1155. ``அடிமைப் பெண்ணின் தலாக் இரண்டாகும். அவளின் இத்தா காலம் இரண்டு மாதவிடாயாகும்'' என இப்னு உமர்(ரலி) கூறினார்.
இது `மர்ஃபூஃ' மற்றும் `ளயீஃப்' எனும் தரத்தில் தாரகுத்னீயில் பதிவிடப்பட்டுள்ளது.

1157. ``தன் தண்ணீரை அந்நியனின் பயிரில் பாய்ச்சுவது (கர்ப்பமுற்றிருக்கும் பெண் போர்க் கைதியுடன் அல்லது அடிமைப் பெண்ணுடன் பாலுறவு கொள்வது) அல்லாஹ்வையும் இறுதிநாளையும் நம்புகிற எந்த ஆணுக்கும் அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என ருவைஃபி இப்னு ஸாபித்(ரலி) அறிவித்தார்.
நூல்கள்: அபூ தாவூத், திர்மிதீ
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார். இமாம் பஸ்ஸார்(ரஹ்) இதனை `ஹஸன்' எனக் குறிப்பிட்டுள்ளார்.
``ஒரு பெண்ணின் கணவன் காணாமல் போனால், அப்பெண் நான்கு ஆண்டுகள் காத்திருக்க வேண்டும். அதற்குப் பின் நான்கு மாதம் பத்து நாள் இத்தா இருக்க வேண்டும் என உமர்(ரலி) கூறினார்கள்.
நூல்கள்: மாலிக், ஷாஃபியீ

1160. ஒரு பெண்ணுடன் அவளை மணந்தவரோ, அவளை மணக்கத் தடைவிதிக்கப்பட்டுள்ள (நெருங்கிய) உறவினரோ, அன்றி, வேறு யாரும் இரவு நேரத்தில் (தனியாகத்) தங்க வேண்டாம்'' என்று இறைத்தூதர்(ஸல்) கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

1162. ``(போர்க் கைதியாக அல்லது விலைக்கு வாங்கப்பட்ட அடிமையாக வரும்) கர்ப்பிணியாய் இருப்பவள், தன் குழந்தையைப் பெற்றெடுக்கும் வரை உறவு கொள்ள வேண்டாம். இன்னும், கர்ப்பிணியாக இல்லாதவள் ஒரு முறை மாதவிலக்காகி தூய்மை அடையாதவரை உறவு கொள்ள வேண்டாம்'' என்று இறைத்தூதர்(ஸல்) அவ்தாஸ் யுத்தக் கைதிகள் பற்றிக் குறிப்பிடுகையில் கூறினார்கள் என அபூ ஸயீத்(ரலி) அறிவித்தார்.
நூல்: அபூ தாவூத்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்..

1164. ``(பெண்ணின்) படுக்கைக்குச் சொந்தக்காரருக்கே (அவளின்) குழந்தை உரியதாகும். (அப்பெண்ணுடன்) விபச்சாரம் செய்தவருக்கு இழப்பு (தண்டனை)தான் உரியதாகும்'' என்று இறைத்தூதர்(ஸல்) கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
குறிப்பு: அடிமைப் பெண் ஒருத்தி விபச்சாரம் செய்து அதன் மூலம் குழந்தை உண்டானால் அந்தக் குழந்தை அவளின் எஜமானனுக்கே உரியதாகும். ஒருவனின் மனைவி விபச்சாரம் செய்து அதன் மூலம் குழந்தை பிறந்தால் அந்தக் குழந்தை அவளின் கணவனுக்கே உரியதாகும். விபச்சாரம் செய்தவனுக்கு அல்லாஹ் விதித்த தண்டனைதான் கதியாகும். இதற்கு மாற்றமாக எந்த முடிவு எடுத்தாலும் இவ்வாறு பிறக்கும் குழந்தைகள் ஆதரவற்றுப் போனால் சமூகத்தில் குற்றவாளிகள் பெறுகுவதற்குக் காரணமாகும்.

1166. இப்னு மஸ்வூத்(ரலி) வாயிலாகவும் நஸயீயில் பதிவிடப்பட்டுள்ளது.

1168. ``ஒரு பெண்ணிடம், ஒரு முறை அல்லது இரண்டு முறை (குழந்தை பாலை) சிறிது உறிஞ்சுவதால், திருமண உறவு விலக்கப்பட்டதாய் ஆகாது'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்: முஸ்லிம்

1170. ஸஹ்லா பின்த் ஸுஹைல்(ரலி) வந்து, ``இறைத்தூதர் அவர்களே! அபூ ஹுதைஃபாவால் விடுதலை செய்யப்பட்ட அடிமை ஸாலிம் எங்கள் வீட்டில் இருக்கிறார். அவர் இப்போது மற்ற மனிதர்களைப் போன்று பருவம் அடைந்துவிட்டார்'' எனக் கூறினார்.
``அவருக்குப் பால் (கறந்து) கொடுத்துவிடு! நீ அவருக்கு ஹராமாகிவிடுவாய்!'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்: முஸ்லிம்
குறிப்பு: இது, ஸாலிம்(ரலி) அவர்களுக்கும் அவர்களின் வளர்ப்புத் தாய்க்கும் நபி(ஸல்) அளித்த சிறப்புச் சலுகையாகும். அதற்கும் முன்னரும் சரி அதற்குப் பின்னரும் சரி, இது வேறு யாருக்கும் எக்காலத்திலும் பொருந்தாது.

1172. ``உறுதியாக பத்து தடவை வாய் வைத்துப் பாலருந்துவது (தான் திருமண உறவைத்) தடை செய்யக் கூடியதாகும்'' என்று குர்ஆனில் (சட்டம்) இருந்தது. பின்னர், அது உறுதியாக ஐந்து தடவையாக மாற்றப்பட்டது. பின்னர், இறைத்தூதர்(ஸல்) இறந்துவிட்டார்கள். அது (ஓதப்படக் கூடாத வசனம் என மக்கள் அறியாததால் இப்போதும்) குர்ஆனிலிருந்து ஒதப்படுகிறது என்று ஆயிஷா(ரலி) கூறினார்.
நூல்: முஸ்லிம்
குறிப்பு: இந்த வசனம் நபி(ஸல்) காலத்திலேயே அவர்களால் ரத்துச் செய்யப்பட்டுவிட்டது.

1174. ``பால்குடிப் பருவத்தில் இரைப்பையைச் சென்றடையும் விதமான பாலூட்டுதலைத் தவிர மற்றவை (திருமண உறவை) விலக்கிவிடாது. இது பால்குடி மறக்கடிப்பதற்கு முன்பு நிகழ்ந்திருக்க வேண்டும்'' என்று இறைத்தூதர்(ஸல்) கூறினார்கள் என உம்மு ஸலாமா(ரலி) அறிவித்தார்.
நூல்: திர்மிதீ
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.