4:164. (இவர்களைப் போன்றே வேறு) தூதர்கள் சிலரையும் (நாம் அனுப்பி) அவர்களுடைய சரித்திரங்களையும் உமக்கு, நாம் முன்னர் கூறியுள்ளோம்; இன்னும், (வேறு) தூதர்கள் (பலரையும் நாம் அனுப்பினோம்; ஆனால்,) அவர்களின் சரித்திரங்களை உமக்குக் கூறவில்லை; இன்னும், மூஸாவுடன் அல்லாஹ் உறுதியாகப் பேசியும் இருக்கின்றான்.

7:101. (நபியே!) இந்த ஊர்கள் - அவற்றின் செய்திகளிலிருந்து நாம் உமக்குக் கூறுகிறோம்; நிச்சயமாக அவர்களின் தூதர்கள் அவர்களிடம் தெளிவான அத்தாட்சிகளைக் கொண்டுவந்தார்கள்; எனினும், அவர்கள் முன்னால் பொய்யாக்கிக் கொண்டிருந்த காரணத்தினால் நம்பிக்கை கொள்பவர்களாக இல்லை; இவ்வாறே அல்லாஹ் நிராகரிப்பவர்களின் இதயங்கள் மீது முத்திரையிட்டுவிடுகிறான்.

7:176. நாம் நாடியிருந்தால், அவற்றைக் கொண்டு அவனை உயர்த்தியிருப்போம்; ஆனால், அவன் (இந்த) உலகத்தின் பக்கம் சாய்ந்து தன் மனோ இச்சையைப் பின்பற்றினான்; ஆகவே, அவனுக்கு உதாரணம் நாயைப் போன்றதாகும்; அதை நீர் விரட்டினாலும் நாக்கைத் தொங்கவிடுகிறது; அல்லது அதை நீர் விட்டுவிட்டாலும் நாக்கைத் தொங்கவிடுகிறது; இதுவே, நம் வசனங்களைப் பொய்யெனக் கூறும் கூட்டத்தாருக்கு உதாரணமாகும்; ஆகவே, அவர்கள் சிந்திப்பதற்காக (இத்தகைய) வரலாறுகளைக் கூறுவீராக!

11:100. (நபியே! மேற்கூறப்பட்ட) இவை (சில) ஊர்களின் வரலாறுகள் ஆகும்; இவற்றை நாம் உமக்கு எடுத்துரைத்தோம்; இவற்றில் சில நிலைத்து உள்ளன; (சில அறுவடை செய்யப்பட்டவைப் போல்) அழிந்தும் போயின.

11:120. (நம்) தூதர்களின் வரலாறுகளிலிருந்து யாவற்றையும் உம் இதயத்தை (நாம்) திடப்படுத்துவதற்காக உமக்குக் கூறுகிறோம்; இவற்றில் உமக்குச் சத்தியமும், உபதேசமும், நம்பிக்கையாளர்களுக்கு நினைவூட்டலும் வந்து இருக்கின்றன.

12:111. (நிச்சயமாக) அவர்களின் வரலாறுகளில் அறிவுடையோருக்கு (நல்லதொரு) படிப்பினை இருக்கிறது: இது இட்டுக்கட்டப்பட்ட செய்தியாக இருக்கவில்லை; மாறாக, இதற்குமுன் உள்ள (வேதத்)தையும் இது உண்மையாக்கிவைக்கிறது; ஒவ்வொரு விஷயத்தையும் இது விவரித்துக்காட்டுவதாகவும், நம்பிக்கை கொண்ட சமூகத்தவருக்கு நேர்வழியாகவும், அருளாகவும் இருக்கிறது.

18:13. (நபியே!) நாம் உமக்கு அவர்களுடைய வரலாற்றை உண்மையைக் கொண்டு அறிவிக்கிறோம்; நிச்சயமாக அவர்கள் சில இளைஞர்கள்; தங்கள் இறைவன் மீது நம்பிக்கை கொண்டார்கள்; இன்னும், நாம் அவர்களுக்கு நேர்வழியை அதிகப்படுத்தினோம்.

20:99. (நபியே!) இவ்வாறே முன்சென்ற (சமுதாயங்களின்) செய்திகளிலிருந்து வரலாற்றை நாம் உமக்குக் கூறுகிறோம்; மேலும், திட்டமாக நம்மிடமிருந்து நினைவூட்டும் நல்லுபதேசத்தை (இத்திருக்குர்ஆனை) நாம் உமக்குக் கொடுத்திருக்கிறோம்.

28:25. (சிறிது நேரத்திற்குப்) பிறகு அவ்விருவரில் ஒருத்தி நாணத்துடன் நடந்து அவரிடம் வந்து, "எங்களுக்காக நீங்கள் தண்ணீர் புகட்டியதற்கான கூலியை உங்களுக்கு வழங்குவதற்காக நிச்சயமாக என் தந்தை உங்களை அழைக்கிறார்" என்று கூறினாள்; இவ்வாறாக (மூஸா) அவரிடம் வந்தபோது, தம் வரலாற்றை எடுத்துச் சொன்னார்; அதற்கவர், "பயப்படாதீர்! அக்கிரமக்கார சமூகத்தாரைவிட்டும் நீர் தப்பித்துவிட்டீர்" என்று கூறினார்.

40:78. திட்டமாக உமக்கு முன்னர் தூதர்களை அனுப்பியிருக்கின்றோம்; அவர்களில் சிலருடைய வரலாற்றை உமக்குக் கூறியுள்ளோம்: இன்னும், எவர்களுடைய வரலாற்றை உமக்குக் கூறவில்லையோ அவர்களும் (அத்தூதர்களில்) இருக்கின்றனர்: (இவ்விருசாராரில்) எந்தத் தூதரும் அல்லாஹ்வின் அனுமதியின்றி எந்த அத்தாட்சியையும் கொண்டுவருவதற்கு (அதிகாரம்) இல்லை; ஆகவே, அல்லாஹ்வுடைய கட்டளை வரும்போது, (அனைவருக்கும்) நியாயமாகத் தீர்ப்பளிக்கப்படும்: அன்றியும், அந்த இடத்தில் பொய்யர்கள் தாம் நஷ்டமடைவார்கள்.