2:51. மேலும், நாம் மூஸாவுக்கு (வேதம் அருள) நாற்பது இரவுகளை வாக்களித்தோம்; (அதற்காக அவர் சென்ற) பின்னர், காளைக்கன்றை (கடவுளாக) எடுத்துக்கொண்டீர்கள்; (அதனால்,) நீங்கள் அக்கிரமக்காரர்களாகிவிட்டீர்கள்.

2:164. நிச்சயமாக வானங்களையும், பூமியையும் படைத்திருப்பதிலும், இரவும் பகலும் மாறிமாறி வருவதிலும்; மனிதர்களுக்குப் பயன் தருவதைக் கொண்டு கடலில் செல்லும் கப்பல்களிலும்; வானத்திலிருந்து அல்லாஹ் தண்ணீரை இறக்கி அதன் மூலமாக பூமி இறந்தபின் அதை உயிர்ப்பிப்பதிலும்; அதன் மூலம் ஒவ்வொரு விதமான உயிரினத்தையும் பரவவிட்டிருப்பதிலும், காற்றுகளை மாறிமாறி வீசச்செய்வதிலும்; வானத்திற்கும், பூமிக்குமிடையே கட்டுப்பட்டிருக்கும் மேகங்களிலும் - விளங்கும் மக்களுக்கு (அல்லாஹ்வுடைய வல்லமையையும், கருணையையும் எடுத்துக்காட்டும்) சான்றுகள் உள்ளன.

2:187. நோன்பின் இரவுகளில் நீங்கள் உங்கள் மனைவியருடன் கூடுவது உங்களுக்கு அனுமதிக்கப்பட்டுள்ளது; அவர்கள் உங்களுக்கு ஆடையாகவும், நீங்கள் அவர்களுக்கு ஆடையாகவும் இருக்கின்றீர்கள்; நிச்சயமாக நீங்கள் உங்களையே வஞ்சித்துக் கொண்டிருந்ததை அல்லாஹ் நன்கறிவான்: அவன் உங்கள் மன்னிப்புக் கோருதலை ஏற்று, உங்களை விட்டும் (அப்பாவத்தை) மன்னித்துவிட்டான்; எனவே, இனி (நோன்பு இரவுகளில்) உங்கள் மனைவியருடன் கூடி அல்லாஹ் உங்களுக்கு விதித்ததைத் தேடிக் கொள்ளுங்கள்; இன்னும், அதிகாலை நேரம் என்ற வெள்ளை நூல், (இரவு என்ற) கறுப்பு நூலிலிருந்து தெளிவாகத் தெரியும்வரை உண்ணுங்கள், பருகுங்கள்; பின்னர், இரவுவரை நோன்பைப் பூர்த்தி செய்யுங்கள்; இன்னும், நீங்கள் பள்ளிவாசலில் தங்கி (இஃதிகாஃப்) இருக்கும்போது உங்கள் மனைவியருடன் கூடாதீர்கள் - இவை அல்லாஹ்வின் வரம்புகளாகும்; அவற்றை (மீற) நெருங்காதீர்கள்; (தன்னை) அஞ்சுவதற்காக இவ்வாறே அல்லாஹ் தன்னுடைய சான்றுகளை மனிதர்களுக்குத் தெளிவாக்குகின்றான்.

2:274. யார் தங்கள் பொருள்களை (தான தர்மங்களில்) இரவிலும் பகலிலும், இரகசியமாகவும் பகிரங்கமாகவும் செலவு செய்கின்றார்களோ, அவர்களுக்கு அவர்களுடைய இறைவனிடத்தில் கூலி இருக்கிறது; அவர்களுக்கு அச்சமும் இல்லை; அவர்கள் துக்கப்படவும் மாட்டார்கள்.

3:27. "நீதான் இரவைப் பகலில் புகுத்துகின்றாய்; நீதான் பகலை இரவிலும் புகுத்துகின்றாய்; உயிரற்றதிலிருந்து உயிருள்ளதை நீயே வெளியாக்குகின்றாய்; நீயே உயிருள்ளதிலிருந்து உயிரற்றதையும் வெளியாக்குகின்றாய்; மேலும், நீ நாடியோருக்குக் கணக்கின்றிக் கொடுக்கின்றாய்."

3:113. (எனினும், வேதத்தையுடையோராகிய) அவர்கள் (எல்லோரும்) சமமல்லர்; வேதத்தையுடையோரில் (நேர்வழியில்) நிற்கும் ஒரு கூட்டத்தினர் இருக்கின்றனர்; இரவு நேரங்களில் அல்லாஹ்வின் வசனங்களை ஓதுகிறார்கள்; இன்னும், அவர்கள் ஸஜ்தா செய்கிறார்கள்.

3:190. நிச்சயமாக வானங்கள், பூமி ஆகியவற்றின் படைப்பிலும்; இரவும் பகலும் மாறிமாறி வருவதிலும் அறிவுடையோருக்குப் பல அத்தாட்சிகள் இருக்கின்றன.

6:13. இரவிலும், பகலிலும் வசிப்பவை எல்லாம் அவனுக்கே சொந்தம்; அவன் (யாவற்றையும்) செவியுறுவோனாகவும், நன்கறிபவனாகவும் இருக்கின்றான்.

6:60. அவன்தான் இரவில் உங்களைக் கைப்பற்றுகிறான்; இன்னும், நீங்கள் பகலில் செய்தவற்றையெல்லாம் அறிகிறான்; மீண்டும், குறிப்பிட்ட தவணை பூர்த்திசெய்யப்படுவதற்காக அதில் (பகலில்) உங்களை எழுப்புகிறான்; பின்னர், உங்களுடைய (இறுதி) மீட்சி அவனிடமே இருக்கிறது; அப்பால் நீங்கள் (இவ்வுலகில்) செய்து கொண்டிருந்ததை அவன் உங்களுக்கு அறிவிப்பான்.

6:76. ஆகவே, அவரை இரவு மூடிக்கொண்டபோது, அவர் ஒரு நட்சத்திரத்தைப் பார்த்தார்: "இதுதான் என் இறைவன்!" என்று கூறினார். ஆனால், அது மறைந்தபோது அவர், "நான் மறையக்கூடியவற்றை நேசிக்கமாட்டேன்" என்று சொன்னார்.

6:96. அவனே பொழுதை விடியச் செய்பவன்; அவனே இரவை அமைதியானதாகவும், சூரியனையும், சந்திரனையும் காலம் காட்டியாகவும் அமைத்தான்; இவையாவும் வல்லமையில் மிகைத்தோனும், எல்லாம் அறிந்தோனுமாகிய (இறை)வனின் ஏற்பாடாகும்.

7:54. நிச்சயமாக உங்கள் இறைவனாகிய அல்லாஹ்தான் வானங்களையும் பூமியையும் ஆறு நாட்களில் படைத்தான்; பின்னர், (தன் கண்ணியத்திற்குத் தக்கவாறும், மகத்துவத்திற்குரியவாறும் அர்ஷின் மீதிருப்பது அவனுக்கு எவ்வாறு தகுமோ அவ்வாறே) அர்ஷின் மீது அவன் நிலையானான்; அவன் இரவைக்கொண்டு பகலை மூடுகிறான்; அது வெகுவிரைவாக அதனைப் பின்தொடர்கின்றது; இன்னும் சூரியனையும், சந்திரனையும், நட்சத்திரங்களையும் தன் கட்டளைக்குக் கட்டுப்பட்டவையாக(ப் படைத்தான்); அறிந்துகொள்ளுங்கள்! படைத்தலும், கட்டளையிடுதலும் அவனுக்கே சொந்தம்; அகிலங்களுக்கெல்லாம் இறைவனாகிய (அவற்றைப் படைத்து, பரிபாலித்துப் பரிபக்குவப்படுத்தும்) அல்லாஹ் மிகவும் பாக்கியமுடையவன்.

7:142. மூஸாவுக்கு நாம் முப்பது இரவுகளை வாக்களித்தோம்; மேலும் அதை, பத்து (இரவுகள்) மூலம் பூர்த்தியாக்கினோம்: இவ்வாறாக அவருடைய இறைவனின் காலக்கெடு நாற்பது இரவுகளாக முழுமைபெற்றது; அப்போது மூஸா தம் சகோதரர் ஹாரூனை நோக்கி, "நீர் என்னுடைய சமூகத்தாரில் என்னுடைய பிரதிநிதியாக இருந்து, (அவர்களைத்) திருத்துவீராக! குழப்பம் உண்டாக்குபவரின் வழியைப் பின்பற்றாதிருப்பீராக!" எனக் கூறினார்.

10:6. நிச்சயமாக இரவும், பகலும் (ஒன்றன் பின் ஒன்றாக) மாறி மாறி வருவதிலும், வானங்களிலும், பூமியிலும் அல்லாஹ் படைத்துள்ள (அனைத்)திலும் (அவனை) அஞ்சுகின்ற கூட்டத்தினருக்குப் பல அத்தாட்சிகள் இருக்கின்றன.

10:24. இவ்வுலக வாழ்க்கைக்கு உதாரணம், நாம் வானத்திலிருந்து இறக்கிவைக்கும் மழைநீரைப் போன்றது; மனிதர்களும் கால்நடைகளும் உண்ணக்கூடியவைகளிலிருந்து பூமியின் தாவரங்கள் அதனுடன் கலந்து முடிவில் பூமி (அந்தப் பயிர்கள் மூலம்) தன் அலங்காரத்தைப் பெற்று கவர்ச்சியடைந்த பொழுது, அதன் சொந்தக்காரர்கள் (கதிரை அறுவடை செய்துகொள்ளக்கூடிய) சக்தியுடையவர்கள் என்று தங்களை எண்ணிக்கொண்டிருந்தனர்; அச்சமயம், இரவிலோ அல்லது பகலிலோ அதற்கு நம் கட்டளை வந்து (அதை நாம் அழித்துவிட்டோம்); நிச்சயமாக நேற்று அது (அவ்விடத்தில்) இல்லாதது போன்று அறுக்கப்பட்டதாக, அதை நாம் ஆக்கிவிட்டோம்; இவ்வாறே நாம் சிந்தனை செய்யும் கூட்டத்திற்கு (நம்) அத்தாட்சிகளை விவரிக்கின்றோம்.

10:27. ஆனால், தீமைகளைச் சம்பாதிப்பவர்களுக்கு, (அவர்கள் செய்த) தீமைக்குக் கூலியாக அது போன்ற தீமையேயாகும்! அவர்களை இழிவு சூழ்ந்துகொள்ளும்; அவர்களை அல்லாஹ்விடமிருந்து காப்பாற்றுபவர் எவருமிலர்; அவர்களுடைய முகங்கள் இருளான இரவின் ஒரு பகுதியால் மூடிக்கொள்ளப்பட்டதைப் போல் இருக்கும்: அவர்கள் நரகநெருப்புக்கு உரியவர்கள்; அவர்கள் அதில் நிரந்தரமாக இருப்பார்கள்.

10:67. அவனே இரவை உங்களுக்காக - அதில் நீங்கள் அமைதி பெறுவதற்காகவும், பகலை ஒளிமிக்கதாகவும் உண்டாக்கினான்; நிச்சயமாக இதில் (அவன் வசனங்களைச்) செவிசாய்த்துக் (கவனமாகக்) கேட்கும் சமுதாயத்திற்கு (நிரம்ப) அத்தாட்சிகள் இருக்கின்றன.

11:81. (விருந்தினராக வந்த வானவர்கள்) "லூத்தே! நிச்சயமாக நாங்கள் உம்முடைய இறைவனின் தூதர்களாகவே இருக்கின்றோம்; நிச்சயமாக அவர்கள் உம்மை வந்தடைய முடியாது; எனவே, இரவின் ஒரு பகுதியில் நீர் உம் குடும்பத்துடன் (இவ்வூரை விட்டுச்) சென்றுவிடும்! உம்முடைய மனைவியைத் தவிர: உங்களில் யாரும் திரும்பியும் பார்க்கவேண்டாம்; நிச்சயமாக அவர்களை அடையக்கூடிய (ஆபத்)து அவளையும் அடைந்து கொள்ளும்; (வேதனை வர) அவர்களுக்கு நிச்சயமாக வாக்களிக்கப்பட்ட நேரம் விடியற்காலையாகும்; விடியற்காலை சமீபித்துவிடவில்லையா?"

11:114. பகலின் (காலை, மாலை ஆகிய) இரு முனைகளிலும், இரவின் சில பகுதிகளிலும் நீர் தொழுகையை நிலைநாட்டுவீராக! நிச்சயமாக நன்மைகள் தீமைகளைப் போக்கிவிடும்; (இறைவனை) நினைவு கூருவோருக்கு இது உபதேசமாகும்.

13:3. மேலும், அவன் எத்தகையவன் என்றால் அவனே பூமியை விரித்து, அதில் உறுதியான மலைகளையும், ஆறுகளையும் உண்டாக்கினான்; இன்னும், கனிகள் ஒவ்வொன்றிலிருந்தும் இரண்டிரண்டாக ஜோடிகளை அதில் உண்டாக்கினான்; அவனே இரவைப் பகலால் மூடுகிறான்; நிச்சயமாக இவற்றில் சிந்திக்கும் மக்களுக்குப் பல அத்தாட்சிகள் இருக்கின்றன.

13:10. எனவே, உங்களில் பேச்சை இரகசியமாக்குகிறவரும், அதனைப் பகிரங்கப்படுத்துபவரும், இரவில் மறைந்துகொள்பவரும், பகலில் பகிரங்கமாக நடப்பவரும் (அவனுக்குச்) சமம்தான்.

14:33. (தவறாமல், தம் வழிகளில்) தொடர்ந்து செல்லுமாறு சூரியனையும் சந்திரனையும் அவனே உங்களுக்கு வசப்படுத்தித் தந்தான்; மேலும், அவனே இரவையும் பகலையும் உங்களுக்கு வசப்படுத்தித் தந்தான்.

15:65. "ஆகவே, இரவின் ஒரு பகுதியில் உம்முடைய குடும்பத்தினருடன் சென்றுவிடும்; அன்றியும், (அவர்களை முன்னால் செல்லவிட்டு) அவர்கள் பின்னே, நீர் தொடர்ந்து செல்லும்; உங்களில் எவரும் திரும்பிப் பார்க்க வேண்டாம்; நீங்கள் ஏவப்படும் இடத்திற்குச் சென்றுவிடுங்கள்" (என்று அத்தூதுவர்கள் கூறினார்கள்.)

16:12. இன்னும், அவனே இரவையும் பகலையும் சூரியனையும் சந்திரனையும், உங்கள் நலன்களுக்கு வசப்படுத்திக் கொடுத்துள்ளான்; அவ்வாறே நட்சத்திரங்களும் அவன் கட்டளைப்படியே வசப்படுத்தப்பட்டுள்ளன; நிச்சயமாக இதிலும் விளங்கும் கூட்டத்தாருக்குத் தக்க அத்தாட்சிகள் இருக்கின்றன.

17:1. தன்னுடைய அடியாரை ஓரிரவில் (கஃபாவாகிய) மஸ்ஜிதுல் ஹராமிலிருந்து மஸ்ஜிதுல் அக்ஸா வரை இரவுப் பயணம் செய்வித்த ஒருவன் (அல்லாஹ்) மிகப் பரிசுத்தமானவன்; (மஸ்ஜிதுல் அக்ஸாவாகிய) அது எத்தகையதென்றால், அதனைச் சுற்றியுள்ள பகுதியை நாம் அபிவிருத்தி செய்திருக்கின்றோம்; நம்முடைய அத்தாட்சிகளை அவருக்கு நாம் காண்பிப்பதற்காக (அவ்வாறு அழைத்துச் சென்றோம்); நிச்சயமாக அவன் (யாவற்றையும்) செவியுறுவோனாகவும், பார்ப்பவனாகவும் இருக்கிறான்.

17:12. இரவையும் பகலையும் நாம் இரண்டு அத்தாட்சிகளாக ஆக்கினோம்; பின்னர், இரவின் அத்தாட்சி மங்கி (இருளாகி)டச் செய்தோம்; உங்கள் இறைவனுடைய அருட்கொடையை நீங்கள் தேடிக்கொள்வதற்காகவும், ஆண்டுகளின் எண்ணிக்கையையும், (காலக்) கணக்கையும் நீங்கள் அறிந்துகொள்வதற்காகவும் பகலின் அத்தாட்சியைப் பிரகாசமாக்கினோம்; மேலும், நாம் ஒவ்வொரு பொருளையும் தெளிவாக விவரித்திருக்கின்றோம்.

17:78. (நபியே!) சூரியன் (உச்சியில்) சாய்ந்ததிலிருந்து இரவின் இருள் சூழும்வரை (ளுஹர், அஸர், மஃரிப், இஷா) தொழுகையை நிலைநிறுத்துவீராக! இன்னும், ஃபஜ்ருடைய தொழுகையையும் (நிலைநிறுத்துவீராக!); நிச்சயமாக ஃபஜ்ர் தொழுகை (வானவர்களின்) வருகைக்குரியதாக இருக்கிறது.

17:79. இன்னும், இரவில் (ஒரு சிறு) பகுதியில் உமக்கு உபரியான தஹஜ்ஜுத் தொழுகையைத் தொழுவீராக! (இதன் பாக்கியத்தினால்) உம்முடைய இறைவன், (மகாமம் மஹ்மூதா என்னும்) புகழ் பெற்ற தலத்தில் உம்மை எழுப்பப் போகிறான்.

19:10. (அதற்கவர்) "என் இறைவனே! நீ எனக்கு ஓர் அத்தாட்சியை (இதற்காக) ஏற்படுத்துவாயாக!" என்று வேண்டினார். "நீர் சௌக்கியத்துடன் இருக்கும் நிலையிலேயே மூன்று இரவு (பகல்)கள் நீர் மக்களுடன் பேச முடியாமலிருப்பீர்; (அதுவே) உமக்கு அத்தாட்சியாகும்" என்று கூறினான்.

20:130. ஆகவே, (நபியே!) அவர்கள் சொல்வதை (யெல்லாம்) நீர் பொறுத்துக்கொள்வீராக! இன்னும், சூரியன் உதிப்பதற்கு முன்னும், அது மறைவதற்கு முன்னும், இரவு நேரங்களிலும் உம்முடைய இறைவனின் புகழைத் துதிப்பீராக! இன்னும், பகலின் (இரு) முனைகளிலும் இவ்வாறே துதி செய்வீராக! இதனால் (நன்மைகளடைந்து) நீர் திருப்திபெறலாம்.

21:20. இடைவிடாமல் அவர்கள் இரவிலும் பகலிலும் அவனைத் துதித்துக் கொண்டே இருக்கிறார்கள்.

21:33. இன்னும், அவனே இரவையும், பகலையும், சூரியனையும், சந்திரனையும் படைத்தான்; (வானில் தத்தமக்குரிய) வட்டவரைக்குள் ஒவ்வொன்றும் நீந்துகின்றன.

21:42. "உங்களை இரவிலும், பகலிலும் அளவற்ற அருளாளனின் வேதனையிலிருந்து பாதுகாக்கக் கூடியவர் யார்?" என்று (நபியே!) நீர் கேளும்; ஆனால், அவர்கள் தங்கள் இறைவனை நினைப்பதையே புறக்கணிப்பவர்கள்.

22:61. நிச்சயமாக அல்லாஹ் இரவைப் பகலில் புகுத்துகிறான்; பகலை இரவில் புகுத்துகிறான்; இன்னும், நிச்சயமாக அல்லாஹ் (எல்லாவற்றையும்) கேட்பவனாகவும், பார்ப்பவனாகவும் இருக்கின்றான் என்பதே இதற்குக் காரணம்.

23:80. அவனே உயிர் கொடுக்கிறான்; இன்னும், அவனே மரணிக்கச் செய்கிறான்; மற்றும் இரவும், பகலும் மாறி மாறி வருவதும் அவனுக்குரியதே! (இவற்றை) நீங்கள் விளங்கிக் கொள்ளமாட்டீர்களா?

24:44. இரவையும் பகலையும் அல்லாஹ்வே மாறி மாறி வரச்செய்கிறான்; நிச்சயமாக சிந்தனையுடையவர்களுக்கு இதில் (தக்க) படிப்பினை இருக்கிறது.

25:47. அவன்தான் உங்களுக்கு இரவை ஆடையாகவும், நித்திரையை இளைப்பாறுதலாகவும் ஆக்கியிருக்கின்றான்; இன்னும், அவனே பகலை (உழைப்பிற்கு ஏற்றவாறு) மீண்டும் எழுவதற்காக ஆக்கியிருக்கிறான்.

25:62. இன்னும், சிந்திக்க விரும்புபவருக்கு, அல்லது நன்றி செலுத்த விரும்புபவருக்கு அவன்தான் இரவையும் பகலையும் அடுத்தடுத்து வருமாறு ஆக்கினான்.

27:86. நிச்சயமாக நாமே இரவை - அதில் அவர்கள் அமைதி பெறுவதற்காகவும், பகலை (அவர்களுக்கு) வெளிச்சமாகவும் ஆக்கினோம் என்பதை அவர்கள் பார்க்கவில்லையா? நம்பிக்கை கொண்ட மக்களுக்கு நிச்சயமாக இதில் அத்தாட்சிகள் இருக்கின்றன.

28:71. (நபியே!) நீர் கூறுவீராக: "மறுமை நாள் வரை அல்லாஹ் உங்கள் மீது இரவை நிரந்தரமாக இருக்கும்படிச் செய்துவிட்டால் அல்லாஹ்வையன்றி உங்களுக்கு (பகலின்) வெளிச்சத்தைக் கொண்டுவரக்கூடிய கடவுள் யார்? என்பதை நீங்கள் (சிந்தித்துப்) பார்த்தீர்களா? (இவ்வுண்மையை) நீங்கள் செவியேற்க வேண்டாமா?"

28:73. இன்னும், அவன் தன் அருளினால் உங்களுக்கு இரவையும் பகலையும் உண்டாக்கினான்; நீங்கள் அதில் (- இரவில்) ஓய்வு பெறும் பொருட்டும், நீங்கள் அதில் (- பகலில்) அவன் அருளைத் தேடும் பொருட்டும், (உண்டாக்கினான்; இதற்காக அவனுக்கு) நீங்கள் நன்றி செலுத்துவீர்களாக!

30:23. இன்னும் இரவிலும், பகலிலும், நீங்கள் உறங்குவதும், அவன் அருளிலிருந்து நீங்கள் தேடுவதும் அவனுடைய அத்தாட்சிகளினின்றும் உள்ளன; செவியுறும் சமூகத்திற்கு நிச்சயமாக இதில் அத்தாட்சிகள் இருக்கின்றன.

31:29. நிச்சயமாக அல்லாஹ் தான் இரவைப் பகலில் புகுத்துகிறான்; பகலை இரவில் புகுத்துகிறான்; இன்னும் சூரியனையும், சந்திரனையும் வசப்படுத்தினான் என்பதை நீர் பார்க்கவில்லையா? ஒவ்வொன்றும் ஒரு குறிப்பிட்ட தவணைவரை செல்கின்றன; அன்றியும், நிச்சயமாக அல்லாஹ் நீங்கள் செய்பவற்றை நன்கறிபவன்.

34:18. இன்னும், அவர்களுக்கிடையிலும், எவற்றில் நாம் பாக்கியம் செய்திருக்கின்றோமோ அந்த ஊர்களுக்கிடையிலும் வெளிப்படையாகத் தெரியும்படியான பல ஊர்களையும் நாம் உண்டாக்கி, அவற்றில் போக்குவரத்து(ப் பாதைகளையு)ம் அமைத்தோம்; "அவற்றில் இரவுகளிலும், பகல்களிலும் அச்சமற்றவர்களாகப் பயணம் செய்யுங்கள்" (என்று கூறினோம்).

34:33. அதற்குப் பலவீனர்களாகக் கருதப்பட்டவர்கள் பெருமை தேடிக் கொண்டவர்களிடம், "அப்படியல்ல! நாங்கள் அல்லாஹ்வை நிராகரிப்பதற்கும் அவனுக்கு இணைகளை நாங்கள் கற்பிப்பதற்கும் நீங்கள் எங்களுக்கு ஏவியபொழுது (அது) இரவிலும், பகலிலும் உள்ள (உங்களுடைய) சூழ்ச்சியாகும்" என்று கூறுவார்கள்; மேலும், அவர்கள் வேதனையைப் பார்க்கும்போது இந்தக் கைசேதத்தை (ஒருவருக்கொருவர்) மறைப்பார்கள்: இன்னும், நிராகரித்தவர்களுடைய கழுத்துகளில் நாம் விலங்குகளை மாட்டுவோம்; அவர்கள் செய்து கொண்டிருந்த (தீ)வினைகளுக்கன்றி கூலி கொடுக்கப்படுவார்களா?

35:13. அவனே இரவைப் பகலில் புகுத்துகிறான்; பகலை இரவில் புகுத்துகிறான்; சூரியனையும் சந்திரனையும் (தன்) வசப்படுத்தி வைத்திருக்கின்றான்; இவை அனைத்தும் குறிப்பிட்ட காலத்தின்படியே செல்கின்றன; அவனே உங்களுடைய இறைவனாகிய அல்லாஹ்; அரசாட்சியெல்லாம் அவனுக்குரியதே! அவனையன்றி நீங்கள் எவர்களைப் பிரார்த்தி(த்து அழை)க்கின்றீர்களோ, அவர்களுக்கு அணுவளவும் அதிகாரம் இல்லை.

36:37. இரவும் இவர்களுக்கோர் அத்தாட்சியாகும்; அதிலிருந்து பகலைக் கழற்றிவிடுகிறோம்; அதனால், இவர்கள் (ஆழ்ந்த) இருளிலாகி விடுகிறார்கள்.

36:40. சூரியன் சந்திரனை அடைய முடியாது; இரவு பகலை முந்த முடியாது; இவ்வாறே எல்லாம் (தம்) வட்ட வரைக்குள் நீந்திச் செல்கின்றன.

37:138. இன்னும், இரவிலும் கூட(ச் செல்கிறீர்கள்; இதைக் கொண்டு) நீங்கள் நல்லறிவு பெறமாட்டீர்களா?

39:5. அவன் வானங்களையும், பூமியையும் உண்மையைக் கொண்டு படைத்திருக்கிறான்; அவனே பகலின் மீது இரவைச் சுருட்டுகிறான்; இன்னும், இரவின் மீது பகலைச் சுருட்டுகிறான்; சூரியனையும், சந்திரனையும் (தன் ஆதிக்கத்திற்குள்) வசப்படுத்தினான்; இவை ஒவ்வொன்றும் குறிப்பிட்ட தவணைப் பிரகாரம் ஓடுகிறது; (நபியே!) அறிந்து கொள்வீராக! அவன் (யாவரையும்) மிகைத்தவன்; மிக மன்னிப்பவன்.

39:9. எவர் மறுமையை அஞ்சி தன் இறைவனுடைய அருளை ஆதரவு வைத்து இராக்காலங்களில் ஸுஜூது செய்தவராகவும், (நிலையில்) நின்றவராகவும் வணங்குகிறாரோ அவரா? (நிராகரிப்பவரைப்போல் ஆவார்?) (நபியே!) நீர் கூறும்: "அறிந்தோரும், அறியாதோரும் சமமாவார்களா? நிச்சயமாக (இக் குர்ஆனைக் கொண்டு) படிப்பினை பெறுவோர் அறிவுடையவர்கள்தாம்."

40:61. நீங்கள் இளைப்பாறுவதற்காக இரவையும், நீங்கள் பார்ப்பதற்காக பகலையும் அல்லாஹ்தான் படைத்தான்; நிச்சயமாக அல்லாஹ் மனிதர்கள் மீது அருளுடையவன்; ஆயினும், மனிதர்களில் பெரும்பாலோர் நன்றி செலுத்துவதில்லை.

41:37. இரவும் பகலும், சூரியனும் சந்திரனும் அவனுடைய அத்தாட்சிகளில் உள்ளவைதாம்; ஆகவே, நீங்கள் சூரியனுக்கும் சந்திரனுக்கும் ஸுஜூது செய்யாதீர்கள்; இவற்றைப் படைத்தவனாகிய அல்லாஹ்வுக்கே - அவனையே நீங்கள் வணங்குபவர்களாக இருந்தால் - ஸுஜூது செய்யுங்கள்.

41:38. ஆனால், (அல்லாஹ்வை வணங்காது) அவர்கள் பெருமையடித்தார்களானால் (அவனுக்கு நஷ்டமில்லை); உம் இறைவனிடம் இருப்பவர்கள் (வானவர்கள்) இரவிலும் பகலிலும் அவனைத் தஸ்பீஹ் (துதி) செய்து கொண்டேயிருக்கிறார்கள்; அவர்கள் (அதில்) சோர்வடைவதுமில்லை.

44:3. நிச்சயமாக, நாம் அதனை பாக்கியமுள்ள இரவிலே இறக்கினோம்; நிச்சயமாக (அதன் மூலம்) அச்சமூட்டி எச்சரித்துக் கொண்டே இருக்கின்றோம்.

44:23. "என் அடியார்களை (அழைத்து)க் கொண்டு, இரவில் நீர் (வேறிடம்) செல்லும்! நிச்சயமாக நீங்கள் பின்தொடரப்படுவீர்கள்" (என்று இறைவன் கூறினான்).

45:5. மேலும், இரவு பகல் மாறி மாறி வருவதிலும், வானத்திலிருந்தும் அருள் மழையை அல்லாஹ் இறக்கிவைத்து, இறந்துபோன பூமியை அதைக் கொண்டு உயிர்ப்பிப்பதிலும், காற்றுகளை மாறி மாறி வீசச் செய்வதிலும் அறிவுடைய சமூகத்தாருக்கு அத்தாட்சிகள் இருக்கின்றன.

50:40. இன்னும் இரவிலிருந்தும், ஸுஜூதுக்குப் பின்னரும் அவனைத் தஸ்பீஹ் (துதி) செய்வீராக!

51:17. அவர்கள் இரவில் மிகவும் சொற்ப நேரமேயன்றித் தூங்கமாட்டார்கள்.

52:49. இன்னும், இரவின் ஒரு பாகத்திலும், நட்சத்திரங்கள் அடையும் நேரத்திலும் அவனைத் தஸ்பீஹ் (துதி) செய்வீராக!

57:6. அவனே இரவைப் பகலில் புகுத்துகின்றான்; இன்னும், பகலை இரவில் புகுத்துகின்றான்; அவன் இதயங்களிலுள்ளவற்றையெல்லாம் நன்கறிந்தவன்.

69:7. அவர்கள் மீது அதை ஏழு இரவுகளும், எட்டுப் பகல்களும் தொடர்ந்து வீசச் செய்தான்; எனவே, அந்தச் சமூகத்தினரை, அடிப்பாகங்களுடன் சாய்ந்துவிட்ட ஈச்சமரங்களைப் போல் (பூமியில்) விழுந்து கிடப்பதை (அக்காலை நீர் இருந்திருந்தால்) கண்டிருப்பீர்.

71:5. பின்னர் அவர்: "என் இறைவா! நிச்சயமாக, நான் என் சமூகத்தாரை இரவிலும், பகலிலும் (நேர்வழியின்பால்) அழைத்தேன்" என்று கூறினார்.

73:2. இரவில் - சிறிது நேரம் தவிர்த்து (தொழுகைக்காக எழுந்து) நிற்பீராக!

73:6. நிச்சயமாக, இரவில் எழுந்திருந்து வணங்குவது (அகத்தையும் புறத்தையும்) ஒருங்கிணைக்க வல்லது; மேலும், வாக்கையும் செவ்வைப்படுத்த வல்லது.

74:33. இரவின் மீது சத்தியமாக! அது பின்னோக்கிச் செல்லும் பொழுது -

76:26. இன்னும், இரவிலும் அவனுக்கு ஸுஜூது செய்வீராக! அன்றியும், இரவில் நெடுநேரம் அவனைத் தஸ்பீஹ் (துதி) செய்வீராக!

78:10. அன்றியும், இரவை (உங்களுக்கு) ஆடையாக நாம் ஆக்கினோம்.

79:29. அவன்தான் அதனுடைய இரவை இருளுடையதாக ஆக்கினான்; இன்னும், அதனுடைய பகலையும் (சூரிய வெளிச்சத்தைக் கொண்டு) வெளியாக்கினான்.

84:17. மேலும், இரவின் மீதும், அது ஒன்று சேர்ப்பவற்றின் மீதும்,

89:2. பத்து இரவுகளின் மீதும் சத்தியமாக!

89:4. செல்கின்ற இரவின் மீதும் சத்தியமாக!

91:4. (அப்பகலை) மூடிக்கொள்ளும் இரவின் மீதும் சத்தியமாக!

92:1. (இருளால்) தன்னை மூடிக்கொள்ளும் இரவின் மீது சத்தியமாக!

97:1. நிச்சயமாக நாம் அதை (குர்ஆனை) கண்ணியமிக்க (லைலதுல் கத்ர் என்ற) இரவில் இறக்கினோம்.

97:3. கண்ணியமிக்க (அந்த) இரவு ஆயிரம் மாதங்களைவிட மிக மேலானதாகும்.