149. ஃபாத்திமா பின்து அபீ ஹுபைஷ் அவர்களுக்கு தொடர் உதிரப்போக்கு இருந்து வந்தது. இறைத்தூதர்(ஸல்) அவரிடம், ``மாதவிடாய் இரத்தம் கறுப்பாக இருப்பதைக் கொண்டு அறியப்படும். உனக்கு அது ஏற்பட்டால் தொழுகையை விட்டுவிடு. அதுவல்லாத மற்றேதும் (இரத்தம்) ஏற்படுமாயின் `உளூ'ச் செய்து தொழுது கொள்'' என்று கூறினார்கள் என ஆயிஷா(ரலி) அறிவித்தார்.
நூல்கள்: அபூ தாவூத், நஸயீ.
இப்னு ஹிப்பான்(ரஹ்) மற்றும் ஹாகிம்(ரஹ்) இதனை ஆததரப்பூர்வமானது எனக் குறிப்பிட்டுள்ளார்கள். இதனை நிராகரிக்கத் தக்கது என அபூ ஹாதிம்(ரஹ்) கருதுகிறார்.

151. எனக்கு அடிக்கடி கடும் தொடர் உதிரப்போக்கு ஏற்பட்டுக் கொண்டிருந்தது. நான் (இது குறித்து) சட்டம் கேட்க நபி(ஸல்) அவர்களிடம் சென்றேன். ``நிச்சயமாக அது ஷைத்தானின் வேலைகளில் ஒன்றாகும். ஆறு அல்லது ஏழு நாள்களை (வழமையாக) மாதவிடாய் நாள்களாகக் கணக்கிட்டுக் கொள்! பின்னர் குளித்துக் கொள்! நீ தூய்மையாகி விட்டால், இருபத்தி நான்கு அல்லது இருபத்தி மூன்று நாள்கள் தொழுது கொள்! நோன்பும் நோற்றுக் கொள்! நிச்சயமாக இது உனக்குப் போதுமானதாகிவிடும். (மற்ற) பெண்கள் எவ்வாறு மாதவிடாய்க் காலத்தைக் கழிக்கிறார்களோ, அதுபோன்று ஒவ்வொரு மாதமும் செய்து கொள்! லுஹரைப் பிற்படுத்தியும் அஸரை முற்படுத்தியும் தொழ உன்னால் முடியுமானால், நீ தூய்மையடையும் போது குளித்துவிட்டு, லுஹரையும் அஸரையும் (ஒன்றாக இணைத்துத்) தொழுது கொள். பின்னர் மக்ரிபைப் பிற்படுத்தி; இஷாவை முற்படுத்தி குளித்து விட்டு இரண்டையும் சேர்த்துத் தொழுது கொள்! பின்னர் ஃபஜ்ர் தொழுகையை குளித்து விட்டுத் தொழுது கொள்! இவை இரண்டிலும் இது எனக்கு மிகவும் பிடித்தமானது'' என்று இறைத்தூதர்(ஸல்) கூறினார்கள் என ஹம்னா பின்த்து ஜஹ்ஷ்(ரலி) அறிவித்தார்.
நூல்கள்: அபூ தாவூத், திர்மிதீ, இப்னு மாஜா மற்றும் அஹ்மத்
இதனை ஆதாரப்பூர்வமானது என இமாம் திர்மிதீ(ரஹ்) அவர்களும், `ஹஸன்' என இமாம் புகாரீ(ரஹ்) அவர்களும் கூறியுள்ளனர்.

153. உம்மு ஹபீபா பின்த்து ஜஹ்ஷ்(ரலி) அவர்களிடம் ``நீ ஒவ்வொரு தொழுகைக்கும் `உளூ'ச் செய்து கொள்!'' என்று இறைத்தூதர்(ஸல்) கூறினார்கள் என புகாரீயின் மற்றோர் அறிவிப்பில் உள்ளது. இதே கருத்து அபூ தாவூதிலும் வேறு ஓர் அறிவிப்பாளர் வாயிலாக வந்துள்ளது.

155. ``நிச்சயமாக யூதர்கள் மாதவிடாயான பெண்களுடன் (சேர்ந்து) உண்ண மாட்டார்கள். நீங்கள் உடலுவைத் தவிர்த்து (விரும்பிய) மற்ற அனைத்தையும் செய்து கொள்ளுங்கள்'' என்று இறைத்தூதர்(ஸல்) கூறினார்கள் என அனஸ்(ரலி) அறிவித்தார்.
நூல்: முஸ்லிம்

157. தன் மனைவி மாதவிடாயாக இருக்கும் நிலையில் அவளுடன் உடலுறவு கொள்வோர் குறித்துக் கூறுகையில், ``அவர் ஒரு தீனார் அல்லது அரை தீனார் தர்மம் செய்யட்டும்!'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
நூல்கள்: அஹ்மத், திர்மிதீ, அபூ தாவூத், நஸயீ, இப்னு மாஜா.
இமாம் ஹாகிம்(ரஹ்) மற்றும் இப்னு கத்தான்(ரஹ்) இதனை ஆதாரப்பூர்வமானது எனக் குறிப்பிட்டுள்ளனர். மற்றவர்கள் இதனை இப்னு அப்பாஸ் (ரலி) அவர்களின் கூற்று எனக் கூறியுள்ளனர்.

159. நாங்கள் ஸரிஃப எனும் இடத்தை அடைந்ததும், எனக்கு மாதவிடாய் ஏற்பட்டது. ``நீ தூய்மையாகும் வரை தவாஃப்பை (பைத்துல்லாஹ்வை வலம் வருவதைத்) தவிர்த்து ஹாஜிகள் செய்கின்ற மற்ற அனைத்தையும் செய்துகொள்!'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார். (நீண்ட ஹதீஸின சுருக்கம்)
நூல்கள்: புகாரீ, முஸ்லிம்.
குறிப்பு: விரிவாக அறிவதற்கு பார்க்க புகாரீ ஹதீஸ் எண் 305.

161. ``நபி(ஸல்) அவர்களின் காலத்தில் பெண்கள் (நிஃபாஸ் என்னும்) பிரசவ கால உதிரப்போக்குக்குப் பின்னர் நாற்பது நாள்கள் தனித்திருப்பார்கள்'' என உம்மு ஸலமா(ரலி) அறிவித்தார்.
நூல்கள்: அபூ தாவூத், அஹ்மத், திர்மிதீ மற்றும் இப்னு மாஜா.
இங்கு அபூ தாவூதின் வாசகம் இடம் பெற்றுள்ளது.
குறிப்பு: பிரசவ உதிரப்போக்கு எல்லாப் பெண்களுக்கும் நாற்பது நாள்கள் இருக்கும் எனக் கூறமுடியாது. உண்மையில் இது அவரவர் உடற்கூறுக்கு ஏற்ற வகையில் அமைகிறது. அதிகப்படியாக நாற்பது நாள்களை மட்டுமே பிரசவ உதிரப்போக்கிற்கான காலமாக எடுத்துக் கொள்ள வேண்டும்.

163. ``லுஹரின் (தொழுகை) நேரம் சூரியன் உச்சி சாய்ந்ததிலிருந்து, ஒரு மனிதனின் நிழல் அவனுக்குச் சமமாக ஆகி, அஸரின் நேரம் வராத வரையிலாகும். இன்னும் அஸரின் (தொழுகை) நேரம் சூரியன் மஞ்சள் நிறத்தை அடையாத வரையாகும். இன்னும் மக்ரிப் தொழுகையின் நேரம் செவ்வானம் மறையாத வரையாகும். மேலும், இஷா தொழுகையின் நேரம் நள்ளிரவு வரையாகும். இன்னும், சுப்ஹு தொழுகையின் நேரம் கிழக்கு வெளுத்ததிலிருந்து சூரியன் உதயமாகும் வரையாகும்'' என்று இறைத்தூதர்(ஸல்) கூறினார்கள் என அப்துல்லாஹ் இப்னு உமர்(ரலி) அறிவித்தார்.
நூல்: முஸ்லிம்

165. இன்னும் (முஸ்லிமில்), ``சூரியன் (சற்று) உயர்ந்திருக்கும் வரை'' என அபூ மூஸா(ரலி) வாயிலாக பதிவிடப்பட்டுள்ளது.

167. இறைத்தூதர்(ஸல்) இஷா தொழுகையை சில நேரங்களில் விரைவாகவும், சில நேரங்களில் தாமதமாகவும் தொழுவார்கள். மக்கள் விரைவாக ஒன்று திரளக் கண்டால் விரைவாகவும், தாமதமாக வரக் கண்டால் தாமதமாகவும் (இஷாத்) தொழுவார்கள். இன்னும் ஃபஜ்ர் தொழுகையை இறைத்தூதர்(ஸல்) இருட்டில் தொழுவார்கள் என ஜாபிர்(ரலி) அறிவித்தார்.
நூல்கள்: புகாரீ, முஸ்லிம்