைத் அஸ் ஸாயிதீ(ரலி) அறிவித்தார்.
இப்னு ஹிப்பான் மற்றும் ஹாகிம்(ரஹ்) தங்களின் `ஸஹீஹ்' என்ற நூலில் இதனைப் பதிவிட்டுள்ளனர்.

901. ஒருவர் இறந்து விட்டார். நாங்கள் அவரைக் குளிப்பாட்டி, நறுமணம் பூசி, கஃபன் ஆடையிட்டு, இறைத்தூதர்(ஸல்) அவர்களிடம் கொண்டு வந்து அவருக்கு (ஜனாஸா) தொழுகை நடத்துமாறு கோரினோம். அவர்கள் ஓர் அடி (முன்) எடுத்து வைத்துவிட்டு, ``இவர் மீது கடன் ஏதும் உள்ளதா?'' எனக் கேட்டார்கள்.
``இரண்டு தீனார் கடன் உள்ளது'' என நாங்கள் கூறினோம்.
(இதனைக் கேட்ட) அவர்கள் திரும்பிச் செல்ல முற்பட்டார்கள். அப்போது, அபூ கதாதா அந்தக் கடனை, தான் பொறுப்பேற்று, ``அந்த இரண்டு தீனாருக்கும் நான் பொறுப்பேற்கிறேன்'' எனக் கூறினார்.
பின்னர், ``கடன்காரருக்கு உரிமை கிடைத்து விட்டது! இந்த மைய்யித்தும் அதனை விட்டு விலகிக் கொண்டது'' என இறைத்தூதர்(ஸல்) கூறினார்கள். அதற்கவர்,
``ஆமாம்'' எனக் கூறினார்.
உடனே இறைத்தூதர்(ஸல்) அதற்கு (ஜனாஸா) தொழுகை நடத்தினார்கள் என ஜாபிர்(ரலி) அறிவித்தார்.
நூல்கள்: அஹ்மத், அபூ தாவூத் மற்றும் நஸயீ
இமாம் இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

903. ``தண்டனையில் பொறுப்பேற்க அனுமதியில்லை'' என்று இறைத்தூதர்(ஸல்) கூறினார்கள் என அம்ர் இப்னு ஷுஐபு தம் தந்தை மற்றும் பாட்டனார் வாயிலாக அறிவித்தார்.
இமாம் பைஹகீ(ரஹ்) இதனை `ளயீஃப்' எனும் பலவீனமான அறிவிப்புத் தொடருடன் பதிவிட்டுள்ளார்.

905. `நான் இறைத்தூதர்(ஸல்) அவர்களுடன் மக்கா வெற்றிக்கு முன்பு (வியாபாரத்தில்) பங்குதாரராக இருந்தேன். நான் மக்கா வெற்றியன்று இறைத்தூதர்(ஸல்) அவர்களிடம் வந்ததும், ``என் சகோதரரே! என் பங்குதாரரே! வருக!'' என்று கூறினார்கள் என அஸ் ஸாயிப் அல் மக்ஸூமி(ரலி) அறிவித்தார்.
நூல்கள்: அஹ்மத், அபூ தாவூத் மற்றும் இப்னு மாஜா

907. நான் கைபர் செல்ல நாடியபோது இறைத்தூதர்(ஸல்) அவர்களிடம் சென்றேன். அப்போது, ``நீ கைபர் சென்றால், அங்கு என் பொறுப்பாளரிடம் பதினைந்து வஸக் பேரீச்சம்பழம் வாங்கிக் கொள்!'' என்று கூறினார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: அபூ தாவூத்
இமாம் அபூ தாவூத்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.