952. நான் இறைத்தூதர்(ஸல்) அவர்களுடன் ஒரு போரில் இருந்தபோது ``புல், தண்ணீர், நெருப்பு ஆகிய மூன்று பொருட்களில் (உலக) மக்கள் அனைவரும் பங்குதாரர்களாவர். (இதனை யாரும் யாருக்கும் தடை செய்யக்கூடாது)'' என்று அவர்கள் கூறினார்கள் என நபித்தோழர்களில் ஒருவர் அறிவித்தார்.
நூல்கள்: அஹ்மத், அபூ தாவூத்
இதன் அறிவிப்பாளர்கள் பலமானவர்கள்.

954. உமர்(ரலி) அவர்களுக்கு கைபரில் சிறிதளவு நிலம் கிடைத்தது. அது குறித்துக் கேட்பதற்கு அவர் நபி(ஸல்) அவர்களிடம் வந்து, ``இறைத்தூதர் அவர்களே! கைபரில் எனக்குக் கொஞ்சம் நிலம் கிடைத்துள்ளது. இதனைவிடச் சிறந்ததாக ஒரு சொத்தை நான் எப்போதும் பெற்றதில்லை'' எனக் கூறினார்.
``நீ விரும்பினால் அந்த நிலத்தை உன்னிடமே வைத்துக் கொள்! அதில் கிடைப்பவற்றை தர்மம் செய்துவிடு!'' என இறைத்தூதர்(ஸல்) கூறினார்கள்.
எனவே, அந்த நிலத்தை விற்கவோ, அன்பளிப்புச் செய்யவோ, அதில் வாரிசுரிமைப் பெறவோ முடியாது; அதனை ஏழைகளுக்கும், உறவினர்களுக்கும், அடிமைகளுக்கும், அல்லாஹ்வின் பாதையில் போரிடுவோருக்கும், வழிப்போக்கர்களுக்கும் மற்றும் விருந்தினர்களுக்கும் செலவிட வேண்டும்; அதைத் தன் சொத்தாக ஆக்கிக் கொள்ளாத நிலையில் அதன் பொறுப்பாளர்களும், அவர்களின் நண்பர்களும் அதில் உண்பது பாவமாகாது எனும் நிபந்தனையின் பேரில் அதன் வருமானத்தை உமர்(ரலி) தர்மம் செய்தார்கள் என இப்னு உமர்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.
புகாரீயின் மற்றோர் அறிவிப்பில், ``அந்த நிலத்தை வக்ஃப் செய்துவிடுங்கள். அதனை விற்பனை செய்யவோ, அன்பளிப்பாக அளிக்கவோ கூடாது. ஆனால், அதன் விளைச்சலை இறைவழியில் செலவிட வேண்டும்'' என்று இறைத்தூதர்(ஸல்) கூறினார்கள் என உள்ளது.

956. என் தந்தை என்னை இறைத்தூதர்(ரலி) அவர்களிடம் அழைத்துச்சென்று, ``என் இந்த அடிமையை என் இந்த மகனுக்குக் கொடுத்துவிட்டேன்'' எனக் கூறினார்.
``உன் மகன்களில் ஒவ்வொருவருக்கும் இவ்வாறே செய்துள்ளாயா?'' என இறைத்தூதர்(ஸல்) கேட்டார்கள்.
``இல்லை'' என அவர் கூறினார்.
``அப்படியானால் அதைத் திரும்பப் பெற்றுக்கொள்'' என இறைத்தூதர்(ஸல்) கூறினார்கள் என நுஃமான் இப்னு பஷீர்(ரலி) அறிவித்தார்.
மற்றோர் அறிவிப்பில், ``என் தந்தை எனக்கு (அன்பளிப்பாக அடிமையை) அளித்ததற்கு நபி(ஸல்) அவர்களை சாட்சியாக்குவதற்காக அவர்களிடம் சென்றார்.
``நீர் உம் பிள்ளைகளி எல்லோருக்கும் இவ்வாறு செய்துள்ளீரா?'' என அவர்கள் கேட்டார்கள்.
``இல்லை'' என என் தந்தை கூறினார்.
``அல்லாஹ்வை அஞ்சிக்கொள்! உன் பிள்ளைகளுக்கிடையே நியாயமாக நடந்துகொள்!'' என்று இறைத்தூதர்(ஸல்) கூறினார்கள். பின்னர் என் தந்தை அதைத் திரும்பப் பெற்றுக் கொண்டார் என உள்ளது.
நூல்கள்: புகாரீ, முஸ்லிம்
முஸ்லிமின் மற்றோர் அறிவிப்பில் ``நீ என்னைத் தவிர்த்து மற்றவரை சாட்சியாக்கிக் கொள்!'' என இறைத்தூதர்(ஸல்) கூறினார்கள். பின்னர், ``அவர்கள் அனைவருமே உன்னுடன் நல்லவிதமாக நடந்து கொள்ள வேண்டும் என்பதை நீ விரும்புகிறாயா?'' என்றும் இறைத்தூதர்(ஸல்) கேட்டடார்கள்.
`ஏனில்லை' என என் தந்தை கூறினார்.
`` அப்படியானால் நீ இவ்வாறு செய்யாதீர்!'' என இறைத்தூதர்(ஸல்) கூறினார்கள் என்றும் உள்ளது.

958. ``தன் மகனுக்குத் தந்தை கொடுத்த அன்பளிப்பைத் தவிர்த்து, பிறருக்கு, தான் அளித்த அன்பளிப்பைத் திரும்பப் பெறுதல் முஸ்லிமான எந்த ஓர் ஆணுக்கும் அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என இப்னு உமர் மற்றும் இப்னு அப்பாஸ்(ரலி) அறிவித்தார்கள்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா,
இமாம் திர்மிதீ, இப்னு ஹிப்பான் மற்றும் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர்.

960. நபி(ஸல்) அவர்களுக்கு ஒருவர் ஓர் ஒட்டகத்தை அன்பளிப்புச் செய்தார். அதற்காக அவருக்கு இறைத்தூதர்(ஸல்) கைம்மாறு செய்து, ``மகிழ்வுற்றாயா?'' எனக் கேட்டார்கள்.
``இல்லை'' என அவர் கூறினார்.
இறைத்தூதர்(ஸல்) அவருக்கு இன்னும் அதிகப்படியாகக் கொடுத்து, அதிகப்படியாகக் கொடுத்து, ``மகிழ்வுற்றாயா?'' எனக் கேட்டார்கள்.
``இல்லை'' என அவர் கூறினார்.
இறைத்தூதர்(ஸல்) அவருக்கு இன்னும் அதிகமாகக் கொடுத்து, ``(இப்போது) மகிழ்வுற்றாயா?'' எனக் கேட்டார்கள்.
``ஆம்'' என்று அப்போது கூறினார் என இப்னு அப்பாஸ்(ரலி) அறிவித்தார்.
நூல்: அஹ்மத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

962. அல்லாஹ்வின் பாதையில் அவர் சவாரி செய்து கொள்வதற்காக ஒருவருக்கு நான் குதிரை ஒன்றைக் கொடுத்தேன். ஆனால், அவர் அதனை வீணடித்து (குறைந்த விலைக்கு விற்க முற்பட்டு) விட்டார். அவர் அதைக் குறைந்த விலைக்கு விற்றுவிடுவார் என நான் எண்ணியதால் அதனை நானே வாங்கிக் கொள்வது குறித்து இறைத்தூதர்(ஸல்) அவர்களிடம் நான் கேட்டேன்.
``அவர் ஒரு திர்ஹத்திற்கேனும் அதனை விற்றாலும் அதனை நீ வாங்காதே!'' என்று கூறினார்கள் என உமர்(ரலி) அறிவித்தார். (ஹதீஸ் சுருக்கம்)
நூல்கள்: புகாரீ, முஸ்லிம்.
குறிப்பு: இந்த ஹதீஸை முழுமையாக அறிந்திட காண்க: புகாரீ ஹதீஸ் எண் 2623

964. ``நீங்கள் ஒருவருக்கொருவர் அன்பளிப்புச் செய்து கொள்ளுங்கள். ஏனெனில், அது உங்கள் மனக்குறைகளை அகற்றிவிடும்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
பலவீனமான அறிவிப்பாளர் தொடருடன் இதனை இமாம் பஸ் ஸார்(ரஹ்) பதிவிட்டுள்ளார்.

966. ``அன்பளிப்புச் செய்தவருக்கு பதில் (அன்பளிப்பு) அளிக்கப்படாதவரை அவரிடம் (அன்பளிப்புப் பெற்றவரிடம்) அவர் (அன்பளிப்புச் செய்தவர்) அதிகம் உரிமை பெற்றுள்ளார்'' என்று இறைத்தூதர்(ஸல்) கூறினார்கள் என இப்னு உமர்(ரலி) அறிவித்தார்.
நூல்: ஹாகிம்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
இதனை உமர்(ரலி) அவர்களிடமிருந்து இப்னு உமர்(ரலி) அறிவித்தார் என்பதே சரியானது.

968. ஒருவர் நபி(ஸல்) அவர்களிடம் வந்து (வழியில்) கண்டெடுக்கும் பொருட்கள் குறித்து வினவினார். ``அதன் பை மற்றும் சுருக்கிடும் கயிற்றை அறிவிப்புச் செய்து, பின்னர் ஓராண்டு காலம் காத்திரு! அந்தப் பொருளுக்குரியவர் வந்து விட்டால் அது அவருக்கே உரியதாகும். இல்லையெனில், அதனை நீ பயன்படுத்திக் கொள்!'' என்று இறைத்தூதர்(ஸல்) கூறினார்கள்.
பின்னர், ``காணாமல் போன ஆடு?'' குறித்து அவர் கேட்டார். ``அது உனக்கு அல்லது உன் சகோதரனுக்கு அல்லது ஓநாய்க்குரியதாகும்'' என்று இறைத்தூதர்(ஸல்) கூறினார்கள்.
பின்னர், ``காணாமல் போன ஒட்டகம்?'' குறித்து அவர் கேட்டார்.
``உனக்கும் அதற்கும் என்ன சம்பந்தம்? அதனுடன் அதன் வயிறும் கால்களும் இருக்கின்றன. அதனை அதன் எஜமானன் காணும் வரை அது தண்ணீரைப் பருகிக் கொண்டும், மரங்களைத் தின்று கொண்டும் திரியும்'' என்று இறைத்தூதர்(ஸல்) கூறினார்கள் என ஸைத் இப்னு ஃகாலித் அல் ஜுஹனீ(ரலி) அறிவித்தார்.
நூல்கள்: புகாரீ, முஸ்லிம்

970. ``ஒரு பொருளைக் கண்டெடுத்தவர் அதற்கு நீதமான இரண்டு சாட்சிகளை நியமித்துக் கொள்ளட்டும். இன்னும், அதன் பை மற்றும் கயிற்றை நினைவில் வைக்கட்டும். அதனை அவர் மறைக்கவோ - ஒழிக்கவோ கூடாது. அதன் உரிமையாளர் வந்துவிட்டால், அவரே அதில் முன்னுரிமை பெறுகிறார். அதன் உரிமையாளர் யாரும் வராதபட்சத்தில், அது அல்லாஹ்வின் சொத்தாகும். அவன் அதனை விரும்பியவருக்கு அளிக்கிறான்'' என்று இறைத்தூதர்(ஸல்) கூறினார்கள் என இயாள் இப்னு ஹிமார்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் இப்னு மாஜா.
இமாம் இப்னு குஸைமா, இமாம் இப்னுல் ஜாரூத் மற்றும் இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.