2:115. கிழக்கும், மேற்கும், அல்லாஹ்வுக்கே (சொந்தம்); நீங்கள் எந்தப் பக்கம் திரும்பினாலும் அங்கே அல்லாஹ்வின் முகம் இருக்கிறது; நிச்சயமாக அல்லாஹ் விசாலமானவன்; எல்லாம் அறிந்தவன்.

2:148. ஒவ்வொரு (கூட்டத்த)வருக்கும், (தொழுகைக்கான) ஒரு திசையுண்டு; அவர்கள் அதன் பக்கம் திரும்புபவர்களாக உள்ளனர்; நன்மைகளின்பால் நீங்கள் முந்திக்கொள்ளுங்கள்; நீங்கள் எங்கு இருப்பினும் அல்லாஹ் உங்கள் யாவரையும் கொண்டுவருவான்; நிச்சயமாக அல்லாஹ் எல்லாப் பொருட்களின் மீதும் ஆற்றல் மிக்கோனாக இருக்கிறான்.

14:17. அதை அவன் (சிரமத்தோடு) சிறிது சிறிதாக விழுங்குவான்; எனினும், அதை அவன் எளிதாக விழுங்கமாட்டான்: ஒவ்வொரு திசையிலிருந்தும் அவனுக்கு மரணம் வந்துகொண்டிருக்கும்; எனினும், அவன் இறந்துவிடுபவனும் அல்லன்: அன்றியும், அவன் முன்னே (மிகக்) கொடிய வேதனையுமுண்டு.

18:86. சூரியன் மறையும் (மேற்குத்) திசைவரை அவர்கள் சென்றடைந்தபோது, அது ஒரு சேறு கலந்த நீரில் (மூழ்குவது போல்) மறையக் கண்டார்; இன்னும், அவர் அவ்விடத்தில் ஒரு சமூகத்தினரையும் கண்டார்; "துல்கர்னைனே! நீர் இவர்களை(த் தண்டித்து) வேதனை செய்யலாம்; அல்லது அவர்களுக்கு அழகிய நன்மை செய்யலாம்" என்று நாம் கூறினோம்.

18:90. அவர் சூரியன் உதயமாகும் (கிழக்குத்) திசையை அடைந்தபோது, அது ஒரு சமூகத்தாரின் மீது உதயமாகி (அவர்கள் வெயிலில்) இருப்பதைக் கண்டார்; அதனை விட்டுக் (காத்துக் கொள்ளும்) எந்தத் தடுப்பையும் அவர்களுக்கு நாம் ஏற்படுத்தவில்லை.

24:35. அல்லாஹ் வானங்கள், பூமி ஆகியவற்றின் ஒளியாக இருக்கிறான்; அவனுடைய ஒளிக்கு உதாரணம்: ஒரு மாடத்தைப் போன்றிருக்கிறது: அதில் ஒரு விளக்கு இருக்கிறது; அவ்விளக்கு ஒரு கண்ணாடியினுள் இருக்கிறது; அக்கண்ணாடி ஒளிவீசும் நட்சத்திரத்தைப் போன்றதாகும்; அது பாக்கியம் பெற்ற ஜைத்தூன் மரத்தி(ன் எண்ணெயி)னால் எரிக்கப்படுகிறது; அது கீழ்த்திசையைச் சேர்ந்ததுமன்று: மேல்திசையைச் சேர்ந்ததுமன்று; அதனை நெருப்புத் தீண்டாவிடினும், அதன் எண்ணெய் ஒளிவீச முற்படும்; (இவை எல்லாம் சேர்ந்து) ஒளிக்கு மேல் ஒளியாகும்: அல்லாஹ் தான் நாடியவரை தன்னுடைய ஒளி (என்னும் சத்தியப்பாதை)யின்பால் நடத்திச் செல்கிறான்; மனிதர்களுக்கு (இத்தகைய) உதாரணங்களை அல்லாஹ் கூறுகிறான்; அல்லாஹ் யாவற்றையும் நன்கு அறிபவன்.

37:5. வானங்களுக்கும், பூமிக்கும், இவ்விரண்டிற்கும் இடையே உள்ளவற்றுக்கும் (அவனே) இறைவன்; மேலும், கீழ்த்திசைகளின் இறைவன்.

37:8. (அதனால்) அவர்கள் மேலான கூட்டத்தார்பால் (பேச்சை ஒளிந்து) கேட்கமாட்டார்கள்; இன்னும், அவர்கள் ஒவ்வோர் திசையிலிருந்தும் வீசி எறியப்படுகிறார்கள்.

43:38. இறுதியாக நம்மிடம் வரும்போது (ஷைத்தானிடம்): "ஆ! எனக்கிடையிலும், உனக்கிடையிலும் கிழக்குத் திசைக்கும் மேற்குத் திசைக்கும் இடையேயுள்ள தூரம் இருந்திருக்க வேண்டுமே! (எங்களை வழிகெடுத்த) இந்த நண்பன் மிகவும் கெட்டவன்" என்று கூறுவான்.

55:17. இரு கீழ்த்திசைகளுக்கும் இறைவன் அவனே; இரு மேல்திசைகளுக்கும் இறைவன் அவனே.

70:40. எனவே, கிழக்குத் திசைகள், மேற்குத் திசைகள் ஆகியவற்றின் இறைவன் மீது சத்தியமாக! நிச்சயமாக நாம் (விரும்பியவாறு செய்ய) ஆற்றலுடையோம்.