2:38. (பின்பு) நாம் சொன்னோம்: "நீங்கள் அனைவரும் இங்கிருந்து இறங்கிவிடுங்கள்; என்னிடமிருந்து உங்களுக்கு நிச்சயமாக நேர்வழி வரும்போது, யார் என்னுடைய (அவ்)வழியைப் பின்பற்றுகிறார்களோ அவர்களுக்கு எத்தகைய பயமும் இல்லை; அவர்கள் துக்கப்படவும் மாட்டார்கள்."

2:62. நிச்சயமாக நம்பிக்கை கொண்டவர்களாயினும், யூதர்களாயினும், கிறிஸ்தவர்களாயினும், ஸாபியீன்களாயினும் எவர் அல்லாஹ்வின் மீதும், இறுதிநாள் மீதும் நம்பிக்கை கொண்டு நல்லறம் செய்கிறார்களோ அவர்களின் (நற்)கூலி நிச்சயமாக அவர்களுடைய இறைவனிடம் இருக்கிறது; மேலும், அவர்களுக்கு யாதொரு பயமும் இல்லை; அவர்கள் துக்கப்படவும் மாட்டார்கள்.

2:112. அப்படியல்ல! எவர் தம் முகத்தை அவர் நன்மை செய்துகொண்டிருக்கின்ற நிலையில் அல்லாஹ்வுக்காக (முழுமையாக) அர்ப்பணம் செய்கிறாரோ, அவருடைய நற்கூலி அவருடைய இறைவனிடம் உண்டு; இத்தகையோருக்கு அச்சமில்லை; அவர்கள் துக்கப்படவும் மாட்டார்கள்.

2:155. நிச்சயமாக, நாம் உங்களை ஓரளவு அச்சத்தாலும், பசியாலும், பொருள்கள், உயிர்கள், கனிவர்க்கங்கள் ஆகியவற்றின் இழப்பினாலும் சோதிப்போம்; (நபியே!) பொறுமையுடையோருக்கு நீர் நன்மாராயம் கூறுவீராக!

2:262. எவர்கள் தம் செல்வங்களை அல்லாஹ்வின் பாதையில் செலவுசெய்து, பிறகு அவர்கள் செலவு செய்ததைச் சொல்லிக் காண்பித்தலினாலும், (தர்மம் பெற்றுக்கொண்டவரை ஏதேனும்) நோவினை செய்தலினாலும் தொடரும்படி செய்யவில்லையோ, அவர்களுக்கு அதற்குரிய கூலி அவர்களுடைய இறைவனிடத்தில் உண்டு; இன்னும், அவர்களுக்கு எத்தகைய பயமுமில்லை; அவர்கள் துக்கமும் அடையமாட்டார்கள்.

2:274. யார் தங்கள் பொருள்களை (தான தர்மங்களில்) இரவிலும் பகலிலும், இரகசியமாகவும் பகிரங்கமாகவும் செலவு செய்கின்றார்களோ, அவர்களுக்கு அவர்களுடைய இறைவனிடத்தில் கூலி இருக்கிறது; அவர்களுக்கு அச்சமும் இல்லை; அவர்கள் துக்கப்படவும் மாட்டார்கள்.

2:277. யார் நம்பிக்கை கொண்டு, நற்செயல்களைச் செய்து, தொழுகையைக் கடைப்பிடித்து, ஜகாத்தும் கொடுக்கிறார்களோ, நிச்சயமாக அவர்களுக்கு அவர்களுடைய இறைவனிடத்தில் (நற்)கூலி இருக்கிறது; அவர்களுக்கு அச்சமுமில்லை; அவர்கள் துக்கப்படவும் மாட்டார்கள்.

3:170. அல்லாஹ் தன் அருளிலிருந்து அவர்களுக்கு அளித்ததைக் கொண்டு, அவர்கள் மகிழ்ச்சியடைந்தவர்களாக இருக்கிறார்கள்; மேலும், (போரில் ஈடுபட்டிருந்த தம் நம்பிக்கை கொண்ட சகோதரர்களில் - மரணத்தில்) தம்முடன் சேராமல் (இவ்வுலகில் உயிருடன்) இருப்போரைப் பற்றி; "அவர்களுக்கு எவ்வித பயமுமில்லை; அவர்கள் துக்கப்படவும் மாட்டார்கள்" என்றும் மகிழ்வடைகிறார்கள்.

4:83. மேலும், பாதுகாப்பு அல்லது பயம் பற்றிய ஏதேனும் ஒரு செய்தி அவர்களுக்கு எட்டுமானால் உடனே, அவர்கள் அதைப் பரப்பிவிடுகிறார்கள்; அவர்கள் அதை (அல்லாஹ்வின்) தூதரிடமும் அவர்களில் அதிகாரமுடையவர்களிடமும் தெரிவித்திருந்தால், அவர்களிலிருந்து அதை ஆய்வு செய்பவர்கள் அதனை (நன்கு) அறிந்து கொள்வார்கள்; அல்லாஹ்வின் அருளும், அவனுடைய கிருபையும் உங்கள் மீதில்லாதிருந்தால், (உங்களில்) சிலரைத் தவிர மற்றவர்கள் ஷைத்தானையே பின்பற்றி இருப்பீர்கள்.

5:69. நிச்சயமாக நம்பிக்கை கொண்டவர்கள், யூதர்கள், ஸாபீயின்கள் மற்றும் கிறிஸ்தவர்களில் எவர்கள் அல்லாஹ்வின் மீதும், மறுமை நாள் மீதும் நம்பிக்கை கொண்டு நற்செயல்கள் செய்கிறார்களோ, அவர்களுக்கு எந்தவிதமான பயமுமில்லை. அவர்கள் துக்கப்படவும் மாட்டார்கள்.

7:35. ஆதமுடைய மக்களே! உங்களிடம் உங்களிலிருந்தே தூதர்கள் வந்து என் வசனங்களை உங்களுக்கு விளக்கினால், அப்போது எவர்கள் (என்னை) அஞ்சி, (தம்மை) சீர்திருத்திக் கொண்டார்களோ அவர்களுக்கு அச்சமுமில்லை; அவர்கள் துக்கப்படவும் மாட்டார்கள்.

7:56. மேலும், பூமியில் (அமைதி உண்டாகி) சீர்திருத்தம் செய்யப்பட்ட பின்னர், நீங்கள் குழப்பம் செய்யாதீர்கள்; அச்சத்தோடும், ஆசையோடும் அவனைப் பிரார்த்தியுங்கள்; நிச்சயமாக அல்லாஹ்வின் அருள், நன்மை செய்வோருக்கு மிக சமீபத்தில் இருக்கிறது.

7:205. (நபியே!) நீர் உம் மனத்திற்குள் மிக்க பணிவோடும், அச்சத்தோடும், சொல்லில் உரத்த சப்தமின்றி காலையிலும், மாலையிலும் உம் இறைவனை நீர் நினைவுகூர்வீராக! (அவனை) மறந்துவிட்டிருப்போரில் ஒருவராக நீர் இருக்க வேண்டாம்.

10:62. (நம்பிக்கையாளர்களே!) அறிந்துகொள்ளுங்கள்: நிச்சயமாக அல்லாஹ்வின் நேசர்கள் - அவர்களுக்கு எவ்வித அச்சமுமில்லை; அவர்கள் துக்கப்படவும் மாட்டார்கள்.

10:83. ஃபிர்அவ்னும், அவனுடைய பிரமுகர்களும் தங்களைத் துன்புறுத்துவார்களே என்ற பயத்தின் காரணமாக, மூஸாவின் மீது அவருடைய சமூகத்தாரின் சந்ததியினர் சிலரைத் தவிர (வேறு எவரும்) நம்பிக்கை கொள்ளவில்லை; ஏனெனில், நிச்சயமாக ஃபிர்அவன் அந்தப் பூமியில் வலிமை மிக்கவனாக இருந்தான்; மேலும், அவன் வரம்பு மீறுபவர்களில் உள்ளவனாகவும் இருந்தான்.

11:70. ஆனால், அவர்களுடைய கைகள் அதன் (உணவின்) பக்கம் செல்லாததைக் கண்டு அவர் அவர்களைப்பற்றி ஐயப்பட்டார்; அவர்களைப் பற்றிய பயத்தையும் அவர் (தம்) மனதில் உணர்ந்தார்; (ஆனால்,) அவர்களோ (அவரைப்பார்த்து) "பயப்படாதீர்! நிச்சயமாக நாங்கள் லூத்துடைய சமூகத்தார்பால் அனுப்பப்பட்டிருக்கிறோம்" என்று கூறினார்கள்.

13:12. அவன் எத்தகையவனென்றால், அச்சத்தையும், (அதே நேரத்தில் மழைக்குரிய) ஆதரவையும் தரக்கூடிய நிலையில், மின்னலை அவன்தான் உங்களுக்குக் காட்டுகிறான்; கனத்த மேகத்தையும் அவனே உண்டாக்குகின்றான்.

13:13. மேலும், இடி அவன் புகழைக் கொண்டும், வானவர்கள் அவனை அஞ்சியும் துதிக்கின்றனர்; இன்னும், அவனே இடிகளை அனுப்பி அவற்றைக் கொண்டு, தான் நாடியவரைப் பிடிக்கிறான்; (இவ்வாறிருந்தும்) அவர்கள் அல்லாஹ்வைப் பற்றி தர்க்கிக்கின்றனர்; அவனே மிகுந்த வல்லமை உடையவனாக இருக்கின்றான்.

16:112. மேலும், அல்லாஹ் ஓர் ஊரை (அவர்களுக்கு) உதாரணம் கூறுகிறான்; அது அச்சமில்லாதும், நிம்மதியுடனும் இருந்தது; அதன் உணவு(ம் மற்றும் வாழ்க்கைப் பொருட்கள் யாவும்) ஒவ்வோரிடத்திலிருந்தும் ஏராளமாக வந்துகொண்டிருந்தன; ஆனால், அது (அவ்வூர்) அல்லாஹ்வின் அருட்கொடைகளுக்கு (நன்றிசெலுத்தாமல்) மாறு செய்தது; ஆகவே, அவர்கள் செய்துகொண்டிருந்த (தீச்)செயல்களின் காரணமாக, பசி மற்றும் பயம் என்னும் ஆடையை அல்லாஹ் அதற்கு (அணிவித்து அவற்றை) அனுபவிக்குமாறு செய்தான்.

24:55. உங்களில் எவர் நம்பிக்கை கொண்டு நற்செயல்கள் புரிகிறார்களோ அவர்களை, அவர்களுக்கு முன்னிருந்தோரை (பூமிக்கு) ஆட்சியாளர்களாக்கியதுபோல், பூமிக்கு நிச்சயமாக ஆட்சியாளர்களாக்கி வைப்பதாகவும், இன்னும், அவன் அவர்களுக்காகப் பொருந்திக்கொண்ட அவர்களுடைய மார்க்கத்தை அவர்களுக்காக நிச்சயமாக நிலைப்படுத்துவதாகவும், அவர்களுடைய அச்சத்தைத் திட்டமாக அமைதியைக் கொண்டு மாற்றிவிடுவதாகவும் அல்லாஹ் வாக்களித்திருக்கிறான்; "அவர்கள் என்னோடு (எதையும் எவரையும்) இணைவைக்காது, அவர்கள் என்னையே வணங்குவார்கள்;" இதன் பின்னர் (உங்களில்) எவர் மாறுசெய்(து நிராகரிக்)கிறாரோ அவர்கள்தான் பாவிகள்.

30:24. அச்சமும், ஆசையும் ஏற்படும்படி அவன் உங்களுக்கு மின்னலைக் காட்டுவதும், பிறகு வானத்திலிருந்து மழை பொழியச் செய்து, அதைக் கொண்டு பூமியை - அது (வறண்டு) இறந்த பின்னர் - உயிர்ப்பிப்பதும் அவனுடைய அத்தாட்சிகளினின்றும் உள்ளன; நிச்சயமாக அதில் விளங்குகின்ற சமூகத்திற்கு அத்தாட்சிகள் இருக்கின்றன.

30:28. உங்களிலிருந்தே அவன் உங்களுக்காக ஓர் உதாரணத்தை எடுத்துக்கூறுகிறான்: உங்களுக்கு நாம் வழங்கியவற்றில் உங்களுடைய அடிமைகளிலிருந்து உங்களுக்குக் கூட்டாளிகள் (இருப்பதை நீங்கள் விரும்புவது) உண்டா? நீங்களும் (அவர்களும்) அதில் சமமாக இருந்து, உங்களை(ப் போன்ற சுதந்திரமான பங்காளிகளின் விருப்பு - வெறுப்புகளை) நீங்கள் பயப்படுவது போல் (அடிமைக் கூட்டாளிகளான) இவர்களை நீங்கள் பயப்படுவீர்களா? இவ்வாறாகவே, நாம் நம் அத்தாட்சிகளை விளங்கும் சமூகத்திற்கு விவரிக்கிறோம்.

32:16. அவர்களுடைய விலாக்கள் படுக்கைகளிலிருந்து விலகிவிடும்; அவர்கள் தங்களுடைய இறைவனை அச்சத்தோடும், ஆர்வத்தோடும் பிரார்த்தனை செய்வார்கள்; மேலும், நாம் அவர்களுக்கு அளித்ததிலிருந்து (தானதர்மங்களில்) செலவும் செய்வார்கள்.

33:19. (அவர்கள்) உங்கள்மீது கஞ்சத்தனத்தைக் கைக்கொள்கின்றனர்; ஆனால், (பகைவர்கள் பற்றி) பயம் வந்துவிட்டால், மரணத்தினால் மயக்க நிலை அடைந்தவனைப்போன்று அவர்களுடைய கண்கள் சுழல்கின்ற நிலையில், அவர்கள் உம்மைப் பார்த்துக்கொண்டிருப்பதை நீர் காண்பீர்; ஆனால், அந்தப் பயம் நீங்கிவிட்டாலோ, (போர்க்களத்தில் எதிரிகள் விட்டுச்சென்ற) செல்வப் பொருள்மீது பேராசைகொண்டவர்களாய் கூரிய நாவுக் கொண்டு (கடுஞ் சொற்களால்) உங்களைக் கடிந்து பேசுவார்கள்; இத்தகையோர் (உண்மையாக) நம்பிக்கை கொள்ளவில்லை; ஆகவே, அவர்களுடைய (நற்)செயல்களையும் அல்லாஹ் பாழாக்கிவிட்டான்; இது, அல்லாஹ்வுக்கு மிகவும் எளிதேயாகும்.

43:68. "என்னுடைய அடியார்களே! இந்நாளில் உங்களுக்கு எவ்வித பயமுமில்லை; நீங்கள் துக்கப்படவும் மாட்டீர்கள்" (என்று நம்பிக்கையாளர்களுக்கு அல்லாஹ்வின் அறிவிப்பு வரும்).

46:13. நிச்சயமாக எவர்கள், "எங்கள் இறைவன் அல்லாஹ்வே" என்று கூறி, பிறகு அதிலேயே நிலைத்து நிற்கிறார்களோ அவர்களுக்குப் பயமில்லை; அவர்கள் துக்கப்படவும் மாட்டார்கள்.

106:4. அவனே, பசியின்போது அவர்களுக்கு உணவளித்தான்; மேலும், அவர்களுக்கு அச்சத்திலிருந்தும் அபயமளித்தான்.