849. ``விற்பவரும் வாங்குபவரும் ஒருவர் மற்றவரை விட்டுப் பிரிந்து செல்லாதவரை வியாபாரத்தை முறித்துக் கொள்ளும் உரிமையை இருவரும் பெற்றுள்ளனர், முறித்துக் கொள்ள உரிமை வழங்கப்பட்ட ஒப்பந்தமாய் இருந்தாலே தவிர! எங்கே ஒப்பந்தத்தை ரத்து செய்து விடுவாரோ என்று (அவசர அவசரமாகப்) பிரிந்து செல்வது அனுமதிக்கப்பட்டதல்ல'' என்று இறைத்தூதர்(ஸல்) கூறினார்கள் என அம்ரு பின் ஷுஐப்(ரலி) அறிவித்தார்.
நூல்கள்: அஹ்மத், அபூ தாவூத், திர்மிதீ, நஸயீ, தாரகுத்னீ, இப்னு குஸைமா மற்றும் இப்னுல் ஜாரூத்
மற்றோர் அறிவிப்பில், அவ்விருவரும் தங்களின் இடத்திலிருந்து பிரிந்து செல்லாத வரை வியாபாரத்தை முறித்துக் கொள்ளும் உரிமையை இருவரும் பெற்றுள்ளனர் என உள்ளது.

851. வட்டியை உண்பவரையும், அதனை உண்ணக் கொடுப்பவரையும், அதற்காக எழுதுபவரையும், அதற்கு சாட்சி சொல்பவர்களையும் இறைத்தூதர்(ஸல்) சபித்து, ``அவர்கள் (குற்றத்தில்) சமமானவர்கள்'' என்று கூறினார்கள் என ஜாபிர்(ரலி) அறிவித்தார்.
நூல்: முஸ்லிம்

853. வட்டிக்கு 73 வாசல்கள் உள்ளன. அதில் இலேசானது (கடைசித் தரம்) தன் தாயையே திருமணம் செய்து கொள்வதைப் போன்றதாகும். ஒரு முஸ்லிமின் மானம் மரியாதையில் (அவனைப் பற்றிப் புறம்பேசி, கோள்சொல் , அவதூறு கூறி) தலையிடுவதே வட்டியில் பெரும் வட்டியாகும்.'' என்று இறைத்தூதர்(ஸல்) கூறினார்கள் என அப்துல்லாஹ் இப்னு மஸ்வூத்(ரலி) அறிவித்தார்.
நூல்: இப்னு மாஜா
இது ஹாகிமில் முழுவதுமாக அறிவிக்கப்பட்டு, ஆதாரப்பூர்வமானது எனக் குறிப்பிடப்பட்டுள்ளது.

855. ``தங்கத்திற்குத் தங்கம், வெள்ளிக்கு வெள்ளி, மணிக் கோதுமைக்கு மணிக் கோதுமை, வாற்கோதுமைக்கு வாற்கோதுமை, பேரீச்சம் பழத்திற்குப் பேரீச்சம் பழம், உப்புக்கு உப்பு ஒரே தரத்தில், சம அளவில் (உடனுக்குடன் விற்பது குற்றமில்லை. இந்த இனங்கள் மாறுபடும்போது உடனுக்குடன் என்றால்) நீங்கள் விரும்பியவாறு விற்றுக்கொள்ளுங்கள்'' என்று இறைத்தூதர்(ஸல்) கூறினார்கள் என உபாதா இப்னு ஸாமித்(ரலி) அறிவித்தார்.
நூல்: முஸ்லிம்

857. இறைத்தூதர்(ஸல்) ஒரு நபரைப் பணியளராக நியமித்து கைபருக்கு அனுப்பினார்கள். அவர் (கைபரின்) உயர்தரமான பேரீச்சம் பழங்களைக் கொண்டு வந்தார்.
``கைபரின் எல்லாப் பேரீச்சம் பழங்களும் இவ்வாறுதான் உள்ளனவா?'' என இறைத்தூதர்(ஸல்) கேட்டார்கள்.
``இல்லை! இறைத்தூதர் அவர்களே! அல்லாஹ்வின் மீது ஆணையாக நாங்கள் இரண்டு ஸாவுக்கு பதிலாக இந்த ஒரு ஸாவுவை வாங்குகிறோம். இன்னும், (சில நேரங்களில்) மூன்று ஸாவுக்குப் பதிலாக இரண்டு ஸாவு வாங்குகிறோம்'' எனக் கூறினார்.
``இவ்வாறு செய்யாதீர்கள். பலதரப்பட்ட பேரீச்சம் பழங்களையும் சில திர்ஹம்களுக்குப் பதிலாக விற்பனை செய்யுங்கள்; பின்னர், சில திர்ஹம்களுக்குப் பதிலாக உயர்தரமான பேரீச்சம் பழங்களை விலைக்கு வாங்குங்கள்'' என்று இறைத்தூதர்(ஸல்) கூறினார்கள் என அபூ ஸயீத் அல் குத்ரீ(ரலி) அறிவித்தார். இன்னும், (தராசு) நிறுவையிலும் இது போன்றே என்றும் அறிவிப்பாளர் கூறினார்
நூல்கள்: புகாரீ, முஸ்லிம்
``நிறுத்தல் அளவையிலும் இவ்வாறே'' எனும் வாசகம் முஸ்லிமில் உள்ளது.

859. ``உணவுப் பதார்த்தற்திற்கு பதிலாக உணவுப் பதார்த்தம் ஒரே தரத்தில் கொடுக்க வேண்டும்'' என்று இறைத்தூதர்(ஸல்) கூறினார்கள். எங்களின் அன்றைய உணவுப் பதர்த்தம் கோதுமையாக இருந்தது என மஃமர் இப்னு அப்தில்லாஹ்(ரலி) அறிவித்தார்.
நூல்: முஸ்லிம்

861. ``கால்நடைக்குப் பதிலாகக் கால்நடையை தவணைக்கு (பிறகு பெற்றுக் கொள்வதாக) விற்பதை இறைத்தூதர்(ஸல்) தடைசெய்துள்ளார்கள்'' என ஸமுரா இப்னு ஜுன்தப்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் திர்மிதீ மற்றும் இப்னுல் ஜாரூத்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.

863. ``தன் சகோதரனுக்குப் பரிந்துரை செய்தற்காக அன்பளிப்பு அனுப்பப்பட்டு, அதனைப் பெற்றவர், நிச்சயமாக வட்டியின் பெரும் வாசலுக்குச் சென்று (நுழைந்து) விட்டார்'' என்று இறைத்தூதர்(ஸல்) கூறினார்கள் என அபூ உமாமா(ரலி) அறிவித்தார்.
நூல்கள்: அஹ்மத், அபூ தாவூத்
இதன் அறிவிப்பாளர் தொடரில் ஆட்சேபனை உள்ளது.

865. (புனிதப் போர் புரிய அனுப்பவிருந்த) படை ஒன்றுக்குத் தேவையான (உணவு, உடை, வாகனங்கள் மற்றும் தளவாடப்) பொருட்களை தயார் செய்து கொடுத்து அனுப்புமாறு இறைத்தூதர்(ஸல்) எனக்குக் கட்டளையிட்டார்கள். ஒட்டகங்கள் தீர்ந்து போயின. உடனே, இறைத்தூதர்(ஸல்) ஜகாத்தில் உள்ள இளம்பெண் ஒட்டகங்களை எடுத்துக் கொள்ளும்படி எனக்குக் கட்டளையிட்டார்கள் என்று அப்துல்லாஹ் இப்னு அம்ர்(ரலி) அறிவித்தார். (மேலும்) ஜகாத்தின் ஒட்டகங்கள் வந்தப் பின்னர், இரண்டு ஒட்டகங்களுக்குப் பதிலாக ஓர் ஒட்டகத்தைத்தான் நான் வாங்கினேன் என்றும் கூறினார்.
நூல்கள்: ஹாகிம், பைஹகி
இதன் அறிவிப்பாளர்கள் பலமானவர்கள்.

867. உலர்ந்த பேரீச்சம் பழத்திற்குப் பதிலாக ஈரப்பதமான பேரீச்சம் பழத்தை வாங்குதல் குறித்து இறைத்தூதர்(ஸல்) அவர்களிடம் வினவப்பட்டது.
``ஈரப்பதமான பேரீச்சம்பழம் காய்ந்துவிட்டால் அளவு குறைந்துவிடுமா?'' என இறைத்தூதர்(ஸல்) வினவினார்கள்.
``ஆமாம்'' என மக்கள் கூறினர்.
எனவே, அதனை இறைத்தூதர்(ஸல்) தடைசெய்தார்கள் என ஸஅத் இப்னு அழு வக்காஸ்(ரலி) அறிவித்தார்.
நூல்கள்: அஹ்மத், அபூ தாவூத், நஸயீ, திர்மிதீ மற்றும் இப்னு மாஜா
இமாம் இப்னு அல் மதீனீ, இமாம் திர்மிதீ, இமாம் இப்னு ஹிப்பான் மற்றும் இமாம் ஹாகிம்(ரஹ்) இதனை ஆதாரப்பூர்வமானது எனக் குறிப்பிட்டுள்ளார்கள்.