2:178. நம்பிக்கை கொண்டோரே! கொலைக்காகப் பழிதீர்ப்பது உங்கள்மீது விதிக்கப்பட்டுள்ளது - சுதந்திரமுடையவனுக்குச் சுதந்திரமுடையவன்; அடிமைக்கு அடிமை, பெண்ணுக்குப் பெண்; இருப்பினும் (கொலை செய்த) அவனுக்கு அவனது சகோதரனால் (ஆகிய கொலையுண்டவனின் வாரிசுகளால்) ஏதும் மன்னிக்கப்படுமானால், வழக்கமான முறையைப் பின்பற்றி (இதற்காக நிர்ணயிக்கப்பெறும் நஷ்டஈட்டை) பெருந்தன்மையுடன் அவன்பால் செலுத்திவிட வேண்டும் - இது உங்கள் இறைவனிடமிருந்து கிடைத்த சலுகையும் கிருபையுமாகும்; ஆகவே, இதன் பிறகு (உங்களில்) யார் வரம்புமீறுகிறாரோ, அவருக்குத் துன்புறுத்தும் வேதனையுண்டு.

2:179. அறிவுடையோரே! (கொலைக்குப்) பழி வாங்குவதில் உங்களுக்கு வாழ்வுண்டு; (இத்தகைய குற்றம் பெருகாமல்) நீங்கள் உங்களை(த் தீமைகளிலிருந்து) காத்துக்கொள்ளலாம்.

2:194. (போர் செய்வது விலக்கப்பட்டுள்ள ரஜப், துல்கஃதா, துல்ஹஜ், முஹர்ரம் ஆகிய) புனித மாதத்திற்குப் புனித மாதமே ஈடாகும்; புனிதமாக்கப்பட்டவை (அவற்றின் கண்ணியம் எவராலும் சீர் குலைக்கப்பட்டால் அவரிடம்) பழிவாங்கப்படும்; ஆகவே, எவனாவது (அம்மாதத்தில்) உங்களுக்கு எதிராக வரம்பு மீறினால், உங்கள்மேல் அவன் எவ்வளவு வரம்பு மீறியுள்ளானோ, அதே அளவு நீங்கள் அவன் மேல் வரம்புமீறுங்கள். அல்லாஹ்வைப் பயந்து கொள்ளுங்கள்; நிச்சயமாக அல்லாஹ் இறையச்சமுடையோருடன் இருக்கின்றான் என்பதை அறிந்துகொள்ளுங்கள்.

5:45. அவர்களுக்கு நாம் அதில், "உயிருக்கு உயிர், கண்ணுக்குக் கண், மூக்குக்கு மூக்கு, காதுக்குக் காது, பல்லுக்குப் பல் ஆகவும், காயங்களுக்கு(ச் சமமான காயங்களாகவும்) பழிவாங்கப்படும்" என்று விதித்திருந்தோம்; எனினும், ஒருவர் இதனை (பழி வாங்குவதை மன்னித்து) தர்மமாக விட்டுவிட்டால், அது அவரு(டைய பாவங்களு)க்குப் பரிகாரமாகும்; எவர்கள் அல்லாஹ் இறக்கிவைத்த (வேதக் கட்டளைப்)படி தீர்ப்பு வழங்கவில்லையோ - நிச்சயமாக அவர்கள்தாம் அநியாயக்காரர்கள்.

16:126. (நம்பிக்கையாளர்களே!) நீங்கள் தண்டிப்பதாக இருந்தால், எந்த அளவிற்கு நீங்கள் தண்டிக்கப்பட்டீர்களோ, அதுபோன்ற அளவுக்கே நீங்களும் தண்டியுங்கள்; நீங்கள் பொறுத்துக்கொண்டால் நிச்சயமாக அதுவே பொறுமையாளர்களுக்கு மிக்க மேன்மையானதாகும்.