788. ``மொட்டையடித்தல் பெண்களுக்கு (கடமை) இல்லை. அவர்கள் முடியைக் குறைத்துக் கொண்டாலே போதும்'' என்று இறைத்தூதர்(ஸல்) கூறினார்கள் என இப்னு அப்பாஸ்(ரலி) அறிவித்தார்.
இமாம் அபூ தாவூத்(ரஹ்) `ஹஸன்' எனும் தரத்தில் இதனை பதிவிட்டுள்ளார்.

790. ஒட்டகம் மேய்ப்பவர் பத்தாம் நாள் கல் எறிவதற்காக அன்று இரவு மினாவில் தங்காமல் வேறு இடத்தில் தங்குவதற்கும் பத்தாம் நாளுக்குப் பின்னர் இரண்டு நாள்களில் எறியவேண்டிய கற்களை (மினாவிலிருந்து) புறப்படும் (பதிமூன்றாம்) நாளன்று எறிவதற்கும் இறைத்தூதர்(ஸல்) அனுமதி அளித்தார்கள் என ஆஸிம் இப்னு ஆதீ(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா

792. தலையை மழிக்கும் நாளன்று இறைத்தூதர்(ஸல்) எங்களுக்கு உரை நிகழ்த்தினார்கள். அப்போது, ``இது அய்யாமுத் தஷ்ரீக்கின் நடு நாள் அல்லவா?'' எனக் கூறினார்கள் என ஸர்ரா பின்த்து நப்ஹான்(ரலி) அறிவித்தார். (ஹதீஸ் சுருக்கம்)
நூல்: அபூ தாவூத்
இதன் அறிவிப்புத் தொடர் ``ஹஸன்'' என இமாம் அபூ தாவூத்(ரஹ்) குறிப்பிட்டுள்ளார்.

794. இறைத்தூதர்(ஸல்) தவாஃபுஸ் ஸியாரத் செய்தபோது ஏழு சுற்றுகளிலும் விரைவாகச் செல்லவில்லை என இப்னு அப்பாஸ்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ மற்றும் இப்னுமாஜா.
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

796. ``ஆயிஷா(ரலி) முஹஸ்ஸபில் இறங்க மாட்டார்கள்'' இது இறைத்தூதர்(ஸல்) மக்காவிலிருந்து மதீனா புறப்படத் தோதுவான இடம் என்பதைத் தவிர (இந்த இடத்தில்) வேறு ஒன்றுமில்லை. அதனால்தான் இறைத்தூதர்(ஸல்) அங்கு இறங்கினார்கள் என ஆயிஷா(ரலி) அவர்களே கூறினார்கள்.
நூல்: முஸ்லிம்

798. ``என்னுடைய இந்த இறைஇல்லத்தில் (மஸ்ஜிதுன் னபவி) தொழுவது, மஸ்ஜித் ஹராமைத் தவிர மற்ற இறைஇல்லங்களில் தொழும் ஆயிரம் தொழுகைகளை விடச் சிறந்தது. இன்னும், மஸ்ஜித் ஹராமில் தொழுவது, என்னுடைய இந்த இறைஇல்லத்தில் தொழும் நூறு தொழுகைகளை விடச் சிறந்தது'' என்று இறைத்தூதர்(ஸல்) கூறினார்கள் என இப்னு ஜுபைர்(ரலி) அறிவித்தார்.
நூல்: அஹ்மத்
இமாம் இப்னு ஹிப்பான்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

800. ளபாஆ பின்த் ஜுபைர் இப்னி அப்தில் முத்தலிபிடம் இறைத்தூதர்(ஸல்) சென்றார்கள். அவர், ``இறைத்தூதர் அவர்களே! நான் ஹஜ் செய்ய விரும்புகிறேன். ஆனால், நான் நோயாளியாக உள்ளேன்?'' எனக் கூறினார்.
``(இறைவா!) நீ எங்கு விரும்புகிறாயோ, அது உன் இஹ்ராம் உடையைக் களையும் இடமாகும் என்ற நிபந்தனையுடன் ஹஜ் செய்!'' என்று இறைத்தூதர்(ஸல்) கூறினார்கள் என ஆயிஷா(ரலி) அறிவித்தார்.
நூல்கள்: புகாரீ, முஸ்லிம்

802. ``எவ்வகை சம்பாத்தியம் மிகத் தூயது?'' என இறைத்தூதர்(ஸல்) அவர்களிடம் வினவப்பட்டது.
``மனிதன் தன் கையால் உழைத்துச் சம்பாதிக்கும் சம்பாத்தியமும், ஏமாற்றமில்லாமல் (நியாயமாகச்) செய்யும் வியாபார(த்தின் மூலம் கிடைக்கும் லாப)மும்'' என்று இறைத்தூதர்(ஸல்) கூறினார்கள் என ரிஃபாஆ இப்னுராஃபிஃ(ரலி) அறிவித்தார்.
நூல்: பஸ்ஸார்
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

804. ``விற்பவர் மற்றும் வாங்குபவருக்கு இடையில் பிரச்னை ஏற்பட்டு, அதற்கான எவ்வித ஆதாரமும் இருவரில் ஒருவரிடம்கூட இல்லை எனில், பொருளுக்கு உரியவரின் பேச்சே ஏற்கத் தக்கதாகும்; அல்லது அப்பொருளை விட்டுவிட வேண்டும்'' என்று இறைத்தூதர்(ஸல்) கூற நான் செவியுற்றேன் என இப்னு மஸ்வூத்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்.

806. ``நான் என்னுடைய ஒட்டகத்தில் அமர்ந்திருந்தேன். ஒட்டகம் களைத்துவிட்டது. நான் அதனை விட்டுவிட விரும்பினேன்.'' அதே நேரத்தில் இறைத்தூதர்(ஸல்) என்னை வந்தடைந்தார்கள். பின்னர், எனக்காகப் பிரார்த்தித்து, ஒட்டகத்தை அடித்தார்கள். உடனே அது இதற்கு முன்னர் செல்லாத அளவு (வேகமாகச்) செல்ல ஆரம்பித்தது.
அப்போது, ``அதை என்னிடம் ஒரு ஊக்கியாவிற்கு விற்றுவிடு'' என இறைத்தூதர்(ஸல்) கூறினார்கள்.
``இல்லை'' என நான் கூறினேன்.
பின்னரும், ``என்னிடம் விற்றுவிடு!'' என இறைத்தூதர்(ஸல்) கூறினார்கள்.
``இதில் நான் என் வீடு வரை சவாரி செய்து கொள்வேன்'' என நிபந்தனையிட்டு நான் அதனை ஒரு ஊக்கியாவிற்கு விற்றுவிட்டேன். நான் வீடு சென்றதும் ஒட்டகத்தை இறைத்தூதர்(ஸல்) அவர்களிடம் கொண்டு சென்றேன். அவர்கள் அதன் கிரயத்தை என்னிடம் கொடுத்தார்கள். நான் (அதைப் பெற்றுக் கொண்டு) திரும்பியபோது, எனக்குப் பின்னால் ஆள் அனுப்பிய இறைத்தூதர்(ஸல்), ``உன்னுடைய ஒட்டகத்தை எடுத்துக் கொள்ள நான் உனக்குத் குறைந்த விலை கொடுத்துவிட்டேன் என எண்ணுகிறாயா? உன்னுடைய ஒட்டகத்தையும் திர்ஹம்களையும் வாங்கிக் கொள். அது உனக்கே உரியது'' எனக் கூறினார்கள் என ஜாபிர் இப்னு அப்தில்லாஹ்(ரலி) அறிவித்தார்.
நூல்: புகாரீ, முஸ்லிம்
இங்கு முஸ்லிமின் வாசகம் இடம் பெற்றுள்ளது.