3:49. இஸ்ராயீலின் சந்ததியினருக்குத் தூதராகவும் (அவரை ஆக்குவான்; இவ்வாறு அவர் ஆகியதும் அவர்களிடம், அவர்:) "நான் உங்கள் இறைவனிடமிருந்து ஓர் அத்தாட்சியுடன் நிச்சயமாக வந்துள்ளேன்; நான் உங்களுக்காக களிமண்ணால் ஒரு பறவையின் உருவத்தைப்போல் உண்டாக்கி நான் அதில் ஊதுவேன்; அது அல்லாஹ்வின் அனுமதியைக்கொண்டு (உயிருடைய) பறவையாகி விடும்; அல்லாஹ்வின் அனுமதியைக்கொண்டு பிறவிக் குருடனையும், வெண் குஷ்டரோகியையும் குணப்படுத்துவேன்; இறந்தோரையும் உயிர்ப்பிப்பேன்; நீங்கள் உண்பவற்றையும், நீங்கள் உங்கள் வீடுகளில் சேமித்துவைப்பவற்றையும் நான் உங்களுக்கு எடுத்துக்கூறுவேன்; நீங்கள் நம்பிக்கையாளர்களாக இருந்தால் நிச்சயமாக இவற்றில் உங்களுக்குத் (திடமான) ஓர் அத்தாட்சி இருக்கிறது" (என்று கூறினார்).

6:9. மேலும், (நம் தூதரான) அவரை ஒரு வானவராக (மலக்காக) நாம் ஆக்கியிருந்தால், அவரையும் நாம் மனிதராகவே ஆக்கி அனுப்பியிருப்போம்; எதில் குழம்பிப்போனார்களோ அதே குழப்பத்தை (அப்போது மீண்டும்) ஏற்படுத்தியிருப்போம்.

21:52. அவர் தம் தந்தையிடமும், தம் சமூகத்தாரிடமும், "நீங்கள் வழிபடும் இந்த உருவங்கள் என்ன?" என்று கேட்டபோது,

40:64. அல்லாஹ்தான் உங்களுக்கு இப்பூமியைத் தங்குமிடமாகவும், வானத்தை ஒரு விதானமாகவும் உண்டாக்கியிருக்கிறான்; மேலும், அவன்தான் உங்களை உருவாக்கி, உங்கள் உருவங்களை அழகாக்கி, நல்லவற்றிலிருந்து உங்களுக்கு உணவும் அளித்தான்; அவன்தான் அல்லாஹ்; உங்களுடைய இறைவன்; அகிலத்தாருக்கெல்லாம் இறைவனாகிய அல்லாஹ் மிகப் பாக்கியமுடையவன்.

56:61. (அன்றியும், உங்களைப் போக்கிவிட்டு) உங்களைப் போன்றோரைப் பதிலாகக் கொண்டு வந்து நீங்கள் அறியாத (உருவத்)தில் உங்களை உண்டாக்கவும் (நாம் இயலாதவர்கள் அல்ல).

59:24. அவன்தான் அல்லாஹ்; படைப்பவன்; (ஒழுங்குபடுத்தி) உண்டாக்குபவன்; உருவமளிப்பவன்; அவனுக்கு அழகிய திருநாமங்கள் இருக்கின்றன; வானங்களிலும், பூமியிலும் உள்ளவை யாவும் அவனையே தஸ்பீஹ் (துதி) செய்கின்றன; அவனே (யாவரையும்) மிகைத்தவன்; ஞானம் மிக்கவன்.

64:3. வானங்களையும், பூமியையும் அவன் சத்தியத்துடன் (தக்க முறையில்) படைத்துள்ளான்; அன்றியும், உங்களுக்கு உருவம் அமைத்தான்; பின்னர், உங்கள் உருவங்களையும் அழகாக்கினான்; அவனிடம்தான் (யாவருக்கும்) மீளுதல் இருக்கிறது.