959. இறைத்தூதர்(ஸல்) அன்பளிப்பைப் பெற்றுக் கொண்டும், அதற்குக் கைம்மாறு செய்து கொண்டும் இருந்தார்கள் என ஆயிஷா(ரலி) அறிவித்தார்.
நூல்: புகாரீ

961. ``ஆயுட்கால அன்பளிப்புச் செய்யப்பட்டவருக்கே அந்த அன்பளிப்பு உரியதாகும்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்கள்: புகாரீ, முஸ்லிம்.
முஸ்லிமின் மற்றோர் அறிவிப்பில், ``நீங்கள் உங்களுக்காக உங்கள் சொத்துக்களை இருப்பில் (வைத்து) கொள்ளுங்கள். அதனை வீணடித்து விடாதீர்கள். ஏனெனில், யாருக்கேனும் ஆயுட்கால அன்பளிப்பு (`உம்றா') கொடுக்கப்பட்டால், அவர் உயிர் வாழும் வரை, அது அவருக்கும், அவர் இறந்தப் பின்னர் அவரின் சந்ததிகளுக்கும் உரியதாகும்'' என உள்ளது.
மற்றோர் அறிவிப்பின்படி, ``இது உனக்கும் உன் சந்ததினருக்குமாகும்'' எனக் கூறி, அன்பளிப்புச் செய்யும் உம்றா எனும் ஆயுட்கால அன்பளிப்பையே இறைத்தூதர்(ஸல்) அனுமதித்தார்கள். ``நீ உயிர் வாழும் காலம் வரை இது உனக்குரியது என ஒருவர் (தெளிவாக) கூறி அன்பளிப்புச் செய்திருந்தால், அது உரிமையாளரிடமே திரும்பச் சென்று சேர்ந்துவிடும்.
அபூ தாவூத் மற்றும் நஸயீயின் மற்றோர் அறிவிப்பின்படி ``நீங்கள் ருக்பா, உம்றா, செய்யாதீர்கள். ஏனெனில், ருக்பா, உம்றா' செய்யக்கூடிய பொருள் யாருக்கு (அன்பளிப்பு) செய்யப்படுகிறதோ, அவரின் சந்ததியினருக்கே உரியதாகும்'' என உள்ளது.

963. `` நீங்கள் ஒருவருக்கொருவர் அன்பளிப்புச் செய்து, உங்களுக்கிடையே அன்பை அதிகரித்துக் கொள்ளுங்கள்!'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
இது இமாம் புகாரீ(ரஹ்) அவர்களின் `அல் அதபுல் முப்ஃரத்'' எனும் நூலிலும் பதிவாகியுள்ளது. `அபூ யஃலா' எனும் நூலில் ``ஹஸன்'' எனும் தரத்தில் பதிவிடப்பட்டுள்ளது.

965. ``முஸ்லிம் பெண்களே! ஒருவருக்கு அவரின் அண்டைவீட்டார் ஆட்டுக் காலின் குளம்பைக் கொடுத்தாலும் அதனை இழிவாகக் கருதவேண்டாம்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

967. வழியில் (கீழே கிடந்த) ஒரு பேரீச்சம் பழத்தை இறைத்தூதர்(ஸல்) கடந்து சென்றபோது, ``இது தர்மப் பொருளாக இருக்கக் கூடும் என நான் அஞ்சவில்லை என்றால், இதனை நான் சாப்பிட்டிருப்பேன்'' என்று கூறினார்கள் என அனஸ்(ரலி) அறிவித்தார்.
நூல்கள்: புகாரீ, முஸ்லிம்.

969. ``காணாமல் போன கால்நடைக்கு அபயம் அளித்தவர் அதனை (பகிரங்கமாக) அறிவிக்காத வரை வழிகேட்டில் உள்ளவராவார்'' என்று இறைத்தூதர்(ஸல்) கூறினார்கள் என ஸைத் இப்னு ஃகாலித் அல் ஜுஹனீ(ரலி) அறிவித்தார்.
நூல்: முஸ்லிம்

971. ஹாஜிகள் தவறவிட்டபொருட்களை (மக்கா நகர அரசு ஊழியர்கள் தவிர) பிறர் எடுப்பதை இறைத்தூதர்(ஸல்) தடை செய்தார்கள் என அப்துர் ரஹ்மான் இப்னு உஸ்மான்(ரலி) அறிவித்தார்.
நூல்: முஸ்லிம்

973. ``வாரிசுகளுக்கு அவர்களுக்குரிய பங்கை கொடுத்துவிடுங்கள். அதில் மீதம் இருப்பவற்றை (இறந்தவரின்) நெருங்கிய உறவுக்கார ஆணுக்குக் கொடுங்கள்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: புகாரீ, முஸ்லிம்

975. மூன்றில் இரண்டு பங்கை முழுமையாக்குவதற்காக, (இறந்தவரின்) மகளுக்கு அரைப் பங்கையும், (இறந்தவரின்) மகன் வழிப் பேத்திக்கு ஆறில் ஒரு பங்கையும் கொடுக்க வேண்டும். அதில் மீதம் உள்ளது (இறந்தவரின்) சகோதரிக்கு உரியதாகும் என்று இறைத்தூதர்(ஸல்) தீர்ப்பு அளித்தார்கள் என இப்னு மஸ்வூத்(ரலி) அறிவித்தார்.
நூல்: புகாரீ

977. ஒருவர் இறைத்தூதர்(ஸல்) அவர்களிடம் வந்து, ``என் மகன் வழிப் பேரன் இறந்துவிட்டான். அவனுடைய சொத்தில் எனக்குரிய பங்கு என்ன?'' எனக் கேட்டார்.
``ஆறில் ஒரு பங்கு உனக்குரியது'' என இறைத்தூதர்(ஸல்) கூறினார்கள்.
அவர் திரும்பிச் சென்றபோது அவரை (மறுபடியும்) அழைத்து, ``உனக்கு மற்றும் ஓர் ஆறில் ஒரு பங்கு உண்டு'' எனக் கூறினார்கள்.
பின்னர், (அவர் மறுபடியும்) திரும்பிச் சென்றார். இறைத்தூதர்(ஸல்) அவரை (மறுபடியும்) அழைத்து, ``இந்த மற்றோர் ஆறில் ஒரு பங்கு உனக்கு அதிகப்படியாகக் கிடைப்பதாகும்'' என்று இறைத்தூதர்(ஸல்) கூறினார்கள் என இம்ரான் இப்னு ஹுசைன்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இமாம் திர்மிதீ(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
இது ஹஸன் பஸரி வாயிலாக இம்ரானிடமிருந்து அறிவிக்கப்பட்டுள்ளது. ஆனால், இம்ரான்(ரலி) அவர்களிடமிருந்து ஹஸன் பஸரி(ரஹ்) ஹதீஸ் களைச் செவுயுற்றதற்கு ஆதாரமில்லை எனக் கூறப்படுகிறது.