1238. யஃலா இப்னு உமையா ஒருவருடன் சண்டையிட்டார். அப்போது, அவர்களில் ஒருவர் மற்றவரைத் தன் பல்லால் கடித்தார். உடனே மற்றவர் தன் கையை அவரின் வாயிலிருந்து உருவிக் கொண்டார். அதனுடன் அவரின் முன்பல்லையும் (உடைத்துக்) கழற்றிவிட்டார். இந்த வழக்கு இறைத்தூதர்(ஸல்) அவர்களிடம் கொண்டுவரப்பட்டது. ``உங்களில் ஒருவர் தன் சகோதரனை பலமான ஒட்டகம் கடிப்பது போன்று கடிப்பதா? இதற்கெல்லாம் நஷ்டஈடில்லை'' என்று இறைத்தூதர்(ஸல்) கூறினார்கள் என இம்ரான் இப்னு ஹுஸைன்(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.

1240. ``பகலில் தோட்டங்களைப் பாதுகாத்தல் அதன் எஜமானின் பொறுப்பாகும். இரவில் கால் நடைகளைப் பாதுகாத்தல் அவற்றின் எஜமானன் மீதே பொறுப்பாகும். இன்னும், இரவில் அவற்றின் மூலம் பிறருக்கு ஏதேனும் தீங்குகள் ஏற்பட்டால், அதன் பொறுப்பு உரிமையாளனையே சாரும்'' என்று இறைத்தூதர்(ஸல்) கூறினார்கள் என பராவு இப்னு ஆஸிப்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா.
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.
இதன் அறிவிப்பாளர் தொடரில் கருத்து வேறுபாடுகள் உள்ளன.

1242. ``(இஸ்லாமிலிருந்து கொண்டு) தன் மார்க்கத்தை மாற்றிக் கொள்பவனைக் கொன்றுவிடுங்கள். (மரண தண்டனை கொடுங்கள்)'' என்று இறைத்தூதர்(ஸல்) கூறினார் கள் என இப்னு அப்பாஸ்(ரலி) அறிவித்தார்.
நூல்: புகாரீ

1244. கிராமவாசிகளில் ஒருவர் இறைத்தூதர்(ஸல்) அவர்களிடம் வந்து, ``இறைத்தூதர் அவர்களே! தாங்கள் எனக்கு அல்லாஹ்வின் சட்டத்தின் அடிப்படையில் தீர்ப்பளிக்க வேண்டும் எனத் தங்களுக்கு அல்லாஹ்வின் மீது ஆணையிட்டுக் கூறுகிறேன்'' எனக் கூறினார்.
அவருடன் இருந்த அவரைவிட அதிகமாகப் புரிந்து கொள்ளும் ஆற்றல் மிக்க மற்றொருவர், ``ஆம்! எங்கள் மத்தியில் அல்லாஹ்வின் கட்டளைப்படி தீர்ப்பளியுங்கள். (நடந்ததைக்) கூறுவதற்கு என்னை அனுமதியுங்கள்'' எனக் கூறினார்கள்.
``என் மகன் இவரிடம் வேலை பார்த்து வந்தான். அப்போது, அவன் இவரின் மனைவியுடன் விபச்சாரம் செய்துவிட்டான். என் மகனைக் கல்லெறிந்து கொல்ல வேண்டும் என எனக்குத் தெரிவிக்கப்பட்டது. நான் அதற்குப் பகரமாக நூறு ஆடுகள் மற்றும் ஓர் அடிமைப் பெண்ணை ஈட்டுத் தொகையாகக் கொண்டு அவனைத் தண்டனையிலிருந்து விடுவித்தேன். பின்னர், அது குறித்து நான் அறிஞர்களிடம் கேட்டதற்கு, ``அவனுக்குரிய தண்டனை நூறு கசையடியும் ஓராண்டு ஊரைவிட்டு வெளியேற்றுதலும் ஆகும்'' என்றும் இவரின் மனைவியைக் கல்லால் எறிந்து கொல்லவேண்டும் என்றும் கூறினர்'' என அவர் கூறினார்.
``என் உயிரைத் உயிரைத் தன் கையில் கொண்டவன் மீது ஆணையாக! நான் உங்கள் மத்தியில் இறைச் சட்டத்தைக் கொண்டு தீர்ப்பளிப்பேன், அந்த அடிமைப் பெண்ணும், ஆடுகளும் உங்களிடம் திரும்பத் தரப்பட வேண்டும். உங்கள் மகனுக்குத் தண்டனையாக நூறு கசையடி கொடுக்கப்படும்; மேலும், ஓராண்டு ஊர் விலக்கம் செய்யப்படும். உனைஸே! இவரின் மனைவியிடம் செல்லும். அவள் தன் குற்றத்தை ஒப்புக்கொண்டால் அவளைக் கல்லெறிந்து கொல்லும்!'' என்று கூறினார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.

1246. இறைத்தூதர்(ஸல்) இறைஇல்லத்தில் இருந்தபோது முஸ்லிம்களில் ஒருவர் அவர்களிடம் வந்து, இறைத்தூதர்(ஸல்) அவர்களைச் சப்தமாக அழைத்தார்.
``இறைத்தூதர் அவர்களே! நான் விபச்சாரம் செய்துவிட்டேன்'' எனக் கூறினார்.
இறைத்தூதர்(ஸல்) அவரைக் கண்டுகொள்ளாமல் முகத்தைத் திருப்பிக் கொண்டார்கள்.
அவர் மறுபடியும் இறைத்தூதர்(ஸல்) அவர்களின் முகத்திற்கு எதிரே வந்து, ``இறைத்தூதர் அவர்களே! நான் விபச்சாரம் செய்துவிட்டேன்'' எனக் கூறினார்.
இறைத்தூதர்(ஸல்) மறுபடியும் தம் முகத்தைத் திருப்பிக் கொண்டார்கள். அவர் இவ்வாறே திரும்பத் திரும்ப நான்கு முறை செய்தார். இவ்வாறு அவர் தனக்கு எதிராக நான்கு முறை சாட்சி அளித்தப் பின்னர், இறைத்தூதர்(ஸல்) அவரை அழைத்து, ``உனக்குப் பைத்தியம் பிடித்துவிட்டதா'' எனக் கேட்டார்கள்.
``இல்லை'' என அவர் கூறினார்.
``உனக்குத் திருமணம் ஆகிவிட்டதா?'' எனக் கேட்டார்கள்.
``ஆம்'' என அவர் கூறினார்.
``இவரை அழைத்துச் சென்று கல்லெறிந்து மரண தண்டனை கொடுங்கள்'' என்று கட்டளையிட்டார்கள் என அபூ ஹுரைரா(ரலி) அறிவித்தார்.
நூல்கள்: புகாரீ, முஸ்லிம்

1248. உமர்(ரலி) ஒரு முறை உரை நிகழ்த்திக் கொண்டிருந்தபோது ``நிச்சயமாக அல்லாஹ் முஹம்மத்(ஸல்) அவர்களை சத்திய மார்க்கத்துடன் அனுப்பினான். அவர்களுக்கு வேதத்தையும் அருளினான். அதில் நாங்கள் கல்லெறியும் சட்டத்தை எடுத்துரைக்கும் வசனத்தைப் படித்தோம். அதைப் புரிந்து காண்டு மனதில் பதித்தோம். நபி(ஸல்) அவர்களும் கல்லெறியும் தண்டனையை நிறைவேற்றினார்கள். அவர்களுக்குப் பின்பு நாங்களும் கல்லெறியும் தண்டனையை நிறைவேற்றினோம். மக்கள் மீது நீண்ட காலம் சென்றுவிட்டதால் கல்லெறியும் சட்டத்தை அல்லாஹ்வின் வேதத்தில் நாங்கள் காணவில்லை'' என்று யாரேனும் கூற, மக்கள் அல்லாஹ் அருளிய ஒரு கடமையைக் கை விட்டு வழிகெட்டுவிடுவார்கள் என நான் அஞ்சுகிறேன். உண்மையில் திருமணமான ஆணோ, பெண்ணோ விபச்சாரம் செய்து அதற்கான சாட்சியம் கிடைத்தாலோ, கருத்தரித்துவிட்டாலோ அல்லது (தானே முன் வந்து குற்றத்தை) ஒப்புக் கொண்டாலோ அவளைக் கல்லெறிந்து கொல்வது அல்லாஹ்வின் கட்டளையாகும்'' என்று உமர்(ரலி) கூறினார்கள்.
நூல்கள்: புகாரீ, முஸ்லிம்

1250. ``உங்கள் ஆதிக்கத்தின் கீழ் அடிமைப் பெண்கள் மற்றும் அடிமைகள் மீது (அவர்கள் குற்றம் புரிந்து விட்டால்) தண்டனையை நிறைவேற்றுங்கள்'' என்று இறைத்தூதர்(ஸல்) கூறினார்கள் என அலீ(ரலி) அறிவித்தார்.
நூல்: அபூ தாவூத்
இது முஸ்லிம் `மவ்கூஃப்' எனும் தரத்தில் பதிவிடப்பட்டுள்ளது.

1252. அஸ்லம் கோத்திரத்தைச் சேர்ந்த ஓர் ஆணுக்கும் யூத குலத்தைச் சேர்ந்த ஓர் ஆணுக்கும் மற்றும் ஒரு பெண்ணுக்கும் கல்லெறிந்து கொல்லும் தண்டனையை இறைத்தூதர்(ஸல்) வழங்கினார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: முஸ்லிம்

1254. திருமணம் ஆகாத பலவீனமான சிறிய மனிதர் ஒருவர் எங்கள் வீடுகளில் இருந்து வந்தார். (ஒருமுறை) அவர் எங்கள் அடிமைப் பெண்களில் ஒருத்தியுடன் தகாத முறையில் நடந்து கொண்டார். (இது குறித்து) இறைத்தூதர்(ஸல்) அவர்களிடம் என் தந்தை சஅத்(ரலி) முறையிட்டார்.
``அவருக்கு அதற்கான கசையடி கொடுங்கள்'' என்று இறைத்தூதர்(ஸல்) கூறினார்கள்.
``இறைத்தூதர் அவர்களே! அவர் மிகவும் பலவீனமானவர்'' என மக்கள் கூறினார்கள்.
``சிறு கிளைகள் கொண்ட பெரிய ஒன்றைப் பிடுங்கி அதனால் அவரை ஓர் அடி அடியுங்கள்'' என்று இறைத்தூதர்(ஸல்) கூறினார்கள். அவர்களும் அவ்வாறே செய்தார்கள் என ஸயீத் இபனு ஸஅத் இப்னு உபாதா(ரலி) அறவித்தார்.
நூல்கள்: அஹ்மத், நஸயீ மற்றும் இப்னு மாஜா
இது `ஹஸன்' எனும் தரத்தில் பதிவிடப்பட்டுள்ளது. ஆனாலும், இது மவ்ஸுலா மற்றும் முர்ஸலா என்பதில் கருத்து வேறுபாடுகள் உள்ளன.

1256. திருமணம் ஆகாத ஆணை, இறைத்தூதர்(ஸல்) (கசையால் நூறு அடி) அடித்தார்கள். மேலும் ஊர்விலக்கம் செய்தார்கள். அபூ பக்ர்(ரலி) (கசையால்) அடித்தார்கள். மேலும் ஊர்விலக்கம் செய்தார்கள். உமர்(ரலி) (கசையால்) அடித்தார்கள். இன்னும் ஊர் விலக்கம் செய்தார்கள் என இப்னு உமர்(ரலி) அறிவித்தார்.
நூல்: திர்மிதீ
இதன் அறிவிப்பாளர்கள் பலமானவர்கள் இன்னும் இது `மர்ஃபூஃ' அல்லது `மவ்கூஃப்' என்பதில் கருதது வேறுபாடு உள்ளது.