2:109. வேதத்தை உடையவர்களில் பெரும்பாலோர் உண்மை அவர்களுக்குத் தெளிவாகத் தெரிந்த பின்னரும் தங்கள் மனதில் உள்ள பொறாமையினால், நீங்கள் நம்பிக்கை கொண்ட பின் உங்களை நிராகரிப்போராக மாற்றிவிட வேண்டுமென விரும்புகிறார்கள்; ஆனால் அல்லாஹ் தனது கட்டளையைக் கொண்டுவரும் வரை அவர்களை நீங்கள் மன்னித்து, அவர்கள் போக்கிலே விட்டுவிடுங்கள்; நிச்சயமாக அல்லாஹ் அனைத்துப் பொருட்கள் மீதும் சக்தி உடையவனாக இருக்கிறான்.

4:54. அல்லாஹ் தன் அருளினால் மனிதர்களுக்கு வழங்கியவற்றின் மீது இவர்கள் பொறாமை கொள்கின்றார்களா? இன்னும் நாம், நிச்சயமாக இப்ராஹீமின் சந்ததியினருக்கு வேதத்தையும், ஞானத்தையும் கொடுத்தோம்; அத்துடன் மாபெரும் அரசாங்கத்தையும் அவர்களுக்குக் கொடுத்தோம்.

48:15. போரில் கிடைத்த பொருட்களை எடுத்துக் கொள்வதற்காக நீங்கள் சென்றீர்களாயின், (போருக்கு உம்முடன் சேர்ந்துவராமல்) பின் தங்கி விட்டவர்கள், "நாங்களும் உங்களைப் பின்பற்றிவர, எங்களையும் (அனுமதித்து) விடுங்கள்" என்று கூறுவார்கள்; அவர்கள் அல்லாஹ்வின் வாக்கை மாற்றிவிட நாடுகிறார்கள்; "நீங்கள் எங்களைப் பின்தொடர வேண்டாம்; இவ்வாறே அல்லாஹ் முன்னர் கூறியிருக்கின்றான்" என்று (நபியே! அவர்களிடம்) சொல்லிவிடுவீராக! ஆனால், அவர்கள், "அல்ல! நீங்கள் எங்கள்மீது பொறாமை கொண்டுள்ளீர்கள்" எனக் கூறுவார்கள்: அப்படியல்ல! அவர்கள் மிகச் சொற்பமாகவே அன்றி (பெரும்பாலானதை) விளங்காமலேயே இருக்கிறார்கள்.

113:5. பொறாமைக்காரனின் தீங்கைவிட்டும் - அவன் பொறாமைகொள்ளும் போது (நான் பாதுகாவல் தேடுகிறேன்).