7:54. நிச்சயமாக உங்கள் இறைவனாகிய அல்லாஹ்தான் வானங்களையும் பூமியையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அர்ஷின் மீது அவன் நிலையானான்; அவன் இரவைக்கொண்டு பகலை மூடுகிறான்; அது வெகுவிரைவாக அதனைப் பின்தொடர்கின்றது; இன்னும் சூரியனையும், சந்திரனையும், நட்சத்திரங்களையும் தன் கட்டளைக்குக் கட்டுப்பட்டவையாக(ப் படைத்தான்); அறிந்துகொள்ளுங்கள்! படைத்தலும், கட்டளையிடுதலும் அவனுக்கே சொந்தம்; அகிலங்களுக்கெல்லாம் இறைவனாகிய (அவற்றைப் படைத்து, பரிபாலித்துப் பரிபக்குவப்படுத்தும்) அல்லாஹ் மிகவும் பாக்கியமுடையவன்.

9:129. (நபியே! இதன்) பின்னரும், அவர்கள் புறக்கணித்துவிட்டால் (அவர்களை நோக்கி), "எனக்கு அல்லாஹ்வே போதுமானவன்; அவனைத் தவிர வேறு எந்தக் கடவுளும் இல்லை; அவனையே நான் சார்ந்துள்ளேன்; அவன்தான் மகத்தான அரியாசனத்தின் (அர்ஷின்) அதிபதி" என்று நீர் கூறுவீராக!

10:3. நிச்சயமாக உங்கள் இறைவன் அல்லாஹ்வே: அவன் வானங்களையும், பூமியையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அவன் அர்ஷின் (அரியாசனத்தின்) மீது நிலையானான்; (இவை சம்பந்தப்பட்ட) அனைத்துக் காரியங்களையும் அவனே ஒழுங்குபடுத்துகின்றான்; அவனுடைய அனுமதிக்குப் பின்னரேயன்றி, (அவனிடம்) பரிந்து பேசுபவர் எவருமில்லை; அவன்தான் (உங்களைப் படைத்துப் பரிபக்குவப்படுத்தும்) உங்களுடைய இறைவனாகிய அல்லாஹ்; ஆகவே, அவனையே வணங்குங்கள்: நீங்கள் சிந்திக்கவேண்டாமா?

11:7. மேலும், அவன்தான் வானங்களையும், பூமியையும் ஆறு நாட்களில் படைத்தான்; அவனுடைய 'அர்ஷ்' (அரியாசனம்) நீரின் மேல் இருந்தது; உங்களில் யார் செயலால் அழகானவர்? என்பதைச் சோதிக்கும் பொருட்டு (இவற்றைப் படைத்தான்; இன்னும், நபியே! அவர்களிடம்) "நிச்சயமாக நீங்கள் மரணத்திற்குப் பின் எழுப்பப்படுவீர்கள்" என்று நீர் கூறினால் (அதற்கு) நிராகரித்தவர்கள், "இது தெளிவான சூனியத்தைத் தவிர வேறில்லை" என்று நிச்சயமாகக் கூறுவார்கள்.

12:100. இன்னும், அவர் தம் தாய், தந்தையரைச் சிம்மாசனத்தின்மீது உயர்த்தி (அமர்த்தி)னார்; அவர்கள் (எல்லோரும் அக்காலத்திய முறைப்படி) அவருக்கு (மரியாதை செலுத்தியவர்களாகச்) சிரம்பணிந்து வீழ்ந்தனர்: அப்போது அவர் (தம் தந்தையை நோக்கி), "என் தந்தையே! இதுதான் என்னுடைய முந்தைய கனவின் விளக்கமாகும்; அதனை என் இறைவன் உண்மையாக்கிவிட்டான்: மேலும், அவன் என்னைச் சிறைச்சாலையிலிருந்து வெளியாக்கியதுடன், எனக்கும் என் சகோதரர்களுக்குமிடையில் ஷைத்தான் பிரிவினையை உண்டு பண்ணிவிட்ட பின்னர், உங்களைக் கிராமத்திலிருந்து கொண்டுவந்ததன் மூலம், அவன் நிச்சயமாக எனக்குப் பேருபகாரம் செய்துள்ளான்; நிச்சயமாக என் இறைவன், தான் நாடியவற்றை மிக நுட்பமாகச் செய்கிறவன்; நிச்சயமாக அவன் (யாவற்றையும்) நன்கறிந்தவன்; மிக்க ஞானமுள்ளவன்" என்று கூறினார்.

17:42. (நபியே!) நீர் சொல்வீராக! "அவர்கள் கூறுவதுபோல் அவனுடன் வேறு தெய்வங்கள் இருந்தால், அப்போது அவை அர்ஷுடையவன் (அல்லாஹுத் தஆலாவின்) அளவில் ஒரு வழியைத் தேடிக் கண்டுபிடித்து(ச் சென்று) இருக்கும்" என்று.

20:5. அளவற்ற அருளாளன் (தன் கண்ணியத்திற்குத் தக்கவாறும், மகத்துவத்திற்குரியவாறும் அரியாசனத்தின் மீதிருப்பது அவனுக்கு எவ்வாறு தகுமோ அவ்வாறே) அர்ஷின் (அரியாசனத்தின்) மீது நிலையானான்.

21:22. (வானம், பூமி ஆகிய) இவற்றில் அல்லாஹ்வையன்றி வேறு தெய்வங்கள் இருந்திருந்தால், நிச்சயமாக இவையிரண்டும் அழிந்தே போயிருக்கும்; அர்ஷுடைய இறைவனாம் அல்லாஹ், அவர்கள் வர்ணிக்கும் (இத்தகைய) தன்மைகளிலிருந்து மிகவும் தூய்மையானவன்.

23:86. "ஏழு வானங்களுக்கு இறைவனும் மகத்தான அர்ஷுக்கு (அரியாசனத்துக்கு) இறைவனும் யார்?" என்றும் கேட்பீராக!

23:116. ஆகவே, உண்மையான அரசனாகிய அல்லாஹ் மிக உயர்ந்தவன்; அவனைத் தவிர (வணக்கத்திற்குரிய) இறைவன் யாருமில்லை; கண்ணியமிக்க அர்ஷின் (அரியாசனத்தின்) இறைவன் அவனே.

25:59. அவனே வானங்களையும், பூமியையும் அவற்றிற்கிடையில் உள்ளவற்றையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அவன் அர்ஷின் (அரியாசனத்தின்) மீது நிலையானான்; அவன்தான் அளவற்ற அருளாளன்; ஆகவே, அறிந்தவர்களிடம் அவனைப்பற்றிக் கேட்பீராக!

27:23. நிச்சயமாக அந்த தேசத்தவர்களை ஒரு பெண் ஆட்சிபுரிவதை நான் கண்டேன்; இன்னும், அவள் ஒவ்வொரு பொருளும் கொடுக்கப்பட்டுள்ளாள்; மேலும், மகத்தான ஓர் அரியாசனமும் அவளுக்கு இருக்கிறது.

27:26. "அல்லாஹ் - அவனையன்றி வணக்கத்திற்குரிய இறைவன் (வேறு) இல்லை; (அவன்) மகத்தான அர்ஷுக்குரிய இறைவன்" (என்று ஹுத்ஹுத் கூறிற்று).

27:38. "பிரமுகர்களே! அவர்கள் என்னிடம் முஸ்லிம்களாக வருமுன், உங்களில் யார் அவளுடைய அரியாசனத்தை என்னிடம் கொண்டு வருபவர்?" என்று (ஸுலைமான்) கேட்டார்.

27:42. ஆகவே, அவள் வந்தபொழுது, "உன்னுடைய அரியாசனம் இது போன்றதா?" என்று கேட்கப்பட்டது. அதற்கு அவள்: "நிச்சயமாக இது அதைப் போலவே இருக்கிறது" என்று கூறினாள். "இதற்கு முன்பே நாங்கள் ஞானம் கொடுக்கப்பட்டுவிட்டோம்; நாங்கள் முஸ்லிம்களாகவும் இருக்கிறோம்" (என்று ஸுலைமான் கூறினார்).

38:34. இன்னும் நாம் ஸுலைமானைத் திட்டமாகச் சோதித்தோம்; அவருடைய சிம்மாசனத்தில் ஒரு சடலத்தை நாம் போட்டோம்; ஆகவே, அவர் (நம்மளவில்) திரும்பினார்.

39:75. இன்னும், வானவர்கள் தங்கள் இறைவனைப் புகழ்ந்து துதி செய்த வண்ணம் அர்ஷை (அரியாசனத்தை) சூழ்ந்து நிற்பதை நீர் காண்பீர். அப்பொழுது அவர்களுக்கிடையே சத்தியத்தைக் கொண்டு தீர்ப்பளிக்கப்படும்; "அகிலத்தாரின் இறைவனாகிய அல்லாஹ்வுக்கே புகழனைத்தும்" என்று (யாவராலும்) கூறப்படும்.

40:7. அர்ஷை (அரியாசனத்தை)ச் சுமந்து கொண்டிருப்பவர்களும், அதைச் சுற்றியுள்ளவர்களும் தங்கள் இறைவனின் புகழைக்கொண்டு அவனைத் துதி செய்துகொண்டு இருக்கிறார்கள்; அவன் மீது நம்பிக்கை வைக்கிறார்கள்; மேலும், நம்பிக்கை கொண்டவர்களுக்காக மன்னிப்புக் கோருகின்றனர்; "எங்கள் இறைவனே! நீ அருளாலும், ஞானத்தாலும் எல்லாப் பொருட்களையும் சூழ்ந்து இருக்கிறாய்! எனவே, பாவமீட்சி கோரி உன் வழியைப் பின்பற்றுபவர்களுக்கு, நீ மன்னிப்பளிப்பாயாக! இன்னும், அவர்களை நரக வேதனையிலிருந்தும் காத்தருள்வாயாக!"

40:15. (அவனே) அந்தஸ்துகளை உயர்த்துபவன்; அர்ஷுக்குரியவன்; சந்திப்புக்குரிய (இறுதி) நாளைப் பற்றி அச்சமூட்டி எச்சரிக்கை செய்வதற்காக தன் அடியார்களில் தான் நாடியவர்கள் மீது, தன் கட்டளையினால் வஹீயை இறக்கிவைக்கிறான்.

43:82. வானங்களுக்கும் பூமிக்கும் இறைவன்; அர்ஷுக்கும் இறைவன்; (அத்தகைய இறைவன், அவனுக்குச் சந்ததி உண்டென்று) அவர்கள் வர்ணிப்பதைவிட்டும் மிக்க பரிசுத்தமானவன்.

57:4. அவன்தான் வானங்களையும், பூமியையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அர்ஷின் (அரியாசனத்தின்) மீது அவன் நிலையானான்; பூமிக்குள் நுழைவதையும், அதிலிருந்து வெளியாவதையும், வானத்திலிருந்து இறங்குவதையும், அதில் ஏறுவதையும் அவன் நன்கறிகிறான்; நீங்கள் எங்கிருந்த போதிலும் அவன் உங்களுடனே இருக்கிறான்; அன்றியும், அல்லாஹ் நீங்கள் செய்வதை உற்று நோக்கியவனாக இருக்கிறான்.

69:17. இன்னும், வானவர்கள் அதன் கடைக் கோடியிலிருப்பார்கள்; அன்றியும், அந்நாளில் உம்முடைய இறைவனின் அர்ஷை, (வானவர்) எட்டுப் பேர் தம் மேல் சுமந்திருப்பார்கள்.

81:20. (அவர்) சக்திமிக்கவர்: அர்ஷுக்குடையவனிடம் பெரும் பதவியுடையவர்.

85:15. (அவனே) அர்ஷுக்குடையவன்; பெருந்தன்மை மிக்கவன்.