23. இறந்த ஆட்டை இழுத்துச் சென்றோரை இறைத்தூதர்(ஸல்) கடந்து சென்றபோது, ``அதன் தோலை நீங்கள் எடுத்துக் கொள்ளலாமே?'' எனக் கூறினார்கள்.
``அது தானாக செத்தாயிற்றே?'' என அவர்கள் பதிலளித்தனர்.
``அதனைத் தண்ணீர் மற்றும் மரப்பட்டை சுத்தம் செய்துவிடும்'' என்று இறைத்தூதர்(ஸல்) கூறினார்கள் என மைமூனா(ரலி) அறிவித்தார்.
நூல்கள்: அபூ தாவூத், நஸயீ

25. ``இணைவைக்கும் ஒரு பெண்ணின் தண்ணீர்ப் பையிலிருந்த தண்ணீரைக் கொண்டு நபி(ஸல்) அவர்களும் அவர்களின் தோழர்களும் `உளூ'ச் செய்தார்கள்'' என இம்ரான் இப்னு ஹுஸைன்(ரலி) அறிவித்தார். (நீண்ட ஹதீஸின் சுருக்கம்)
நூல்: புகாரீ, முஸ்லிம்

27. ``மதுலிருந்து `சிர்கா' செய்தல் குறித்து இறைத்தூதர்(ஸல்) அவர்களிடம் வினவப்பட்டதற்கு, `கூடாது' என அவர்கள் கூறினார்கள் (தடை விதித்தார்கள்)'' என அனஸ் இப்னு மாலிக்(ரலி) அறிவித்தார்.
நூல்கள்: முஸ்லிம், திர்மிதீ
இது திர்மிதீயில் ``ஸஹீஹ்'' எனும் தரத்தில் பதிவிடப்பட்டுள்ளது.

29. இறைத்தூதர்(ஸல்) மினாவில் தங்களின் வாகனத்தில் அமர்ந்தவாறே எங்களுக்கு உரையாற்றினார்கள். அப்போது, அதன் (அக்கால் நடையின்) உமிழ் நீர் என் தோளில் (விழுந்து) வழிந்தோடிக் கொண்டிருந்தது என அம்ர் இப்னு காரிஜா(ரலி) அறிவித்தார்.
குறிப்பு: உண்பதற்கு அனுமதிக்கப்பட்ட கால்நடைகளின் உமிழ்நீர் ஆடைகளில் அல்லது உடலிலோ படுவதால் அசுத்தமாகாது.
நூல்கள்: அஹ்மத், திர்மிதீ
இது திர்மிதீயில் `ஸஹீஹ்' எனும் தரத்தில் பதிவிடப்பட்டுள்ளது.

31. ``நபி(ஸல்) அவர்களின் ஆடையில் படிந்திருந்த (இந்திரியத்)தை சுரண்டிவிடுபவளாய் நான் இருந்தேன். அவர்கள் (அந்நேரத்தில்) அதே ஆடையுடன் தொழுது வந்தார்கள்'' என்று ஆயிஷா(ரலி) கூறினார்கள் என முஸ்லிமில் பதிவாகியுள்ளது.

33. ``பெண் குழந்தையின் சிறுநீர்பட்ட இடத்தைக் கழுவவேண்டும். ஆண் குழந்தையின் சிறுநீர் பட்ட இடத்தில் தண்ணீர் தெளித்தல் போதுமானது'' என்று இறைத்தூதர்(ஸல்) கூறினார்கள் என அபூ ஸம்ஹி(ரலி) அறிவித்தார்.
குறிப்பு: தாய்ப் பால் மட்டும் அருந்திக் கொண்டிருக்கும் ஆண் குழந்தையின் சிறுநீர் பட்ட இடத்தில் தண்ணீர் தெளித்தால் போதுமானது. ஆனால், ஆண் குழந்தை மற்ற ஆகாரங்கள் உண்ணத் தொடங்கினால், சிறுநீர் பட்ட அந்த இடத்தைத் தண்ணீரால் கழுவுதல் அவசியம்.
நூல்கள்: அபூ தாவூத், நஸயீ மற்றும் ஹாகிம்
இது `ஸஹீஹ்' எனும் தரத்தில் ஹாகிமில் பதிவிடப்பட்டுள்ளது.

35. ``இறைத்தூதர் அவர்களே! மாதவிடாய் இரத்தக் கறை (துணியிலிருந்து) நீங்காவிட்டால்?'' என கவ்லா(ரலி) வினவினார்.
``அதன் மீது தண்ணீர் விட்டால் போதுமானது அதன் கறையால் உனக்குத் தீங்கில்லை'' என்று இறைத்தூதர்(ஸல்) பதிலளித்தார்கள் என அபூ ஹுரைரா(ரலி) அறிவித்தார்.
நூல்: திர்மிதீ
இதன் அறிவிப்பாளர் தொடர் பலவீனமானது. இதன் அறிவிப்பாளர் தொடரில் இப்னு ளஹ்யா இடம்பெற்றுள்ளார். எனினும், இதில் கூறப்பட்டுள்ள செய்தி சரியானதே.

37. உஸ்மான்(ரலி) `உளூ'விற்காகத் தண்ணீர் கேட்டார்கள். (தண்ணீர் கொடுக்கப்பட்டதும்) மும்முறை தம் கைகளைக் கழுவினார்கள். பின்னர், வாய்கொப்பளித்தார்கள். இன்னும், மூக்கில் தண்ணீர் செலுத்திச் சிந்தினார்கள். பின்னர், தம் முகத்தை மும்முறை கழுவினார்கள். பின்னர், தம் வலக் கையை முழங்கை வரை மும்முறை கழுவினார்கள். பின்னர், தம் இடக் கையை அதே போன்று கழுவினார்கள். பின்னர், தம் தலைக்கு மஸஹ் செய்தார்கள். (தலையை ஈரக் கையால் தடவினார்கள்). பின்னர், தம் வலக் காலை கணுக்கால்கள் வரை மும்முறை கழுவினார்கள். பின்னர், தம் இடக் காலை அதே போன்று கழுவினார்கள். பின்னர், ``இறைத்தூதர்(ஸல்) `உளூ'ச் செய்வதை நான் பார்த்துள்ளேன். அவர்களின் `உளூ' (நான் செய்து காட்டிய) என்னுடைய இந்த `உளூ'வைப் போன்றே அமைந்திருந்தது'' என்று கூறினார்கள் என உஸ் மான்(ரலி) அவர்களின் அடிமை ஹும்ரான் அறிவித்தார்.
நூல்கள்: புகாரீ, முஸ்லிம்

39. நபி(ஸல்) அவர்களின் `உளூ' குறித்துக் கூறுகையில், ``இறைத்தூதர்(ஸல்) தலைக்கு மஸஹ் செய்தபோது, தம் இரண்டு (உள்ளங்)கைகளையும் தலையின் முன்நெற்றியில் வைத்து பின்னே தடவிக் கொண்டே சென்று, பிறகு முன்னே கொண்டு வந்தார்கள்'' என அப்துல்லாஹ் இப்னு ஜைத் இப்னு ஆஸிம்(ரலி) அறிவித்தார்.
நூல்கள்: புகாரீ, முஸ்லிம்

41. இறைத்தூதர்(ஸல்) அவர்களின் `உளூ' குறித்துக் கூறுகையில் ``அவர்கள் தம் தலைக்கு மஸஹ் செய்தார்கள். இன்னும், தம் இரண்டு ஆட்காட்டி விரல்களையும் காதிகளினுள் நுழைத்து, தம் கட்டை விரல்கள் இரண்டினாலும் காதுகளின் வெளிப்பகுதியில் மஸஹ் செய்தார்கள்'' என அப்துல்லாஹ் இப்னு அம்ர்(ரலி) அறிவித்தார்.
நூல்கள்: அபூ தாவூத், நஸயீ மற்றும் இப்னு குஸைமா.
இது ஸஹிஹ் எனும் தரத்தில் உள்ளது என இமாம் இப்னு குஸைமா(ரஹ்) குறிப்பிட்டுள்ளார்