2:128. "எங்கள் இறைவனே! எங்கள் இருவரையும் உனக்குக் கட்டுப்பட்டோராக ஆக்குவாயாக! எங்கள் சந்ததியினரிடமிருந்தும் உனக்குக் கட்டுப்படும் ஒரு கூட்டத்தினரை ஆக்கிவைப்பாயாக! நாங்கள் உன்னை வழிபடும் வழிகளையும் அறிவிப்பாயாக! எங்களை மன்னிப்பாயாக! நிச்சயமாக நீயே மிக்க மன்னிப்போனும் அளவிலா அன்புடையோனாகவும் இருக்கின்றாய்!"

2:134. அது ஒரு சமூகம்; திட்டமாக அது சென்றுவிட்டது; அவர்கள் சம்பாதித்தவை அவர்களுக்கே; நீங்கள் சம்பாதித்தவை உங்களுக்கே! அவர்கள் செய்துகொண்டிருந்ததைப் பற்றி நீங்கள் கேட்கப்படமாட்டீர்கள்.

2:141. அது ஒரு சமூகம்; திட்டமாக அது சென்றுவிட்டது; அவர்கள் சம்பாதித்தவை அவர்களுக்கே! நீங்கள் சம்பாதித்தவை உங்களுக்கே! அவர்கள் செய்துகொண்டிருந்தது பற்றி நீங்கள் கேட்கப்படமாட்டீர்கள்.

2:143. இதே முறையில் நாம் உங்களை ஒரு நடுநிலையுள்ள சமுதாயமாக ஆக்கியுள்ளோம்; (அப்படி ஆக்கியது) நீங்கள் (மற்ற) மனிதர்களுக்குச் சாட்சியாளர்களாக இருப்பதற்காகவும், தூதர் உங்களுக்குச் சாட்சியாளராக இருப்பதற்காகவுமேயாகும்; யார் (நம்) தூதரைப் பின்பற்றுகிறார்கள், யார் (அவரைப் பின்பற்றாமல்) தம் இரு குதிங்கால்கள்மீது பின்திரும்பிச் செல்கிறார்கள் என்பதை நாம் அறிவிப்பதற்காகவேயன்றி, எதன் மீது (இதுவரை) நீர் இருந்து வந்தீரோ அந்தக் கிப்லாவை நாம் (மாற்றி) அமைக்கவில்லை; இது அல்லாஹ் நேர்வழி காட்டியோருக்குத் தவிர மற்றவர்களுக்கு நிச்சயமாக ஒரு பளுவாகவே இருக்கிறது; அல்லாஹ் உங்கள் நம்பிக்கையை வீணாக்கமாட்டான்; நிச்சயமாக அல்லாஹ் மனிதர்கள்மீது கருணை காட்டுபவன், நிகரற்ற அன்புடையவன்.

2:213. (ஆரம்பத்தில்) மனிதர்கள் ஒரே கூட்டத்தினராகவே இருந்தனர்; பிறகு (நன்மை செய்வோருக்கு) நன்மாராயம் கூறுவோராகவும், (தீமை செய்வோருக்கு) அச்சமூட்டி எச்சரிப்போராகவும் அல்லாஹ் நபிமார்களை அனுப்பி வைத்தான்; அத்துடன் மனிதர்களிடையே ஏற்படும் கருத்து வேறுபாடுகளைத் தீர்த்து வைப்பதற்காக அவர்களுடன் உண்மையுடைய வேதத்தையும் இறக்கி வைத்தான்; எனினும், அ(வ்வேதத்)தைக் கொடுக்கப்பட்டவர்களே அவர்களிடம் தெளிவான ஆதாரங்கள் வந்த பின்னரும், தம்மிடையே உண்டான பொறாமை காரணமாக மாறுபட்டார்கள்; ஆயினும், உண்மையிலிருந்து எதில் அவர்கள் மாறுபட்டிருந்தார்களோ, அதன் பக்கம் தன் அருளினால் அல்லாஹ் நம்பிக்கை கொண்டோருக்கு நேர்வழி காட்டினான்; இவ்வாறே, அல்லாஹ் தான் நாடியோரை நேர்வழியில் செலுத்துகின்றான்.

3:104. மேலும், (மக்களை) நன்மையின் பக்கம் அழைப்பவர்களாகவும், நல்லதைக் கொண்டு ஏவுபவர்களாகவும், தீயதிலிருந்து தடுப்பவர்களாகவும் உங்களிலிருந்து ஒரு கூட்டத்தார் இருக்கட்டும்; இன்னும், அவர்களே வெற்றி பெற்றோராவர்.

3:110. மனிதர்களுக்காகத் தோற்றுவிக்கப்பட்ட (சமுதாயத்தில்) சிறந்த சமுதாயமாக நீங்கள் இருக்கிறீர்கள்; (ஏனெனில்,) நீங்கள் நல்லதை(ச் செய்ய) ஏவுகிறீர்கள்; தீயதைவிட்டும் தடுக்கிறீர்கள்; இன்னும், அல்லாஹ்வின் மீது நம்பிக்கை கொள்கிறீர்கள்; வேதத்தையுடையோரும் (உங்களைப்போன்றே) நம்பிக்கை கொண்டிருப்பின், (அது) அவர்களுக்கு நன்மையாகும்; அவர்களில் நம்பிக்கையாளர்களும் இருக்கின்றனர்; எனினும், அவர்களில் பலர் பாவிகளாகவே இருக்கின்றனர்.

3:113. (எனினும், வேதத்தையுடையோராகிய) அவர்கள் (எல்லோரும்) சமமல்லர்; வேதத்தையுடையோரில் (நேர்வழியில்) நிற்கும் ஒரு கூட்டத்தினர் இருக்கின்றனர்; இரவு நேரங்களில் அல்லாஹ்வின் வசனங்களை ஓதுகிறார்கள்; இன்னும், அவர்கள் ஸஜ்தா செய்கிறார்கள்.

4:41. எனவே, (நபியே!) ஒவ்வொரு கூட்டத்தினரையும் (அவர்களுடைய) சாட்சியுடன் நாம் கொண்டுவரும்போது, நாம் இவர்கள்மீது சாட்சியாக உம்மையும் கொண்டுவந்தால் (உம்மை நிராகரிக்கும் இவர்களின் நிலைமை) எப்படி இருக்கும்?

5:48. மேலும், (நபியே! முற்றிலும்) உண்மையைக் கொண்டுள்ள இவ்வேதத்தை நாம் உம்மீது இறக்கியுள்ளோம்; இது, தனக்கு முன்னிருந்த (ஒவ்வொரு) வேதத்தை(யும்) மெய்ப்படுத்தக் கூடியதாகவும் அதைப் பாதுகாப்பதாகவும் இருக்கின்றது; எனவே, அல்லாஹ் இறக்கிவைத்த (வேதத்)தைக்கொண்டு அவர்களிடையே நீர் தீர்ப்புச்செய்வீராக! உமக்கு வந்த உண்மையைப் புறக்கணித்துவிட்டு அவர்களுடைய மன இச்சைகளை நீர் பின்பற்றவேண்டாம்; உங்களில் ஒவ்வொரு (கூட்டத்த)வருக்கும் மார்க்கத்தையும், வழிமுறையையும் நாம் ஏற்படுத்தியுள்ளோம்: அல்லாஹ் நாடினால் உங்கள் அனைவரையும் ஒரே சமுதாயத்தவராக ஆக்கியிருக்கலாம்; ஆனால், அவன் உங்களுக்குக் கொடுத்தவற்றில் உங்களைச் சோதிப்பதற்காகவே (இவ்வாறு செய்திருக்கிறான்); எனவே, நன்மையானவற்றின் பால் முந்திக்கொள்ளுங்கள், நீங்கள் யாவரும் அல்லாஹ்வின் பக்கமே மீளவேண்டியிருக்கிறது; நீங்கள் எதில் மாறுபட்டுக் கொண்டிருந்தீர்களோ அத(ன் உண்மையி)னை அவன் உங்களுக்கு அறிவிப்பான்.

5:66. இன்னும், அவர்கள் தவ்ராத்தையும், இன்ஜீலையும், இன்னும் தம் இறைவனிடத்திலிருந்து தங்களுக்கு இறக்கப்பட்டதையும் நிலைநாட்டியிருந்தால், அவர்கள் மேலே (வானத்தில்) இருந்தும், தம் கால்களுக்கு அடியில் (பூமியில்) இருந்தும் (உணவுகளைப்) புசித்திருப்பார்கள்; அவர்களில் சிலர் (தாம்) நேர்வழியுள்ள சமுதாயத்தினராய் இருக்கின்றனர்; இன்னும், அவர்களில் பெரும்பாலோர் செய்யும் காரியங்கள் மிகக் கெட்டவையேயாகும்.

6:38. பூமியிலுள்ள எந்த உயிரினமும், தன் இரு சிறகுகளால் பறக்கின்ற எந்தப் பறவையும் உங்களைப்போன்ற இனங்களேயன்றி வேறில்லை; (இவற்றில்) எதையும் (நம் பதிவுப்) புத்தகத்தில் நாம் குறிப்பிடாமல் விட்டுவிடவில்லை; பிறகு, தம் இறைவனின்பால் அவை ஒன்று சேர்க்கப்படும்.

6:42. (நபியே!) உமக்கு முன்னர் இருந்த சமுதாயங்களுக்கும் நாம் (நம்) தூதர்களைத் திட்டமாக அனுப்பினோம்; அவர்களை நோயைக் கொண்டும், வறுமையைக் கொண்டும் நாம் பிடித்தோம் - அவர்கள் பணிந்துவரும் பொருட்டு.

6:108. அல்லாஹ்வையன்றி அவர்கள் அழைத்துக் கொண்டிருப்போரை நீங்கள் திட்டாதீர்கள்; (அப்படித் திட்டினால்) அப்போது அவர்கள் அறிவில்லாமல், வரம்புமீறி அல்லாஹ்வைத் திட்டுவார்கள்; இவ்வாறே, ஒவ்வொரு சமூகத்தாருக்கும் அவர்களுடைய செயலை நாம் அழகாக ஆக்கியுள்ளோம்; பின்பு அவர்களுடைய மீட்சி அவர்களின் இறைவனிடமே இருக்கிறது: அப்போது அவர்கள் செய்துகொண்டிருந்ததை அவர்களுக்கு அவன் அறிவிப்பான்.

7:34. ஒவ்வொரு கூட்டத்தாருக்கும் (அவர்கள் வாழவும், அழியவும்) ஒரு காலக்கெடு உண்டு; அவர்களுடைய கெடு வந்துவிட்டால், அவர்கள் ஒரு கணப்பொழுதேனும் பிந்தவும் மாட்டார்கள்; முந்தவும் மாட்டார்கள்.

7:38. (அல்லாஹ்) கூறுவான்: ஜின்களிலிருந்தும், மனிதர்களிலிருந்தும் உங்களுக்குமுன் சென்றுவிட்ட கூட்டத்தார்களுடன் நீங்களும் (நரக) நெருப்பில் நுழையுங்கள்; ஒவ்வொரு கூட்டத்தாரும், நரகத்தில் நுழையும்போதெல்லாம், (தங்களுக்குமுன் அங்கு வந்துள்ள) தம்முடைய சக கூட்டத்தினரைச் சபிப்பார்கள்; முடிவாக, அவர்கள் யாவரும் அ(ந்நரகத்)தில் சேர்ந்துவிட்டபொழுது அவர்களில் பிந்தியவர்கள், முந்தியவர்களைப் பற்றி, "எங்கள் இறைவனே! இவர்கள்தான் எங்களை வழிகெடுத்தார்கள்; ஆதலால், இவர்களுக்கு நரகத்தில் இருமடங்கு வேதனையைக் கொடு" என்று சொல்வார்கள்; அவன் கூறுவான்: "உங்களில் ஒவ்வொருவருக்கும் இரட்டிப்பு (வேதனை) உண்டு; ஆனால், நீங்கள் அதை அறியமாட்டீர்கள்."

7:159. இன்னும், மூஸாவுடைய சமூகத்தாரில் ஒரு கூட்டத்தினர் இருக்கின்றனர்; அவர்கள் சத்தியத்தைக் கொண்டு (மக்களுக்கு) வழிகாட்டுகின்றனர்; அதன்படி நீதியும் செய்கின்றனர்.

7:160. (மூஸாவின் கூட்டத்தாராகிய) அவர்களை நாம் பன்னிரண்டு பிரிவினர்களாக - கூட்டங்களாகப் பிரித்தோம்; மூஸாவுக்கு, அவருடைய சமூகத்தினர் அவரிடம் அவர்கள் தண்ணீர் கேட்டபோது, "உம்முடைய கைத்தடியால் அக்கல்லை அடிப்பீராக!" என்று நாம் 'வஹீ' அறிவித்தோம்; (அவர் அவ்வாறு அடித்ததும்) அதிலிருந்து பன்னிரண்டு ஊற்றுகள் பொங்கிவந்தன; அவர்களில் ஒவ்வொரு வகுப்பாரும் தாம் (நீர்) அருந்தும் ஊற்றை அறிந்துகொண்டார்கள்; மேலும், அவர்கள் மீது மேகம் நிழலிடும்படிச் செய்தோம்; அவர்களுக்கு 'மன்னு ஸல்வா'வையும் (மேலான உணவாக) இறக்கிவைத்து, "நாம் உங்களுக்கு அளித்துள்ள தூயவற்றிலிருந்து புசியுங்கள்!" (என்று சொன்னோம்; அவ்வாறிருந்தும், அவர்கள் அல்லாஹ்வுக்கு மாறுசெய்தார்கள்); அவர்கள் நமக்கு அநியாயம் செய்யவில்லை; எனினும், அவர்கள் தமக்குத்தாமே அநியாயம் செய்துகொண்டிருந்தனர்.

7:164. (அவ்வூரிலிருந்த நல்லடியார் சிலர் அறிவுரை சொன்னபோது) அவர்களில் சிலர், "அல்லாஹ் எவர்களை அழிக்கவோ, அல்லது கடினமான வேதனைக்குள்ளாக்கவோ இருக்கிறானோ, அந்தக் கூட்டத்தாருக்கு நீங்கள் ஏன் உபதேசம் செய்கிறீர்கள்?" என்று கேட்டார்கள். அதற்கு (அந்த நல்லடியார்கள்), "உங்கள் இறைவனிடம் (நம்) பொறுப்பிலிருந்து நீங்கிவிடுவதற்காகவும், இன்னும், அவர்கள் (அல்லாஹ்வை) அஞ்சிவிடலாம் என்பதற்காகவும் (நாங்கள் உபதேசம் செய்கிறோம்)" என்று கூறினார்கள்.

7:168. அவர்களை நாம் பூமியில் பல பிரிவினராக (சிதறித் திரியுமாறு) பிரித்துவிட்டோம்; அவர்களில் நல்லவர்களும் இருக்கின்றார்கள்; அதுவல்லாத (கெட்ட)வர்களும் அவர்களில் இருக்கின்றார்கள் - அவர்கள் (நன்மையின் பால்) திரும்பும் பொருட்டு அவர்களை நன்மைகளைக் கொண்டும், தீமைகளைக் கொண்டும் சோதித்தோம்.

7:181. நாம் படைத்தவர்களில் ஒரு கூட்டத்தார் இருக்கின்றார்கள்; அவர்கள் சத்தியத்தைக் கொண்டு (மனிதர்களுக்கு) வழிகாட்டுகிறார்கள்; அதைக்கொண்டே அவர்கள் நீதியும் செலுத்துகிறார்கள்.

10:19. மனிதர்கள் யாவரும் (ஆதியில்) ஒரே சமுதாயத்தினராகவே தவிர இருக்கவில்லை; பின்னர், அவர்கள் மாறுபட்டுக்கொண்டனர்; உமது இறைவனிடமிருந்து (இம்மையின் கூலி மறுமையில் பூரணமாகக் கொடுக்கப்படும் என்ற) ஒரு வார்த்தை முந்தி ஏற்பட்டிருக்காவிட்டால், அவர்கள் எ(ந்த விஷயத்)தில் மாறுபட்டிருக்கின்றனரோ, அதைப்பற்றி அவர்களிடையே (இதற்குள்) முடிவுசெய்யப்பட்டிருக்கும்.

10:47. ஒவ்வொரு சமூகத்தாருக்கும் (நாம் அனுப்பிய) தூதர் உண்டு; அவர்களுடைய தூதர் (அவர்களிடம்) வரும்போது அவர்களுக்கிடையில் நியாயத்துடனேயே தீர்ப்பளிக்கப்படும்; அவர்கள் (ஒரு சிறிதும்) அநியாயம் செய்யப்படமாட்டார்கள்.

10:49. (நபியே!) நீர் கூறும்: "அல்லாஹ் நாடியதைத் தவிர எனக்கு எவ்வித தீமையோ, நன்மையோ எனக்கே செய்துகொள்ள, நான் எவ்வித அதிகாரமும் பெற்றிருக்கவில்லை; ஒவ்வொரு சமூகத்தினருக்கும் ஒரு (குறிப்பிட்ட காலத்) தவணையுண்டு; அவர்களது தவணை வந்துவிட்டால் ஒரு நாழிகை பிந்தவும் மாட்டார்கள்; முந்தவும் மாட்டார்கள்."

11:48. "நூஹே! உம்மீதும், உம்மோடு இருக்கின்ற சமூகத்தவர்கள் மீதும் நம்முடைய சாந்தியுடனும், பாக்கியங்களுடனும் நீர் இறங்குவீராக! இன்னும், சில சமூகத்தவர்கள் - அவர்களை நாம் சுகம் அனுபவிக்கச் செய்வோம்; பின்னர், நம்மிடமிருந்து நோவினைதரும் வேதனை அவர்களைத் தீண்டும்" என்று கூறப்பட்டது.

13:30. (நபியே!) நாம் உம்மை இவ்வாறே ஒரு கூட்டத்தாரிடம் அனுப்பிவைத்தோம்; இவர்களுக்கு முன்னரும் பல கூட்டத்தினர் நிச்சயமாகச் சென்றிருக்கிறார்கள்; நாம் உம்மீது எதை வஹீயாக அறிவித்தோமோ அதை இவர்களுக்கு ஓதிக் காண்பிப்பதற்காக (உம்மை அனுப்பினோம்); ஆனால், இவர்களோ அளவற்ற அருளாளனை நிராகரிக்கின்றனர்; அவர்களிடம், "அவனே என் இறைவன்; அவனைத்தவிர வேறு எந்தக் கடவுளுமில்லை; அவனையே நான் (முழுமையாகச்) சார்ந்துள்ளேன்; அவனிடமே (என்னுடைய) மீட்சியும் இருக்கிறது" என்று நீர் கூறுவீராக!

15:5. எந்த ஒரு கூட்டத்தாரும் தமக்குரிய தவணைக்கு முந்தவும் மாட்டார்கள்; பிந்தவும் மாட்டார்கள்.

16:36. மெய்யாக நாம் ஒவ்வொரு சமூகத்தாரிடத்திலும், "அல்லாஹ்வையே நீங்கள் வணங்குங்கள்; ஷைத்தான்களைவிட்டும் நீங்கள் விலகிச்செல்லுங்கள்" என்று (போதிக்குமாறு) நம் தூதரை அனுப்பிவைத்தோம்; எனவே, அ(ந்த சமூகத்த)வர்களில் அல்லாஹ் நேர்வழிகாட்டியோரும் இருக்கிறார்கள்; வழிகேடே விதிக்கப்பெற்றோரும் அவர்களில் இருக்கிறார்கள்; ஆகவே, நீங்கள் பூமியில் சுற்றுப்பயணம் செய்து, பொய்யர்களின் முடிவு என்ன ஆயிற்று? என்பதைக் கவனியுங்கள்.

16:63. அல்லாஹ்வின் மீது சத்தியமாக! உமக்கு முன்னிருந்த வகுப்பாருக்கும் நாம் (தூதர்களை) அனுப்பிவைத்தோம்; ஆனால், ஷைத்தான் அவர்களுக்கு அவர்களுடைய (தீய) செயல்களையே அழகாக்கிவைத்தான்; ஆகவே, இன்றையதினம் அவர்களுக்கும் அவனே உற்ற தோழனாக இருக்கின்றான்; இதனால், அவர்களுக்கு நோவினைசெய்யும் வேதனையுண்டு.

16:84. ஒவ்வொரு சமூகத்தாரிலிருந்தும் ஒரு சாட்சியை நாம் எழுப்பும் (நாளை நினைவூட்டுவீராக! அந்) நாளில் நிராகரிப்பவர்களுக்கு(ப் புகல் கூறுவதற்கு) அனுமதி வழங்கப்படமாட்டாது; இன்னும், அவர்கள் (அல்லாஹ்வுக்குப் பொருத்தமானதை செய்து, அவ்வேளை தண்டனைக்குத் தப்பித்துக்கொள்ளவும்) இடங்கொடுக்கப்படமாட்டார்கள்.

16:89. இன்னும், ஒவ்வொரு சமூகத்திலும் அ(ந்த சமூகத்த)வர்களிலிருந்தே அவர்களுக்கு எதிராக சாட்சியை எழுப்பும் நாளில், உம்மை இம்மக்களுக்கு எதிராக சாட்சியாக நாம் கொண்டு வருவோம்; மேலும், இவ்வேதத்தை ஒவ்வொரு பொருளுக்கும் விளக்கமாகவும், நேர்வழியாகவும், அருளாகவும், முஸ்லிம்களுக்கு நன்மாராயமாகவும் உம்மீது நாம் இறக்கிவைத்திருக்கிறோம்.

16:92. நீங்கள் (சத்தியத்தை முறிக்கும் இவ்விஷயத்தில்) உறுதியாக நூற்று, பின்னர் நூற்றதைத் துண்டுதுண்டாக ஆக்கியவளைப் போல் ஆகிவிடாதீர்கள்: ஒரு சமூகத்தார் மற்றொரு சமூகத்தாரைவிட அதிகமானவர்களாக இருக்கிறார்கள் என்னும் காரணத்தால், நீங்கள் உங்கள் சத்தியங்களை உங்களுக்கிடையில் ஏமாற்றுவதற்குச் சாதனங்களாக்கிக் கொள்கிறீர்கள்; நிச்சயமாக அல்லாஹ் உங்களைச் சோதிப்பதெல்லாம் இதன் மூலமாகத்தான்; இன்னும், நீங்கள் எ(வ்விஷயத்)தில் பேதப்பட்டுக் கொண்டிருந்தீர்களோ (அதனை) அவன் உங்களுக்கு மறுமைநாளில் தெளிவாக்குவான்.

16:93. மேலும், அல்லாஹ் நாடியிருந்தால் உங்களை ஒரே சமுதாயத்தவராய் ஆக்கியிருப்பான்; என்றாலும், தான் நாடியவர்களை வழிகேட்டிலேயே விட்டு வைக்கிறான்; இன்னும், தான் நாடியவர்களை நேர்வழியில் சேர்ப்பான்; நீங்கள் செய்து கொண்டிருந்தவைப்பற்றி நிச்சயமாக (மறுமையில்) நீங்கள் கேட்கப்படுவீர்கள்.

21:92. நிச்சயமாக உங்கள் சமுதாயம் (வேற்றுமை ஏதுமில்லா) ஒரே சமுதாயம்தான்; மேலும், நானே உங்கள் இறைவன்; ஆகையால், என்னையே நீங்கள் வணங்குங்கள்.

22:34. இன்னும், கால்நடைகளிலிருந்து அவன் அவர்களுக்கு உணவாக்கியுள்ள (ஆடு, மாடு, ஒட்டகம் போன்ற) வற்றின் மீது அவர்கள் அல்லாஹ்வின் பெயரைக் கூறும்படிச் செய்வதற்காகவே ஒவ்வொரு வகுப்பாருக்கும் பலியை நாம் (கடமையாக) ஆக்கியிருக்கிறோம்; ஆகவே, உங்கள் இறைவன் ஒரே இறைவன்தான்; எனவே, அவ(ன் ஒருவ)னுக்கே நீங்கள் முற்றிலும் வழிப்படுங்கள்; (நபியே!) உள்ளச்சம் உடையவர்களுக்கு நீர் நன்மாராயம் கூறுவீராக!

22:67. (நபியே!) நாம் ஒவ்வொரு சமுதாயத்தினருக்கும் (அந்தந்த காலத்திற்குத் தக்கவாறு) ஒரு வழிபாட்டு முறையை ஏற்படுத்தினோம்; அதனை அவர்கள் செய்கிறவர்களாக இருக்கின்றனர்; எனவே, இக்காரியத்தில் அவர்கள் திடமாக உம்மிடம் பிணங்கவேண்டாம்; இன்னும், நீர் (அவர்களை) உம்முடைய இறைவன் பக்கம் அழைப்பீராக! நிச்சயமாக நீர் நேர்வழியில் இருக்கின்றீர்.

23:43. எந்த ஒரு சமுதாயத்தவரும் தமக்குரிய தவணையை முந்தவும் மாட்டார்கள்; பிந்தவும் மாட்டார்கள்.

23:44. பின்னரும், நாம் நம்முடைய தூதர்களைத் தொடர்ச்சியாக அனுப்பிவைத்தோம்; ஒரு சமுதாயத்திடம் அதன் தூதர் வந்தபோதெல்லாம், அவர்கள் அவரைப் பொய்யாக்கவே முற்பட்டார்கள்; ஆகவே, (அழிவில்) அவர்களில் சிலரைச் சிலருக்கு (ஒருவருக்குப்பின் ஒருவராக) நாம் தொடரச்செய்தோம்; இன்னும், அவர்களைப் (பிற்காலத்தவர் பேசும்) வெறுங்கதைகளாக ஆக்கிவிட்டோம்; எனவே, நம்பிக்கை கொள்ளாத மக்களுக்கு (அல்லாஹ்வின் அருள்) நெடுந்தொலைவேயாகும்.

23:52. "இன்னும், நிச்சயமாக இது (இஸ்லாம்) ஒரே மார்க்கமான உங்களுடைய மார்க்கமாகும்; மேலும், நானே உங்களுடைய இறைவனாக இருக்கின்றேன்; எனவே, நீங்கள் எனக்கே அஞ்சுங்கள்" (என்றும் கூறினோம்).

27:83. (அவர்களிலுள்ள) ஒவ்வொரு சமுதாயத்தாரிலும் நம் வசனங்களைப் பொய்ப்பித்தவர்களை ஒரு படையாக நாம் சேகரிக்கும் நாளை (நபியே! நீர் நினைவூட்டுவீராக!); பின்னர் (மறுமையில் முன்னுள்ளவர்கள், பின்னுள்ளவர்களுடன் சேர்ந்துகொள்வதற்காக) அவர்கள் நிறுத்திவைக்கப்படுவர்.

28:75. இன்னும், நாம் ஒவ்வொரு சமுதாயத்திலிருந்தும் ஒரு சாட்சியை வெளிப்படுத்துவோம்; பிறகு (நிராகரிப்பாளர்களை நோக்கி) "உங்கள் ஆதாரத்தைக் கொண்டுவாருங்கள்" என்று கூறுவோம்; அப்பொழுது அவர்கள் சத்தியமென்பது அல்லாஹ்வுக்கே சொந்தமென்றும், அவர்கள் இட்டுக்கட்டியவையெல்லாம் அவர்களை விட்டும் மறைந்துவிடும் என்றும் அறிந்து கொள்வார்கள்.

29:18. இன்னும், நீங்கள் பொய்ப்பிக்க முற்பட்டால் (தளர்ந்து போவதில்லை; ஏனெனில்,) உங்களுக்கு முன்னிருந்த சமுதாயத்தவரும் (அவர்களுக்கு அனுப்பப்பட்ட தூதர்களை இவ்வாறே) பொய்ப்பிக்க முற்பட்டார்கள்; ஆகவே, (இறைத்) தூதரின் கடமை (தம் தூதை) பகிரங்கமாக எடுத்துரைப்பதன்றி (வேறு) இல்லை.

35:24. நிச்சயமாக நாம் உம்மை உண்மையைக் கொண்டு நன்மாராயம் கூறுபவராகவும், அச்சமூட்டி எச்சரிப்பவராகவுமே அனுப்பியுள்ளோம்; அச்சமூட்டி எச்சரிக்கை செய்பவர் வராத எந்தச் சமுதாயத்தவரும் (பூமியில்) இல்லை.

35:42. அவர்களிடம் அச்சமூட்டி எச்சரிப்பவர் எவரும் வருவாராயின், நிச்சயமாக தாங்கள் மற்றெந்த ஒரு சமுதாயத்தையும் விட மிக நேரான பாதையில் ஆகிவிடுவதாக அவர்கள் அல்லாஹ்வின் மீது பலமாக சத்தியம் செய்தார்கள்; ஆயினும், அவர்களிடம் அச்சமூட்டி எச்சரிப்பவர் வந்தபோது, (அது) அவர்களுக்கு வெறுப்பைத் தவிர (வேறெதையும்) அதிகப்படுத்தவில்லை.

40:5. இவர்களுக்கு முன்னரே நூஹின் சமூகத்தாரும், அவர்களுக்குப் பிந்திய கூட்டங்களும் (நபிமார்களைப்) பொய்ப்பித்தார்கள்; அன்றியும், ஒவ்வொரு சமுதாயமும் தன்னிடம் வந்த தூதர்களைப் (குற்றம் கண்டு) பிடிக்கக் கருதி, உண்மையை அழித்துவிடுவதற்காகப் பொய்யைக் கொண்டும் தர்க்கம் செய்தது; ஆனால், நான் அவர்களைப் பிடித்தேன்; (இதற்காக அவர்கள் மீது விதிக்கப்பெற்ற என் தண்டனை எவ்வாறு இருந்தது?)

41:25. நாம் அவர்களுக்கு (தீய) கூட்டாளிகளை இணைத்துவிட்டோம்; ஆகவே, அவர்கள் (அத் தீயகூட்டாளிகள்) அவர்களுக்கு முன்னாலிருப்பதையும் பின்னால் இருப்பதையும் அழகாக்கிக் காண்பித்தார்கள்; அன்றியும், அவர்களுக்கு முன்னே சென்றுபோன ஜின்களும் மனிதர்களுமாகிய சமூகத்தார்களுடன் இவர்கள் மீதும் (நம்) வாக்கு உறுதியாகிவிட்டது; நிச்சயமாக அவர்கள் நஷ்டவாளிகளாயினர்.

42:8. அல்லாஹ் நாடியிருந்தால், நிச்சயமாக அவர்களை அவன் ஒரே சமுதாயமாக ஆக்கியிருப்பான்; எனினும், அவன் தான் நாடியவர்களைத் தன்னுடைய கிருபையில் நுழைவிப்பான்; அநியாயக்காரர்களோ அவர்களுக்கு எந்தப் பாதுகாவலனும் இல்லை; எந்த உதவியாளனும் இல்லை.

43:22. அப்படியல்ல! அவர்கள் கூறுகிறார்கள்: "நிச்சயமாக நாங்கள் எங்களுடைய மூதாதையர்களை ஒரு மார்க்கத்தில் கண்டோம்; நிச்சயமாக நாங்கள் அவர்களுடைய அடிச்சுவடுகளின் மீதே நேர்வழி பெற்றவர்களாக இருக்கிறோம்."

43:23. இவ்வாறே உமக்கு முன்னரும் நாம் அச்சமூட்டி எச்சரிப்பவரை எந்த ஊருக்கு அனுப்பினாலும் அதனுடைய செல்வந்தர்கள்: "நிச்சயமாக நாங்கள் எங்கள் மூதாதையரை ஒரு மார்க்கத்தில் கண்டோம்; நிச்சயமாக நாங்கள் அவர்களின் அடிச்சுவடுகளையே பின்பற்றுபவர்களாக இருக்கிறோம்" என்று கூறாதிருக்கவில்லை.

43:33. (நிராகரிப்போருக்கு நாம் கொடுக்கும் செல்வத்தைக் கண்டு) மனிதர்கள் (நிராகரிக்கும்) ஒரே சமுதாயமாக ஆகிவிடுவார்கள் என்பது இல்லாவிட்டால், அவர்களின் வீடுகளுக்குரிய முகடுகளையும், அவற்றுக்கு அவர்கள் ஏறிச்செல்லும் படிகளையும் நாம் வெள்ளியினால் ஆக்கியிருப்போம்.

46:18. இவர்கள் எத்தகையோரென்றால் இவர்களுக்கு முன் ஜின்கள், மனிதர்களிலிருந்து திட்டமாகச் சென்றுவிட்ட சமுதாயத்தவர்களில் (நம் தண்டனையின்) வாக்கு இவர்களின் மீதும் உறுதியாகிவிட்டது; நிச்சயமாக இவர்கள் நஷ்டவாளிகளாய் ஆகிவிட்டனர்.